Mataio 19 - Testamenta Áre 1983 (Toaripi PNG)

Ua la kiripaita mai vei

¹ Soka Iesu lea o la mei mei kaleipe lea mea, are maea lei Galilea kiripi, Iudea ve mea Ioridana itai voa ufi,

² karu sitavu sitavu arero aitetei roroa, aea are ereve eka karu la lōvoa lei lareva leiape.

³ Soka Farisea karu hea arero tai foreri, arero seseōvai vei mō ōpe, Ipi hariaharia foromai ita vei karu areve ua la kiripaita safu usoso ei?

⁴ Are tava o erero mō ōpe, Mearovaeka la pisosipe Ualare lea oarehōva soa kofa voa ereukaro vita ita ua ita la pisosipe, e lea o la muti ore ei?

⁵ Are ta mō ōpe, Ipi lea etau vei vita areve oa ita lou ita la kiripi, areve ua la pasaeai roi; aea ereuka maeasarōva farakeka loita reha.

⁶ Soka ereuka orakoria kao, a—, maeasarōva farakeka. Ualare sa topiaraita lea etau la karu aea sa levi faeaia.

⁷ Ere arero mō ōpe, Ipi levea Mose safu o mōfeare moipe, vita ua la kiripaita karoro ukai ao, aite are ua la lōri kiripaia?

⁸ Are erero mō ōpe, Mose, e ua la kiripaita lea mai la kakeva leipe ipi eve haiiri kere eavia, a—, oarehōva kofa soa voa lōfeare kao.

⁹ Ara ero o la moi, areve ua la karu sa torea leiti auke ita kiripi, ua aea la laeaita lea vita are ua torea mai la loita reha.

¹⁰ Areve satiriaraita karu arero mō ōpe, Karu sa areve ua la kiripaita safu, mai lōfeare leitita, a—, mai lareva meha, ua levi laeaia.

¹¹ A—, are erero mō ōpe, Karu foromai mea o la ovaita usoso kao, a—, Ualare sa erero miaraita lea karu sa haria.

¹² Maea mitutu karu ia, ere ereve lou ve ére voa lōri forerōpe; maea mitutu karu hea ta ia, karu sa erero lei maea mitutu leiape, karu hea ta ia, ua laeai auke leitita ipi kauri ve basileia vei. Mea o la ovaita ore karu sa arero ovai roi.

Iesu atutemori la o sa lei lareva leipe

¹³ Soka karu hea atutemori arero tai lariōvi forerōpe, are areve mai ere voa mopi Ualare la ere vei loki leiti vei; a—, satiriaraita karu erero o erere ōpe.

¹⁴ A—, Iesu mō ōpe, Atutemori rapi ere roroa, ere araro tai koti vei erero o erere levi aria; ipi kauri ve basileia ve karu ere fefeare.

¹⁵ Aite are areve mai ere voa mopi mopi roroka lei, are lōvoa kiripi maea lei terōpe.

Pisoso rovaea vita la moipe o

¹⁶ Soka karu farakeka aea arero tai foreri mō ōpe, Satiriaraita papuvita e, ara etau lareva lekōru la lei ara peita makuri ovai vei?

¹⁷ Are arero mō ōpe, A etau lareva vei araro lalasi leipeta ipi levea? Farakeka haria lareva. A—, a peita makuri voa oropai haikaeai oria, a—, safu o la mapi kiva leitia.

¹⁸ Lō mei are arero mō ōpe, Leafeare safu o? Iesu mō ōpe, Mōfefeare, a karu levi paeaia, a ua torea levi leitia, a etau torea levi leitia, a havara apeva levi paraeaia;

¹⁹ ave oa ave lou ita la maeaforoe lei taivotaia, aea ave haekao peita karu la ave elore maea feare maeaforoe leitia.

²⁰ Lea harokou arero mō ōpe, Lea safu o foromai la ara mapa vovea. Ara leiti auke etau aea larelekōru?

²¹ Iesu arero mō ōpe, A haura kofa leiti haikaeai oria, ave ovi meita etau etau la itaea lei miōri miōri, ereve tava la ovi merava karu la aioraia; a pisoso kauri voa lōri ovai roi; aite araro aitetei kotiria.

²² A—, lea harokou lea o la mapi, are haieae foromai ita terōpe; ipi are pisoso rovaea vita eavia.

²³ Soka Iesu areve satiriaraita karu la mō ōpe, Okofa ara ero omoi, Pisoso rovaea karu ere kauri ve basileia voa oropaita heafo foromai rovaea kofa lei vovea.

²⁴ Ara mea o ta ero la moi, Nila kōvi ve uta voa kamela sa oropaita taheka mafu maea feare, a—, pisoso karu sa kauri ve basileia voa oropaita, heafo foromai rovaea kofa.

²⁵ Soka satiriaraita karu lea o la mapi haihava lei mō ōpe, Aita! leiro lei makuri leiti roi ei?

²⁶ Iesu erero ofae ruri mō ōpe, Mea etau la karu sa leitita usoso kakaeite, a—, Ualare sa etau foromai la leitita ore.

²⁷ Soka Petero tava o arero mō ōpe, Ofae eavaia, ela etau foromai la kiripi aro aitetai vovo la roroa; soka ela tava lekōru la ovai roi?

²⁸ Iesu erero mō ōpe, Okofa ara ero o la moi, etau etau la lei áre lei foreri, Karu ve Atute sa areve sosorusosoru ve terona voa avaita lea mea, e araro aitetaita karu ta terona twelve voa avi, Israela ve toruipi‐ipi twelve la seseōvi tava miarai roi.

²⁹ O aeata meha, uvi ei, a—, maraiosu ei, a—, uarosu ei, a—, oa ei, a—, lou ei, a—, atutemori ei, a—, hasu ei, arave rare vei kiripaita lea karu, tava 100 soa maravi, aeata peita makuri ta ovai roi.

³⁰ A—, omopa kofa voa pepeita karu, aite kofa voa leiti roi, aeata aite kofa karu ere omopa kofa leiti roi.