Mareko 9 - Testamenta Áre 1983 (Toaripi PNG)

¹ Are erero ta mō ōpe, Ara ero okofa omoi, Mōvoa pepeipeta karu hea opai la ore levi leiti roi pepepe Ualare ve basileia sa siahu ita foreraita la ere ofae eavai roi.

Iesu ve maea toarōrisa maea haria leipe

² Soka sare six ve aite voa Iesu are Petero aea lakobo aea Ioane ita la lariōvi, are ita fareho murufakao raepa koa arori voa pataipe. Patei areve maea ereve omopa voa toarōrisa maea haria lei,

³ aea areve puta kevarokevaro fei, seaseaeiteapo kofa leipe; mearovaeka voa puta lōfeare lei sea leita karu kasirau.

⁴ Soka Elia auka Mose ita erero tai forera, ereuka Iesu ita laua sukavaiape.

⁵ Sukōvi, sukōvi Petero Iesu la mō moipe, Satiriaraita Vita e, ereita mōvoa roroaita lareva; ela harotōvu oroisoria safai vei, farakeka a vei, farakeka aea Mose vei, farakeka aea Elia vei.

⁶ Ipi ere tore foromai leipe eavia, are laua kofa sukavaita ore auke leipe.

⁷ Soka mea‐e foreri erero aieri, aea o mea‐e voa forera mō ōpe, Arave haikakare araita Atute meha; arero mapaia.

⁸ Ere ofae utohoa kerori, a—, karu aea la ere ita farehoria ofae eavai kasirau, a—, Iesu sa haria.

⁹ Ere raepa voa faukōpe soa, are erero o ōpe ere ofae eavaita lea etau la karu farakeka aea la levi moi vei tetete Karu ve Atute opi ata itoita soa ve aite voa.

¹⁰ Soka ere lea o ereve haiiri voa miavi, aea opi ata itoita lea o ve eite lekōru ere laua elore elore lea vei sukavaiape.

¹¹ Soka ere arero lalasi mō leipe, Ipi levea Safu Karoro ore karu o mōfeare aritore, Elia omopa koti ao?

¹² Are erero mō ōpe, Okofa, Elia omopa koti ipi etau foromai la lei áre leiti vei; a—, araro, Karu ve Atute vei ukōpe mea o leafeare? Are haisora rauapo lei, karu ta arero sukavutea haiarara leiti roi.

¹³ A—, ara ero o mō la auai, Elia koti roroka leitita, aea karu hea sa haikaeaiape lea mai ere arero leipe, usoso are vei uka siseita lea o feare.

Harisu maeasiaviri sa toōpe siare

¹⁴ Soka ere lea satiriaraita karu hea tai forerōpe lea mea, ere karu sitavu rovaeka erero eakoa toepi, aea Safu Karoro ore karu ere ita o serea serea ape la ofae eavōpe.

¹⁵ Soka lea karu sitavu ere arero ofae eavōpe lea mea ere haihava rovaea lei, utohoa arero tai oroa vo koti arero eapo o ōpe.

¹⁶ Are areve satiriaraita karu la lalasi mō leipe, E ere ita o serea serea aipeta ipi lekōru vei?

¹⁷ Karu sitavu voa peiape heavita farakeka aea tava o arero mō ōpe, Satiriaraita Papuvita e, ara arave atute aro tai lariōvi iti, are arero leita okuku harisu ia;

¹⁸ aea lea harisu arero ovaita soasoa voa arero mea voa toapi, ape soare foreri, tao ta karekare a’, areve maea ta perereaitore. Ara ave satiriaraita karu la lalasi loi lea harisu la taivatai vei, a—, ere usoso leiti kao.

¹⁹ Soka are erero mō ōpe, E sukaerereai auke leita taotao, ara e ita fareho soa savori leafeare meava roi ei? Ara soa savori leafeare ero morari vovo meava roi ei? Arero araro tai lariōvi kotia.

²⁰ Soka ere lea siare arero tai lariōvi koti, are arero ofae eavōpe lea mea lea harisu utohoa lea siare la lei mai ita mora ita sukasuka a’ are mea voa lei putei, oriri a’, ape soare ita aroruka aroruka ape.

²¹ Soka Iesu areve oa la lalasi mō leipe, Are soa savori leafeare mea eka ita mea vovea? Are arero mō ōpe, Soa areve seika soa voa itiiti faitora.

²² Soa rauapo lea harisu arero a voa aeata ma voa toapa toapa ō vovea arero paeai vei; a—, a etau aea la leitita ore, elaro maeaforoe lei toaraia.

²³ Lō mei, Iesu arero mō ōpe, Leitita ore! etau foromai la sukaerereaita lea karu vei leitita ore.

²⁴ Lea atute ve oa utohoa maea fi a’ mō ōpe, Ara la sukaerereaipea; arave sukaerereai auke soa voa araro toaraia.

²⁵ Iesu karu sitavu arero tai oroavi kokorukaiape la ofae eavōpe lea mea, are harisu maeasiaviri la o kere ita mō ōpe, Okuku aea ōvasuru harisu e, arero kiripi foreraia, aea are voa ata levi oropaia.

²⁶ Are maea fi a’ lea atute la lei mora ita mai ita sukasuka a’ a’, maria voa foreri, atute la lei maea ita opi kiripōpe; lea vei ereve karu rauapo mō ōpe, Are opai.

²⁷ A—, Iesu areve mai la paea arero moravi itoipe.

²⁸ Soka Iesu uvi voa oropōpe lea mea, areve satiriaraita karu arero murufa lalasi mō leipe, Ela arero larivataita ore auke loita ipi lekōru?

²⁹ Aea are erero mō ōpe, Lōfeare harisu la larivataita ore kao, a—, Ualare la loki leita, lōfeare su haria larivataita ore.

Iesu areve opi ata itoi soa vei o ata moipe

³⁰ Ere lea oti kiripi, Galilea ve aru voa sariva lei au terōpe. A—, karu lea la ore leiti vei are haikaeai kao.

³¹ Ipi are areve satiriaraita karu la satiriōri erero mō moipe, Karu ve Atute la karu ve mai voa miōri, ere arero paeai roi, a—, are opai soa ve aite sare oroisoria voa ata itoi roi.

³² Soka ere lea o ve eite haveva lei, arero lalasi leiti vei tore lei roroaiape.

Haiarori levi leitia

³³ Soka ere Kaperanauma voa forerōpe; aea are uvi voa oropi pavōpe lea mea, are erero lalasi mō leipe, E otiharo voa o serea elore elore oita ipi lekōru?

³⁴ A—, ere o auke leipe, ipi otiharo voa ereve elore elore o serea ve ipi ere voa karu rovaeka leisa.

³⁵ Soka are avi, twelve karu la isa kokoruka erero mō ōpe, Omopa leiti vei haikaeaipeta lea vita, are karu foromai ve aite kofa vita lei, karu foromai ve sarufa vita leiti roi.

³⁶ Aite are atute seika aea la mai paea arero ovi, ereve aru voa vipi, areve mai sa arero fareōvi haitoari ovi mō ōpe,

³⁷ Atute seika mōfeare la arave rare vei maeafukapaita lea vita, araro ta maeafukapai roi; aea araro maeafukapaita lea vita, are araro haria la maeafukapai sore, a—, araro itapōpe Ualare ta maeafukapaitore.

³⁸ Ioane arero mō ōpe, Satiriaraita Papuvita e, ela karu aea are ave rare ita harisu la larivataia la ofae eovi, ela arero o erere arita, ipi are ereitaro topiari aitetai auke eavia.

³⁹ A—, Iesu mō ōpe, Arero o erere levi aria; ipi karu aea arave rare voa siahu ita tivi leitita, lea ve aite voa are utohoa ara vei o maealolo arita ore levi leiti roi.

⁴⁰ Ipi ereitaro sukavuteai auke leita lea karu are ereitave karu reha.

⁴¹ Ara ero okofa omoi, Karu aea ma kōkuveisa ero miarait’ oria ipi e Keriso ve karu eavia, ara ero okofa omoi, are areve maeaforoe vei lea tava levi veverapai roi.

⁴² Uiti fare rorokea faeahohōroaita fave rovaea karu ve kōvōrehau voa suka makaikara voa toapi ma isoita lōfeare mai karu vei lareva ia; a—, are araro sukaerereaita mea karu kaekae aea la lei kaiae leita lea mai lareva kakaeite kofa.

⁴³ Soka ave mai sa aro lei kaiae leitit’ oria, arero sarapi mutapaia; makuri voa mai kui ita oropaita, a vei lareva ia; a—, a mai orakoria ita saroroapaita oti, a futai auke leita lea oti voa toapaita lareva kao. [

⁴⁴ Lōvoa ereve sarōva la loloita seseve opai sore, aea lea a ta futai sore.]

⁴⁵ Aea ave mora aro lei kaiae leitita, a—, arero sarapi mutapaia; a makuri voa mora kui ita oropaita, a vei lareva ia; a—, mora orakoria ita saroroapaita oti voa toapaita lareva kao. [

⁴⁶ Lōvoa ereve sarōva la loloita seseve opai sore, aea lea a ta futai sore.]

⁴⁷ Aea ave ofae aro lei kaiae leitita, a—, arero suka fareōvi mutapaia; a Ualare ve basileia voa ofae farakeka ita oropaita, a vei lareva ia, a—, ofae orakoria ita saroroapaita oti voa toapaita lareva kao.

⁴⁸ Lōvoa ereve sarōva la loloita seseve opai sore, aea lea a ta futai sore.

⁴⁹ Ipi karu foromai la a sa sa’ sōlo sa toaita feare ovava leiti roi.

⁵⁰ Sōlo are etau lareva, a—, sōlo areve peroro veverapaita, a—, arero ata lei lareva leafeare leiti roi? Sōlo eve haiiri voa maravaia, aea elore elore tairu ita pepeava.