Mataio 2 - Testamenta Áre 1983 (Toaripi PNG)

Magi karu Iesu tai forerōpe

¹ Soka Iesu Betelehema, Iudea soa voa epōpe, King Heroda ve soa ve sare voa; lea mea Magi Karu mairimairi soa la kiripi, Ierusalema voa isei foreri mō ōpe,

² Iuda karu ve king la leavoa epaita? Ipi ela mairimairi itai voa areve koru la ofae eovi, ela mōvoa arero taivotai vei koti la roroa meha.

³ Heroda lea o la mapi haiiri kapekapeōpe, aea Ierusalema karikara karu foromai ta meha.

⁴ Are karu ve maso harofave karu foromai aea Safu Karoro ore karu ita la kokoruka, erero lalasi mō leipe, Keriso la leavoa epai roi?

⁵ Lei, ere arero tava o mō ōpe, Betelehema Iudea voa, ipi peroveta karu sa uka siseita o meha:

⁶ Ao, Betelehema e, Iudea mea voa, Iudea ve lohio karu ve aru voa a foromai seika kao; ipi a voa lariōvaita harofave vita forerai roi, are arave toruipi karu Israela la kiva leiti roi.

⁷ Lea mea Heroda Magi karu la murufa isa koti, koru la leasauka eavaita o ere voa haisukafori mapōpe.

⁸ Mapi are erero Betelehema voa mō mei itapōpe, Isei atute seika la metakao elia, aea e arero eavai oria, araro ta satiriaraia, ara ta isei arero taivotai vei.

⁹ Ere king ve o la mapi roroka lei, ere maea lei ata isaipe; aea ere oarehōva mairimairi soa voa eavōpe, lea koru ereve omopa voa isaiape, isei isei atute seika sa eaeiape oti arori voa isei avōpe.

¹⁰ Ere koru la ofae eavōpe lea mea, ere hailareva foromai leipe.

¹¹ Ere uvi voa oropi, atute seika areve lou Maria ita la ofae eovi, ere sukakoka avi hiopi arero maeatipe. Aite ere ereve etauroro la felaukea, ereve meru gold, aea muforoe etau, ivuru aea hore ita arero omopa posaseōpe reha.

¹² Soka Ualare sa erero auka o mei ere Heroda tai levi ata kerori vei; lea mea ere otiharo haria voa ereve elore mea voa ata kavōpe.

Iosefa auka Maria ita Iesu la ovi Egupto voa soeōpe

¹³ Soka ere sa maea lei kavōpe lea mea, Papuvita ve aneru Iosefa tai foreri, auka o mō moipe, Itoia, atute seika areve lou ita la lariōvi soea, Egupto voa isei, lōvoa pavaia pepepe ara aro omoita soa voa; ipi Heroda atute seika la eli paeai vei la roi.

¹⁴ Soka are itei atute seika areve lou ita la lariōvi Egupto voa isei,

¹⁵ lōvoa pavōpe pepe Heroda sa opōpe soa voa. Papuvita ve o, peroveta karu sa moipe lea o la lōfeare voa okofa lei mō ōpe, Ara arave Atute la Egupto kiripi koti vei isōpe.

Heroda Betelehema siaresi kaekae la paeōpe

¹⁶ Soka Magi karu arero apeva vuteōpe lea la Heroda ore lei kitou foromai lei, Betelehema aea haekao karikara karikara ita voa pepeiape siaresi kaekae foromai la paeai vei itapōpe, aea soa sisoro orakoria, aea mō faukōpe soa voa, are Magi karu voa mapōpe lea soa ve savori feare voa lea siarese kaekae la paeaiape.

¹⁷ Lea mea peroveta Ieremia sa mōri moipe o la lei okofa leipe:

¹⁸ Fi Rama voa mapōpe, fi ōsa, fi o rauapo ita savoiape. Rahela areve atutemori vei fi a’ a’, vovoro leiti vei haiarara leipe, ipi ere kasirauri leipe eavia.

Iosefa auka Maria ita Iesu la ovi Nasareta voa ata keroripe

¹⁹ Soka Heroda opōpe lea mea Papuvita ve aneru Iosefa tai Egupto voa foreri auka o mō moipe,

²⁰ Itoia, atute seika areve lou ita la lariōvi Israela ve mea voa kavaia, ipi atute seika ve makuri la paeai vei eliape lea karu opaita.

²¹ Soka are itei, atute seika areve lou ita la Israela ve mea voa lariōvi kavōpe reha.

²² Akelausa areve oa ve ipaisa lei, Iudea voa king leipe fari la Iosefa sa mapi, are lōvoa kavai vei tore leipe. Soka Ualare arero auka o mei, are Galilea ve soa voa kei, karikara rare Nasareta voa pavōpe.

²³ Lōfeare ipi peroveta karu sa mōri moipe o la lei okofa leiti vei, are rare Nasarene karu rare la aravai roi.