Mataio 17 - Testamenta Áre 1983 (Toaripi PNG)

Iesu ve maea toarōrisa maea haria leipe

¹ Soka sare six ve aite voa Iesu are Petero aea Iakobo aea areve marehari Ioane ita la lariōvi, are ita fareho murufakao raepa koa arori voa pataipe.

² Patei areve maea ereve omopa voa toarōrisa maea haria leipe; areve soso sare feare sosorusosoru lei, areve puta usoso ovava feare haea seasea‐eite leipe.

³ Aeata Mose auka Elia ita erero tai forera, ereuka are ita farehoria laua sukavaiape.

⁴ Sukōvi sukōvi, Petero Iesu la mō moipe, Ereita mōvoa roroaita lareva; a haikaeai oria, ara harotōvu oroisoria mōvoa safai roi, farakeka a vei, farakeka aea Mose vei, farakeka aea Elia vei.

⁵ Are o lō moipe soa, mea‐e ovava sosorusosoru erero aieri, aea o mea‐e voa forera mō moipe reha, Arave haikakare araita Atute meha; ara are vei hailareva leititore; arero mapaia.

⁶ Soka satiriaraita karu lea o la mapi, ere soso mea voa sosorokapi putei, tore foromai leipe.

⁷ A—, Iesu erero tai koti mai sa mōpi, mō ōpe, Itotea, tore levi leitia.

⁸ Soka ere ereve ofae moravi, karu aea la ofae eavai kasirau, a—, Iesu sa haria.

⁹ Ere raepa voa fafukōpe soa, are erero o erere a’ mō ōpe, E sa ofae eavaita lea etau la karu farakeka aea la levi moi vei tetete Karu ve Atute sa opi ata itoi roi.

¹⁰ Soka satiriaraita karu arero lalasi mō leipe, Ipi levea Safu Karoro ore karu o mōfeare aritore, Elia omopa koti ao?

¹¹ Are tava o erero mō ōpe, Okofa, Elia omopa koti, etau foromai la lei áre leiti roi.

¹² A—, ara ero o mō la moi, Elia evera kotipe, a—, ere arero ore leiti kasirau, aea ere haikaeaiape lea mai la ere arero leipe reha. Soka Karu ve Atute ta lōfeare hehea ere voa ovai roi.

¹³ Lea mea satiriaraita karu ore leipe reha, areve o ve ipi Ioane Bapatiso leita Vita vei.

Harisu sa toōpe siare

¹⁴ Soka ere karu sitavu tai forerōpe lea mea, heavita farakeka aea arero tai koti, sukakoka avi mō ōpe,

¹⁵ Papuvita e, arave atute la rapi maeaforoe leitia; ipi are maea opaopa lei aea hehea maealolo lei, lei vovo mea vovea; are a iri voa haelarehaelare putoi vovea, aea ma iri voa ta haelarehaelare oai vovea.

¹⁶ Ara arero ave satiriaraita karu tai lariōvai, a—, ere arero lei lareva leiti vei usoso kao.

¹⁷ Iesu tava o mei mō ōpe, E sukaerereai auke lei aea ōvafae kere leita taotao e, ara e ita fareho soa savori leafeare meava roi? Ara soa savori leafeare ero morari vovo meava roi? Arero araro tai mōvoa lariōvi kotia.

¹⁸ Soka Iesu harisu la o haiiri a’, aea are lea siare la kiripi forerōpe; lea ora kofa voa lea siare la lei lareva leipe.

¹⁹ Aite areve satiriaraita karu arero tai murafa koti mō ōpe, Ela arero larivataita ore auke loita ipi lekōru?

²⁰ Aea are erero mō ōpe, Ipi e sukaerereai seika eavia; ipi ara okofa ero o la moi, E usoso sinapi mere farekeka ve rovaea feare sukaerereai oria, a—, e mea raepa la mō arita, Mea oti kiripi kikia lōvoa teraia, a—, are terai roi; aea e etau foromai la lōri leiti vei usoso leiti roi.

²¹ A—, lōfeare harisu la larivataita ore kao, a—, Ualare la loki lei, larietau avoha leita lōfeare sa haria larivaitaita ore.

Iesu areve opi ata itoi soa vei o ata moipe

²² Soka satiriaraita karu Galilea voa kokoruka roroaiape lea mea, Iesu erero mō ōpe, Karu ve Atute la karu ve mai voa miōri,

²³ ere arero paeai roi, a—, oroisoria sare voa are ata itoi roi. Lō mei ere haiiri foromai tu ōpe.

Maso uvi ve takis moni

²⁴ Soka ere Kaperanauma voa forerōpe soa, maso uvi ve takis fareovaita karu Petero tai koti mō ōpe, Eve lea satiriaraita papuvita maso uvi ve takis moni miara vovea ei?

²⁵ Are mō ōpe, A. Soka are uvi iri voa oropi, Iesu sa o everori arero mei mō ōpe, Simona e, ave haiiri leafeare? Mearovaeka ve papukoru etauroro ve takis aea maea ve takis la lei voa ovai roi, ereve elore karu voa ei? a—, toruipi haria karu voa ei?

²⁶ Soka Petero tava o toruipi haria karu voa o moipe lea mea, Iesu arero mō ōpe, Soka ereve elore karu levi miarai roi.

²⁷ A—, ipi elaka erero lei haiiri heafo leiti ave, a sitoi voa fauka farōva lōvoa paraeaia; aea a omopa fareovaita ekaka la ovi, areve ape fapi, a silva moni koru farakeka la lōvoa eavai roi. Ovaia aea lea moni elaka vei erero miaraia.