Mareko 8 - Testamenta Áre 1983 (Toaripi PNG)

Iesu larietau karu 4,000 la miarōpe

¹ Lea soa voa karu sitavu rovaeka ata kokorukōpe lea mea, ere lari larietau hohoi kasirauri leipe. Soka are areve satiriaraita karu la arero tai isa koti erero mō ōpe,

² Ara mea karu sitavu la maeaforoe leipea, ipi ere ara ita fareho roroaia sare oroisoria loita meha, aea ere lari larietau kasirau.

³ Ara erero paraea eroa ita ereve elore elore voa itapaita, a—, ere otiharo voa maea‐uti pui leiti roi, ipi ere karu hea oti savori voa iti roroaipeta eavia.

⁴ A—, areve satiriaraita karu tava o arero mō ōpe, Ereita mea furuka oti voa larietau leavoa ovai roi, mea karu la lei ére popai vei?

⁵ Are erero lalasi mō leipe, E faloa korukoru leafere maravi sisea? Ere mō ōpe, Seven haria.

⁶ Soka are lea karu sitavu la mea voa ava puavai vei omoipe; aite are lea faloa korukoru seven la mai sa maravi, aea are Ualare la maeati roroka lei, erero fofi, satiriaraita karu la ere karu la omopa posaseai vei miarōpe; miōri ere lea larietau karu la omopa posaseōpe.

⁷ Ere ekaka kaekae farafarapo ta ia; are erero ta maravi Ualare la maeati roroka lei, are lea ekaka ta erero omopa posaseai vei omoipe.

⁸ Ere larietau la ére popōpe; aea ere lea fofōpe larietau hohoi maravi posea seven la soōpe.

⁹ Lea karu mai muti muti ere usoso 4,000 feare; aite are erero maea leiti vei itapōpe.

¹⁰ Soka are areve satiriaraita karu ita utohoa oroti voa forea, aea Dalamanuta soa voa ufōpe.

Farisea karu ere peise haikaeōpe

¹¹ Soka Farisea karu koti arero o serea ita kauri voa foreraita peise vei haisa eliape, ipi arero seseōvai vei.

¹² Are haisusuru savori a’ mō ōpe, Mea taotao karu peise elipeta ipi lekōru vei? Ara ero okofa omoi, peise mea taotao karu la levi miarai roi.

¹³ Are erero kiripi oroti voa ata forerōpe, sitoi ve mai itai voa ufai vei.

Farisea karu ve satiriaraita o aea Heroda sa muiaita mai

¹⁴ Soka satiriaraita karu faloa ovi ufai haisafōpe, aea ere oroti voa ere ita farehoria faloa koru farakeka sa haria.

¹⁵ Soka Iesu o kere erero mō moipe, Mapaia, e Farisea karu ve faloa fefesita etau aea Heroda faloa fefesita etau ita vei kiva kofa lei vovo roroava.

¹⁶ Lō mei, ere lea o vei elore elore laua mō seseōvōpe, Lea o ve ipi ereita faloa auke eavia.

¹⁷ Iesu ereve lea o la ore lei erero mō ōpe, E faloa auke vei laua seseōvaipeta ipi levea? E mapaia kao ei? E haiiri ovava leitia kao ei? E haiivavu leipea ei?

¹⁸ E ofae ia, a—, e eavai kao ei? E ōvauta ta ia, a—, mapai kao ei? Aea e haisafai ei?

¹⁹ Ara lea karu 5,000 vei faloa korukoru five la fofaia lea mea, e siseia faloa hohoi maravi posea leafere soōvota? Ere arero mō ōpe, Twelve.

²⁰ Aeata faloa korukoru seven ipi lea karu 4,000 vei, e fofoaia faloa hohoi maravi posea leafere soōvota? Aea ere arero mō ōpe, Seven.

²¹ Soka are erero mō ōpe, E faitora haiiri ovava leitia kao ei?

Ofae kuku karu Betesaida voa

²² Soka ere Betesaida voa forerōpe. Foreri, karu hea ofae kuku karu aea la Iesu tai lariōvi koti, arero mai sa mopai vei Iesu la loki leipe.

²³ Lei, are lea ofae kuku karu la mai sa tatavi, arero karikara maria voa lariōvi, aea are areve ofae oraka la pea sa soea, areve ofae oraka ta areve mai sa paea roroka leipe soa, are arero lalasi mō leipe, A etau ofae eavaipea ei?

²⁴ Soka are ofae moravi mō ōpe, Ara karu la eavaipea, a—, ara erero eovi, ere usoso tola feare, aea ere mora la keroripea.

²⁵ Aite are areve mai sa areve ofae oraka la ata mopōpe; mopi are ofae koko fofoisa, areve ofae ata lareva lei, are etau foromai la ovava ita ofae eavōpe.

²⁶ Soka are arero areve uvi voa itapi mō ōpe, A karikara voa levi oropaia.

Iesu are Keriso, Ualare ve Atute

²⁷ Soka Iesu areve satiriaraita karu ita maea lei, Kaisara Filipi ve karikara karikara voa kavōpe. Kei otiharo voa are areve satiriaraita karu la lalasi lei mō ōpe, Karu ara vei leafeare moitore, ara leisa?

²⁸ Ere arero mō ōpe, Ioane Bapatiso leita Vita; hea mō aritore, Elia; aea hea ta, peroveta karu farakeka aea.

²⁹ Soka are erero lalasi mō leipe, A—, eo, e ara voa lea’ moitore, ara leisa? Petero tava o arero mō ōpe, A Keriso.

³⁰ Are erero o erere ōpe, ere lea o karu aea la levi moi vei.

Iesu ve oarehōva o ipi areve opi ata itoi soa vei

³¹ Soka lea soa are erero satiriaraiape ipi Karu ve Atute aite haisora rauapo leiti roi, aea opasora‐sora, aeata maso harofave karu, aeata Safu Karoro ore karu arero sukavutea, arero paea opi, sare oroisoria ve aite voa ata itoi roi.

³² Are lea o pisiri mei, Petero arero mai sa totorea, arero o erere kere ita ōpe.

³³ A—, are kerori, areve satiriaraita karu la ofae fofoisa, Petero la seravi mō ōpe, Arave aite voa pavaia, Satani e, ipi ave seseōvaipeta haiiri Ualare ve haiiri kao, a—, karu ve.

³⁴ Aite are karu sitavu areve satiriaraita karu ita la arero tai isa, erero mō ōpe, Karu aea araro aitetai haikaeai oria, are areve elore maea la haiarara lei, areve satauro la taiovi, araro lōri aitetaia.

³⁵ Ipi areve makuri la kiva leiti haikaeaita lea vita ve makuri la lei veverapai roi, a—, areve makuri la lei, ara vei, aeata Ovoro Lareva vei veverapaita lea vita makuri la ovai roi.

³⁶ Karu aea mearovaeka foromai la ovaita, a—, areve makuri veverapaita, lea etau are vei lareva lekōru?

³⁷ Ipi areve makuri vei, karu tava lekōru la itaea lei miarai roi?

³⁸ Ualare la kakeva auke leita aea mai kaiae leita mea taotao voa, ara vei aeata arave o vei maeamariti leita lea vita, Karu ve Atute ta are vei maeamariti aite leiti roi, are safu aneru lareva lareva ita fareho, areve Oa ve sosorusosoru ita kotita lea soa voa.