Mataio 12 - Testamenta Áre 1983 (Toaripi PNG)

Uiti forōva oti Sabati sare voa

¹ Lea soa voa Iesu Sabati sare aea voa uiti forōva otioti ve aru voa terōpe. Areve satiriaraita karu eroa sa’, uiti fare la rurua lalape.

² Soka Farisea karu lea la ofae eovi arero mō ōpe, Ofae eavaia, ave satiriaraita karu Sabati sare voa safu leita lea mai la la leipea.

³ Lō mei, are erero mō ōpe, E Davida sa leipe lea mai ve fari muti sore ei, are aea are ita fareho roroaiape karu eroa sōpe lea mea?

⁴ Are Ualare ve uvi voa oropi, omopa pasaseaita faloa la ovi lōpe, eite lea faloa are aea are ita fareho roroaiape karu sa lari vei safu, a—, maso tivi karu sa haria.

⁵ Aea e Safu Buka voa muti kao ei, ipi maso tivi karu Maso Uvi voa Sabati sare hasiava vovea, a—, ere kaiae kasirau.

⁶ Ara ero o mō la moi, Farakeka mōvoa laipea, areve eite Maso Uvi ve eite la sapatai.

⁷ Safu Buka voa o mō uka laisisea, Ara e sa maeaforoe leiti vei haikaeaipea a—, maso etau la savi omopa posaseai vei kasirau, E lea o ve eite ore leitita, a—, e kaiae auke karu la kaiae o levi ari lare.

⁸ Ipi Karu ve Atute are Sabati sare ve Papuvita.

Mai hōru sisapōpe vita

⁹ Are lea oti kiripi ereve sunako uvi iri voa oropōpe.

¹⁰ Mai hōru sisapōpe karu aea lōvoa aiseseiape. Soka ere arero lalasi mō leipe, Eka karu la Sabati sare voa lei lareva leitita mai haura ei? Lea o ve ipi ere arero havara paraeai vei.

¹¹ Lei are erero mō ōpe, E voa karu leisa, are mamoe farakeka ia, aea lea mamoe Sabati sare voa mea‐uta voa oaita, a—, are arero mai sa aruovi patai roi ei?

¹² Soka karu ve eite mamoe ve eite foromai la sapatai ei? Lea vei eka karu la Sabati sare voa lei lareva leita lea mai haura.

¹³ Lō mei, are lea vita la mō ōpe, Ave mai sosoropaia. Are mai sosoropi, lareva lei itai feare leipe.

¹⁴ Soka Farisea karu maria voa te, are vei laua elore elore seseōvōpe, ere arero lea’ lei paeai vei.

¹⁵ Iesu lea la ore lei, lōvoa kiripi terōpe. Karu rauapo arero aitetei vovo roroaiape, aea are ere foromai ve eka la lei lareva leiape.

¹⁶ Are erero o erere a’ ere areve fari la levi fafarapai vei.

¹⁷ Ipi peroveta Isaia sa moipe mea o la lei okofa leiti vei,

¹⁸ Ofae eavaia, ara haikaea ovaita arave sarufa meha, Ara haikakare araita vita, arave ove are voa hailareva lei, lei vovo mea vovea. Ara arave Arahoha are voa vipi, are haura leita o la torutoru karu la itoro ari roi.

¹⁹ Are o serea a’ ape rovaea ita isa levi moi roi, aea areve o ape karikara pisiri voa karu sa levi mapai roi.

²⁰ Puaveaita sirivo la are levi taukai roi, are a akoela sasoita lamepa uiki la levi lei futai roi, tetete are haura leita mai la ovi aierai vei lei forerai roi;

²¹ aea areve rare voa toruipi hariaharia karu sa haikaea roroava roi.

Farisea karu ve o maealolo

²² Lea mea ere harisu sa toōpe ofae kuku aea okuku karu farakeka aea la arero tai lariōvi, are arero lei lareva leipe; lea vei lea okuku karu laua sukōvi ofae eavōpe reha.

²³ Lea karu sitavu foromai haihava lei mō ōpe, Mea vita Davida ve Atute varo?

²⁴ A—, Farisea karu lea fari la mapi mō ōpe, Lea vita harisu ve harofave vita, Beelsebulo ita harisu la larivata vovea.

²⁵ Iesu ereve seseōvaita haiiri la ore lei, erero mō ōpe, Tofei itai itai leitita lea basileia foromai la saroroapai roi, aea karikara varo, uvi karu varo, tofei haiiri hariaharia leitit’ oria, ere ta tofukavi levi peava roi.

²⁶ Aea Satani ta tofei itai itai elore elore toaita, a—, areve basileia leafeare lei pavai roi?

²⁷ A—, ara Beelsebulo ve siahu ita harisu la larivataita, a—, eve elore karu sa leive siahu ita erero larivataitore ei? Lea vei lea karu sa ero seseōvi tava miarai roi.

²⁸ A—, ara Ualare ve Arahoha ita harisu la larivataita, a—, Ualare ve basileia ero tai lōfeare vei foreri laepea.

²⁹ Karu aea are rofo vita aea ve uvi lea’ lei oropi, areve etauroro la torea lei fareovai vei ei? Are rofo vita la evera fasai ao; aite are areve uvi voa etauroro la torea lōri lei fareovaita ore.

³⁰ Ara ita fareho toari mei auke leitita lea karu araro sukavutea vovea, aea ara ita fareho kokorukai auke leitita lea karu, mamoe la liōvea fu ō vovea.

³¹ Lea vei ara ero o mō la moi, karu sa leita kaiae hariaharia foromai ve tava, aea ere moita kaiae o foromai ita ve tava la sasuka mutapai roi; a—, Safu Arahoha Lareva la o kaiae arita lea karu ve kaiae tava la levi sasuka mutapai peava roi.

³² Karu ve Atute la o kaiae arita lea karu ve kaiae tava la sasuka mutapai roi; a—, Safu Arahoha la o kaiae arita lea karu ve kaiae tava la levi sasuka mutapai roi, mea makuri ve soa voa, aea aite voa foreraita soa voa ta reha.

³³ Tola aea areve fare ita la lei lareva leitia, ō tola aea areve fare ita la lei maealolo leitia; ipi tola areve fare sa lei ore leititore.

³⁴ Ikaroa ve atutemori e, e maealolo la lei, etau lareva vei laua leafeare sukavaita ore? Ipi areve haiiri ve soōpe etau voa, ape sa lea etau la ovi laua lōri sukōva vovea.

³⁵ Karu lareva areve toeaita etau lareva voa, etau lareva la fareōva vovea; a—, karu maealolo areve toeaita etau maealolo voa, etau maealolo la fareōva vovea.

³⁶ Ara ero omoi, karu sa omoita lea o merava foromai vei, ere seseōvi tava miaraita sare voa lea o ve eite seseōvi tava ovai roi.

³⁷ Ipi ave o sa aro haura leiti roi, aea ave o sa aro kaiae leiti roi.

Laua ipi peise vei

³⁸ Soka Safu Karoro ore karu aea Farisea karu hea arero mō ōpe, Satiriaraita papuvita e, ela peise a voa ofae eavai vei haikaeaipea.

³⁹ A—, are tava o erero mō ōpe, Kaiae aea Ualare la haiarara leita taotao karu peise haikaeai vovea, a—, peise erero levi muiai roi, a—, peroveta Iona ve lea peise sa haria.

⁴⁰ Ipi usoso Iona ekaka rovaeka ve ére voa sare oroisoria aea faita oroisoria aiseseiape lōfeare, Karu ve Atute la mearovaeka ve iri voa sare oroisoria aea faita oroisoria eaeava roi.

⁴¹ Nineva ve karu seseōvaita sare voa mea taotao karu ita fareho soi popōvi erero kaiae la pisiri muiai roi; ipi Iona sa itoro ōpe lea mea ere haiiri keroripe, a—, ofae eavaia, Iona ve arori vita mōvoa la mea.

⁴² Diho ve pukari ua mea taotao karu ita fareho soi pōvi ereve kaiae la pisiri muiai roi; ipi are mearovaeka ve itua‐tao kiripi koti forerōpe, Solomono ve haiororo o la mapai vei, a—, mapaia, Solomono ve arori vita mōvoa la mea.

⁴³ Harisu maeasiaviri sa karu aea la kiripi soeaita soa, are ma auke otioti voa haiorai vei soeai roi, a—, sukaeai auke loita reha.

⁴⁴ Aite areve o mōfeare, Ara kiripaia arave lea uvi voa ata kerori vei. Soka are koti aea lea uvi tailia ovava leitita la eovi,

⁴⁵ are te aea are ita areve maealolo la sapataita harisu seven la taravi koti, ere oropi lea uvi voa popōvaita reha. Lōfeare sa lei, lea karu ve omopa soa ve maealolo taheka seika, a—, aite kofa soa areve maealolo rovaea kofa.

Iesu ve elore karu kofa

⁴⁶ Are karu sitavu ita laua sukavaiape lea mea, areve lou aea areve mariosu ita koti maria voa pepea, arero laua sukavai haikaeōpe.

⁴⁷ Soka karu farakeka aea arero mō ōpe, Ofae eavaia, ave lou ita mariosu ita eapo a vei maria voa popōvi aro laua sukavai vei la elipea.

⁴⁸ A—, are tava o arero omoipe karu la mō ōpe, Arave lou leisa? aea arave mariosu ta lavea?

⁴⁹ Are areve mai areve satiriaraita karu la sosoropi muia, mō ōpe, Ofae eavaia, arave lou ita, arave mariosu ita meha!

⁵⁰ Ipi arave kauri voa peita Oa sa haikaeaita mai la leita lea karu, arave marehari aea uaroa aea lou ere reha.