Mataio 16 - Testamenta Áre 1983 (Toaripi PNG)

Farisea karu aea Sadukea karu peise haikaeōpe

¹ Soka Farisea karu aea Sadukea karu arero tai koti, kauri voa foreraita peise erero muiai vei lalasi leipe ipi arero seseōvai vei.

² A—, are tava o erero mō ōpe, Mea aeai soa e mō aritore, Mea lareva leiti roi ipi kauri ovo seseai.

³ Aea mea ōpai soa e mō aritore, Mea kapekapeai roi ipi kauri ovo sesea aea mea ta tavutavu loi. E kauri ve soso la seseōvaita ore, a—, e mea soa la seseōvi ore leitita usoso kasirau.

⁴ Kaiae aea Ualare la haiarara leita taotao karu peise haikaeai vōvea; a—, peise erero levi muiai roi, a—, Iona ve lea peise sa haria. Lō mei are erero kiripi terōpe.

Satiriaraita karu ve horahora

⁵ Soka areve satiriaraita karu sitoi itai voa ufi pavōpe soa ere faloa koru ita ovi ufai haisafōpe.

⁶ Iesu erero mō ōpe, Mapaia, e Farisea karu aea Sadukea karu ita ve faloa fefesita etau vei kiva kofa lei vovo roroava.

⁷ Lō mei, ere lea o elore elore laua mō seseōvōpe, Lea o ve ipi ereita faloa ovi fosi auke loita eavia.

⁸ A—, Iesu ereve lea o la ore lei, erero mō ōpe, E sukaerereai seika karu e, e faloa auke vei laua elore elore seseōvaipeta ipi levea?

⁹ E haiiri ovava leiti kao ei? E lea karu 5,000 ve faloa korukoru five aea e larietau hohoi posea leafere fareovaita, e haisafai ei?

¹⁰ Aeata karu 4,000 ve faloa korukoru seven, aea e larietau hohoi posea leafere fareovaita, e lea ta haisafai ei?

¹¹ E haiiri ovava leitia kao ei? Ara ero faloa vei laua sukavaia kao, a—, e Farisea karu aea Sadukea karu ve faloa fefesita etau vei kiva lei vovo roroava.

¹² Lea mea ere ore leipe are o faloa fefesita etau kiva lei roroai vei moi kao, a—, Farisea karu aea Sadukea karu sa satiriaraita lea o vei.

Iesu are Keriso, Ualare ve Atute

¹³ Soka Iesu Kaisara Filipi karikara ve mea voa kei foreri, are areve satiriaraita karu la lalasi lei mō ōpe, Karu ara vei leafeare moitore, Karu ve Atute eite leisa?

¹⁴ Ere mō ōpe, Hea Ioane Bapatiso leita Vita, hea Elia, hea ta Ieremia ō peroveta vita farakeka aea.

¹⁵ Soka are erero mō ōpe, A—, eo, e ara vei lea’ moitore, ara leisa?

¹⁶ Petero tava o arero mō ōpe, A Keriso, makuri lei vovo meita Ualare ve Atute.

¹⁷ Iesu tava o arero mō ōpe, Simona, Iona ve atute e, a lareva ia, ipi maeasarōva aea ovo ita sa lea etau aro satiriarai kao, a—, arave kauri voa peita Oa sa haria.

¹⁸ Ara mea o ta aro moi, A Petero reha, aea ara arave ekalesia ve ipi mea fave ve arori voa turi moravai roi, aea Opai Karikara ve otiape‐ape sa arero levi ovi aierai roi.

¹⁹ Ara kauri ve basileia ve ki aro miarai roi, a mearovaeka voa fasaita lea etau, kauri voa ta fasai roi, aea a mearovaeka voa felaukea paraeaita lea etau, kauri voa ta felaukea paraeai roi.

²⁰ Are areve satiriaraita karu la o erere ōpe, ere are Keriso lea o karu aea la levi moi vei.

Iesu ve oarehōva o ipi areve opi ata itoi soa vei

²¹ Soka lea soa Iesu areve satiriaraita karu la satiriaraiape ipi are Ierusalema voa patei, haisora rauapo opasora‐sora aea maso harofave karu aea Safu Karoro ore karu ita sa arero lei, arero paea opi, aea oroisoria sare voa are ata itoi roi.

²² Lō mei Petero arero mai sa totorea, arero o erere kere ita a’ mō ōpe, Maeaforoe‐o! Papuvita e, lōfeare mai a voa levi leitia.

²³ A—, are kerori Petero la mō ōpe, Arave aite voa pavaia, Satani e; araro feravi putoita etau a reha, ipi ave seseōvaipeta haiiri Ualare ve haiiri kao, a—, karu vei.

²⁴ Aite Iesu areve satiriaraita karu la mō ōpe, Karu aea araro aitetai haikaeai oria, are areve elore maea la haiarara lei, areve satauro la taiovi, araro lōri aitetaia.

²⁵ Ipi areve makuri la kiva leiti haikaeaita lea karu ve makuri la lei veverapai roi, a—, areve makuri la lei ara vei veverapaita lea vita makuri la ovai roi.

²⁶ Karu aea mearovaeka foromai la ovaita, a—, areve makuri veverapaita, lea etau are vei lareva lekōru? Ipi areve makuri vei, karu tava lekōru la itaea lei miarai roi?

²⁷ Ipi Karu ve Atute areve Oa ve sosorusosoru areve aneru ita fareho koti vei la roi, aea lea soa are usoso ere lei roroaita lea mai vei lōfeare ve tava karu foromai la elore elore miarai roi.

²⁸ Ara ero okofa o la moi, Mōvoa pepeipeta karu hea levi opai roi, pepepe Karu ve Atute areve basileia sa siahu ita foreraita la ere ofae eavai roi.