Mataio 22 - Testamenta Áre 1983 (Toaripi PNG)

Parabole o ipi ua laeaita sosoka vei

¹ Iesu parabole o ata topiari erero mō ōpe,

² Kauri ve basileia are usoso eva‐e sosoka la areve atute vei leipe lea lohio karu rovaea feare.

³ Are areve sarufa karu la itapi sosoka lari vei o moipe lea karu la koti o moi vei, a—, ere koti haiarara leipe.

⁴ Soka are sarufa karu haria la ata itapi mō ōpe, Sosoka lari vei o moia lea karu la mō moia, Mapaia, arave larietau roroka loita meha, arave boromakao aea tapare leiti vei savuaita animala ita la savi, aea etau foromai kekese lei laisisea; eva‐e sosoka vei kotiria.

⁵ A—, ere haiarara lei, maea lei, farakeka areve forōva oti voa kavōpe, farakeka aea areve tivi oti voa terōpe.

⁶ Lea karu hohoi hea areve sarufa karu la sukafori ivara eokere ita erero toa paeōpe.

⁷ Soka lea lohio karu kitou lei, areve maola karu firu itapi aea areve sarufa la paeōpe karu la saroroapi, ereve karikara ta a sa vifaipe.

⁸ Aite are areve sarufa karu la mō ōpe, Eva‐e sosoka kekese loita meha, a—, omopa isaia lea karu ere lareva kao.

⁹ Otiharo lakalaka voa teraia, aea e eavaita lea karu foromai eva‐e sosoka voa koti vei o moia.

¹⁰ Lō mei, lea sarufa karu maria otiharo voa te ere eavaiape karu foromai, lareva ita maealolo ita la kokoruka, eva‐e sosoka ve avai oti foromai soōpe reha.

¹¹ Soka lea lohio karu sosoka lari karu la ofae eavai vei oropōpe lea mea, are eva‐e sosoka puta mopai auke karu farakeka la lōvoa ofae eavōpe.

¹² Eovi are arero mō ōpe, Moraitai e, a eva‐e sosoka puta mopai auke lei a mōvoa leafeare lei oropai? A—, lea karu ape o forerai kasirau.

¹³ Soka lea lohio karu sarufa karu la mō ōpe, Arero mora ita mai ita fasi, arero maria murumuru voa toapaia; lōvoa ere fi a’ a’, tao ta karekare ari roi.

¹⁴ Ipi rauapo la koti vei isaitore, a—, haikaea maravaita karu fafareso sa haria.

Kaisara la miaraita takis moni

¹⁵ Soka Farisea karu hea te laua seseōvai vei, ere areve laua sa fitōva feare feravi arero paeai vei.

¹⁶ Aea ere ereve satiriaraita karu, Heroda ve firu karu hea ita la Iesu tai itapi mō ōpe, Satiriaraita papuvita e, ela ore a okofa vita, aea Ualare sa haikaeaita mai la okofa ita la satiriara vovea, a karu sa aro leita mai ve eite la seseōvai sore, aeata a karu ve soso o ari sore.

¹⁷ Soka elaro o moia, mai haura leavoa? Takis moni Kaisara la miaraita haura ei, ō haura kao ei?

¹⁸ A—, Iesu ereve haiiri maealolo la ore lei, mō ōpe, Aiera‐aiera karu e, e araro seseōvaipeta ipi levea?

¹⁹ Takis moni koru aea la araro muiaia. Lō mei ere silva moni koru farakeka la arero tai ovitipe.

²⁰ Soka are erero mō ōpe, Mea ove ita karoro ita leive? Ere arero mō ōpe, Kaisara ve.

²¹ Soka are erero mō ōpe, Kaisara ve etau Kaisara la miaraia, aea Ualare ve etau ta Ualare la miaraia.

²² Ere areve lea o la mapi, haihava lei, arero kiripi terōpe.

Opi ata itoita soa vei

²³ Lea sare voa Sadukea karu, opi ata levi itoi o la satiriaraita lea karu hea, ere arero tai foreri arero lalasi lei mō ōpe,

²⁴ Satiriaraita papuvita e, Mose mō ōpe, Karu aea, atutemori auke ita opaita, a—, areve marehari areve ua lelesi la laeaia, mere la lei epi areve paua ve rare ari vei.

²⁵ Ela voa paua ita maraiosu ita seven pepeiape. Omopa paua ua laea pepe opōpe, aea ipi are atutemori auke eavia, are areve ua lelesi areve marehari sa laeai vei kiripōpe.

²⁶ Aite vita ta lōfeare, aea aite kofa vita ta lōfeare lei lei tetete seven voa.

²⁷ Aite kofa voa lea ua ta opōpe.

²⁸ Soka opi ata itoita soa voa lea karu seven voa arero leisa ovai roi? Ipi ere foromai arero laeaiape eavia.

²⁹ Iesu tava o erero mō ōpe. E eve haiiri voa eae seseōvaipea, ipi e Safu Karoro ore kao, aea Ualare ve siahu ta haveva.

³⁰ Ipi karu opi ata itoita soa voa, ere ua ita vitaita levi laeai roi, a—, ere usoso kauri ve aneru fefeare lei pepeava roi.

³¹ A—, ipi opi ata itoita mai vei, e Ualare sa ero moipe o la muti sore ei? Ualare ve o meha.

³² Ara Abrahama ve Ualare, aea Isako ve Ualare, aea Iakobo ve Ualare. Lea o ve eite lea karu ere makuri, ipi are opaita karu ve Ualare kao, a—, makuri karu ve Ualare.

³³ Soka karu sitavu lea o la mapi, ere areve satiriaraita o vei haihava leipe.

Toare Safu O vei

³⁴ Soka Farisea karu Iesu sa Sadukea karu ve o la sapataipe fari la mapōpe lea mea, ere kokoruka,

³⁵ aea ere voa, Safu O la ore vita farakeka arero vuteai vei lalasi mō leipe,

³⁶ Satiriaraita papuvita e, Safu O rovaeka leafeare?

³⁷ Iesu arero mō ōpe, A Iehova ave Ualare la ave haiiri foromai ita aea ave haikaeaita haiiri foromai ita, aea ave ore leita haiiri foromai ita arero haikakare arai vei.

³⁸ Safu O rovaeka reha aeata toare safu o.

³⁹ Aite safu o are ta lōfeare, A ave haekao peita karu la usoso ave elore maea feare haikakare araia.

⁴⁰ Lea Safu O oraka voa, safu o foromai aeata peroveta o foromai topiari sisea vovea.

Lalasi o ipi Davida ve Atute vei

⁴¹ Soka Farisea karu kokorukōpe lea mea, Iesu erero lalasi mō leipe,

⁴² E Keriso vei eve haiiri leafeare seseōvaipea? Are leive atute?

⁴³ Ere arero mō ōpe, Davida ve. Are erero mō ōpe, Soka ipi levea Davida Arahoha ita arero rare Papuvita rare aravi, mō ōpe,

⁴⁴ Papuvita Iehova are arave Papuvita la mō ōpe, Arave mai toare voa avaia tetete ara ave ote karu la ovi, ave mora posa ve ora voa miavai ao.

⁴⁵ Soka Davida arero Papuvita rare aravaita, a—, are areve atute leafeare leitita ore ei?

⁴⁶ Soka karu farakeka aea arero tava o moita ore kao; aea lea sare ve aite voa karu aea arero lalasi o aeata omoi vei ivara leiti kasirau.