Mataio 25 - Testamenta Áre 1983 (Toaripi PNG)

Parabole o ipi marisahōva ten vei

¹ Lea mea kauri ve basileia usoso marisahōva ten fefeare leiti roi, ereve lamepa la maravi ua la laeai vei leipe vita la sukaeai vei maria voa terōpe fefeare.

² Ere five hea haiivavu, five hea haiore.

³ Haiivavu marisahōva ereve lamepa ovi a—, lamepa ma hea ita maravi terai kao.

⁴ A—, haiore marisahōva ereve lamepa ma hea kōku‐uto voa sisōvi, ereve lamepa ita maravi terōpe.

⁵ Lea ua laeai vei leipe vita mea savori leipe lea mea, ere farehoria ofae hoea ivutu iroropōpe.

⁶ Apisi soa voa i mō isa moipe, Ua laeai vei leipeta vita meha! Pisiri voa forera puavaia arero sukaeai vei.

⁷ Lea mea lea marisahōva foromai itotea, aea ereve lamepa la lei ovava rovaea leipe.

⁸ Haiivavu marisa ere haiore marisa la mō ōpe, Eve lamepa ma hea elaro miaraia, ipi elave lamepa futai vei la leipea.

⁹ A—, haiore marisa tava o mō ōpe, E ita, ela ita leitita usoso kao varo; mai lareva meha, e itaea leita karu tai te eve elore lamepa ma itaea lei maravaia.

¹⁰ Soka ere itaea lei maravai vei terōpe lea mea, ua laeai vei leipe lea vita foreri, kekese lei tai puavaiape lea karu are ita farehoria eva‐e sosoka oti iri voa oropa puavōpe, aea ere utape sasaukōpe reha.

¹¹ Aite voa lea haiivavu marisahōva koti mō ōpe, Papuvita e, papuvita e, utape ela vei fapaia.

¹² A—, are tava o erero mō ōpe, Okofa ara ero o la moi, ara ero ore kao.

¹³ Soka ovoako leitia, ipi kotita sare aeata ora e ore kao.

Parabole o ipi sarufa karu oroisoria vei

¹⁴ Aeata mōfeare: karu aea, oti ára voa sariva terai vei leipe soa, are areve sarufa karu kofa la isei, aea are ovi meiape etau foromai la erero miarōpe.

¹⁵ Are silva moni korukoru la maravi 5,000 karu farakeka aea la miōri, 2,000 karu aea la miōri, aea 1,000 karu aea la miarōpe, farafarapo areve elore elore rofo fefeare. Aite are maea lei terōpe reha.

¹⁶ Silva moni korukoru 5,000 la ovōpe lea vita, utohoa te, aea karu ita etau maeamaea itaea lei lei, aea 5,000 maea aeata maravi topiarōpe.

¹⁷ Moni korukoru 2,000 maravōpe lea vita ta lōfeare, are 2,000 maea aeata maravi topiarōpe.

¹⁸ A—, silva moni korukoru 1,000 maravōpe lea vita maria voa te, toru‐uta mea voa isa, areve papuvita ve moni la milafuka miavōpe.

¹⁹ Soa savori kaleipe lea mea, lea sarufa karu ve papuvita koti, areve etau vei ere ita laua seseōvōpe.

²⁰ Lea mea moni korukoru 5,000 maravōpe lea vita koti, aea moni korukoru 5,000 maea aea ta topiarōpe la maravi koti mō ōpe, Papuvita e, a moni korukoru 5,000 araro miarōpe; ofae eavaia, ara 5,000 maea aeata maravi topiari laisisea meha.

²¹ Areve papuvita arero mō ōpe, Lareva kofa reha, tivi haura leita sarufa lareva e; a etau fafareso voa mai haura lei vovea, ara aro etau rauapo ve tivi harofave vita leiti roi; ave papuvita ve hailareva leita soa voa oropaia.

²² Moni korukoru 2,000 maravōpe lea vita ta koti mō ōpe, Papuvita e, a moni korukoru 2,000 araro miarōpe; ofae eavaia, ara 2,000 maea aeata maravi topiari laisisea meha.

²³ Areve papuvita arero ta mō ōpe, Lareva kofa reha, tivi haura leita sarufa lareva e, a etau fafareso voa mai haura lei vovea, ara aro etau rauapo ve tivi harofave vita ta leiti roi; ave papuvita ve hailareva leita soa voa oropaia.

²⁴ Aite moni korukoru 1,000 maravōpe vita ta koti mō ōpe, Papuvita e, ara aro ore, a haiiri kere vita; a vipai auke leita lea oti voa a fare sarapa vovea, aea a mere porai auke leita lea oti voa a fare toea vovea.

²⁵ Soka ara tore lei, maria voa te, ave moni korukoru 1,000 la mea iri voa isa milafuka miavōpe. Ofae eavaia, a ave etau la la maravai meha.

²⁶ Areve papuvita tava o arero mō ōpe, Kaiae leita aea maeapatoita sarufa e, a ore ara vipai auke leita lea oti voa ara fare sarapai vovea, aea ara mere porai auke leita lea oti voa ara fare toea vovea.

²⁷ Mai haura mōfeare, arave moni bank karu la miarai vei, lōfeare ara ata koti ara arave moni, arero topiaraita moni ita la maravai lare.

²⁸ Soka lea moni are voa maravi, moni koru 10,000 ita karu la miaraia;

²⁹ ipi etau maravi meita lea karu la etau maea ata topiari miōri rauapo leiti roi, a—, etau maravi mei auke leita lea karu, are sa maravi meita lea etau orakafofa la farai roi.

³⁰ Lea sarufa karu maealolo la ovi maria murumuru oti voa toapaia; lōvoa fi a’a’ tao ta karekare ari roi.

Seseōvi tava miaraita soa rovaea

³¹ Karu ve Atute areve sosorusosoru ita, areve aneru foromai are ita farehoria foreraita lea mea, are areve sosorusosoru ve terona voa avi,

³² torutoru karu foromai areve omopa voa kokoruka; aea are erero itai itai faeai roi, usoso mamoe kiva vita sa mamoe la nani ve aru voa arireai faraita fefeare.

³³ Are mamoe la areve mai toare voa vipai roi, a—, nani areve mai ava voa.

³⁴ Soka King areve mai toare voa pepeita karu la mō ari roi, Kotiria, arave Oa sa lei lareva leita karu e, mearovaeka la pisosipe soa voa e vei kekese leita basileia la ovaia.

³⁵ Ipi ara eroa sa’ meiape, a—, e larietau araro miaraiape, ara kōvōre‐tolo lei meiape, aea e ma ara lari vei miaraiape. Ara oti haria karu lei meiape aea e araro maeafukapaiape;

³⁶ ara maea paseare lei meiape aea e puta araro mopaiape; ara eka lei meiape, aea e araro tai kotiape; ara dibura uvi voa peiape, aea e araro tai foreraiape.

³⁷ Lea mea haura karu tava o arero mō ari roi, Papuvita e, ela aro eroa sa’ meiape la leasauka eovi, aro savuaiape? Aea kōvōre‐tolo aea ma a lari vei miaraiape?

³⁸ Aea ela aro oti haria karu lei meiape la aro leasauka eovi aro maeafukapaiape? Aea maea paseare aea puta aro mopaiape?

³⁹ Aea ela aro eka lei, ō dibura uvi voa sasauka meiape la leasauka eovi aro tai foreraiape?

⁴⁰ Soka King tava o erero mō ari roi, Okofa ara ero o la moi, e arave mariosu titi, aite hahera la leiape, e araro ta lōri leiape reha.

⁴¹ Soka are areve mai ava voa pepeita lea karu la mō ari roi, Kaiae rare arita karu e, araro kiripi, Diabolo aea areve aneru ita vei kekese lei sasoita a voa teraia.

⁴² Ipi ara eroa sa sa’ meiape, a—, larietau ara lari vei e miarai kasirau; ara kōvōre‐tolo lei meiape, a—, ma ara lari vei e miarai kasirau.

⁴³ Ara oti haria karu lei meiape, a—, e araro maeafukapai kasirau; maea paseare lei meiape, a—, puta araro miarai kasirau; eka lei meiape aea dibura uvi voa sasauka peiape, a—, e araro tai ta forerai kasirau.

⁴⁴ Soka ere ta tava o arero mō ari roi, Papuvita e, ela aro eroa ita, aea kavōre‐tolo ita, aea oti haria karu lei, aea paseare ita, aea eka ita, aea dibura uvi voa sasauka lōri meiape la ofae leasauka eovi, aro maeaforoe leiti auke leipe?

⁴⁵ Are tava o mōri moi roi, Okofa ara ero o la moi, ipi e mea karu seika kofa farakeka aea la leiti auke leipe lea vei, e araro ta lōri leiti kasirau.

⁴⁶ Soka mea karu soa sarapai auke lei peita makuri voa terai roi.