Mareko 5 - Testamenta Áre 1983 (Toaripi PNG)

Iesu aea harisu rauapo ita vita

¹ Ere ufi mai itai voa Gerasene karu ve mea voa forerōpe.

² Foreri are oroti kiripi miri voa fauka pavōpe lea mea, harisu maeasiaviri ita karu farakeka aea tapu oti kiripi, arero sukaeai vei kotipe.

³ Mea vita sofa lalava iri voa lei vovo meiape, karu arero fasaita ore kao, auri horou ta arero fasaita rofo kasirau.

⁴ Ipi arero karu sa evera mora ita mai ita auri horou sa haelarehaelare fasaiape, a—, are mai la fasaita auri horou la aruovi, mora la fasaita auri horou ta toatoa faraiape; aea karu arero sukaforai vei rofo kasirau.

⁵ Faita savori aea sare savori are sofa lalava voa aea raepa otioti voa ora fofi fofi, areve maea la fave sa toa sarapa sarapa ōvovo meiape.

⁶ Soka are ára‐ita Iesu la ofae eavōpe lea mea, are arero tai soea vo koti, areve omopa voa sukakoka hiopi,

⁷ maea fi rovaea ita i mō isa moipe, A ara ita leati loi, Iesu, Koakoa‐eiteapo Ualare ve Atute e? Ara Ualare ve rare vei loki aro sukarai, a araro lei hehea levi leitia.

⁸ Lea o ve ipi Iesu o arero mōfeare moipe, Harisu maeasiaviri e, mea karu kiripi foreraia.

⁹ Soka Iesu arero lalasi mō leipe, Ave rare leisa? Are tava o mō ōpe, Arave rare Maola‐sitavu, ipi ela rauapo eavia.

¹⁰ Are Iesu la loki serea ita leipe are erero lea oti ve maria voa levi itapai vei.

¹¹ Soka ita sitavu rovaeka raepa soso voa popōvi, kavuru la lalape;

¹² aea ere arero loki mō leipe, Elaro ita sitavu tai itapi ela ereve iri voa oropai vei.

¹³ Soka are erero itapi, aea lea harisu maeasiaviri pisiri voa foreri te ita ve iri voa oropōpe. Oropi lea ita sitavu, muti 2,000 varo, tatava voa oroa, ma voa foforea, ma isoseōpe.

¹⁴ Lea ita kiva karu ere oroa aea lea fari karikara metameta aea karikara kaekae ita voa fafarapi, karu rauapo lea leipe etau larelekōru ofae eavai vei kotiape.

¹⁵ Ere Iesu tai foreri, harisu sa toōpe vita lōvoa aiseseiape la ofae eavōpe, puta mopi, haiiri ta haura lei, harisu rauapo sa omopa pasavaiape lea vita; aea ere tore leipe.

¹⁶ Soka lea etau la eavōpe karu ere harisu sa toōpe vita la leipe mai ve fari aea ita ve fari ita la erero omoiape.

¹⁷ Mei mei ere Iesu la loki leipe are erero kiripi oti haria voa terai vei.

¹⁸ Are oroti voa foreōpe soa, lea harisu sa kiripōpe vita arero loki leipe are Iesu ita fareho toari mei vei.

¹⁹ A—, Iesu haiarara lei arero mō ōpe, Ave elore voa ave paumarehari tai teraia, aea Papuvita sa aro leita lea etau rovaea, aea are aro maeaforoe leita fari la erero omoia.

²⁰ Soka are terōpe, aea Iesu sa are vei leipe lea etau rovaea ve fari Dekapoli soa voa itoro a’ a’, karu foromai haihava leiape.

Ovo eka leipe ua aea Iairo ve mori

²¹ Soka Iesu oroti voa mai itai voa ata ufōpe lea mea, karu sitavu arero tai kokoruka, are ma poe voa pavōpe.

²² Lea mea sunako harofave vita farakeka, rare Iairo, arero tai iti, arero ofae eavōpe soa voa areve mora ipi voa sukakoka hiopi,

²³ loki fi ita serea haisa arero mō ōpe, Arave mori seika opai vei la roi. Kotiria, ave mai arero paea, are ata lareva lei, makuri leiti vei.

²⁴ Lō mei, Iesu are ita fareho terōpe. Soka karu sitavu arero aitetei arero topiferavaiape.

²⁵ Ua farakeka aea lōvoa, are ovo eka sisoro twelve lei meiape.

²⁶ Dokita karu rauapo sa are voa tivi lei, arero lei hehea rovaea lei lei, aea are areve etau foromai la muramura tava vei miōri miōri kaleipe; a—, are lareva leiti auke lei, areve eka ve maealolo au topiaraiape.

²⁷ Are Iesu ve fari la mapōpe lea vei, are karu sitavu ve aru voa, areve aite voa koti, areve maea puta la mai sa mopōpe.

²⁸ Ipi are areve haiiri voa mō ōpe, Ara areve puta la haria mai sa mopaita, a—, ara lareva ata leiti roi.

²⁹ Soka ovo utohoa toelapi, are areve elore maea voa areve eka kaleipe la ore leipe.

³⁰ A—, Iesu, siahu areve maea voa kiripi forerōpe la areve elore haiiri voa ore lei, karu sitavu ve aru voa utohoa aiterori a’ mō ōpe, Arave puta la mai sa mopaita karu leisa?

³¹ Areve satiriaraita karu arero mō ōpe, A ofae eavai, karu sitavu aro topiferavi eakoa toepai, a—, a lalasi mōri loi, Araro mai sa mopaita karu leisa?

³² A—, are ofae kerorikerori ōpe, lea etau leipe karu la ofae eavai vei.

³³ Soka lea ua, ipi are arero leipe etau la ore eavia, tore ita hai‐uti oriri ita foreri, areve omopa voa sukakoka hiopi, fari foromai arero vavavōpe.

³⁴ Soka are arero mō ōpe, Mori e, ave sukaerereaita haiiri sa aro lei lareva loi; eapo tairu ita teraia, aea ave eka la lei lareva leitia.

³⁵ Soka are laua sukavaiape lea soa kofa voa, karu hea sunako harofave vita ve uvi kiripi iti mō ōpe, Ave mori opai. A Satiriaraita Papuvita la lei heafo ita ata leipeta ipi levea?

³⁶ A—, ereve lea o Iesu haiarara lei sunako harofave vita la mō ōpe, Tore levi leitia, a—, au sukaerereaia.

³⁷ Soka Iesu karu are ita fareho terai haikaeai kao, a—, Petero, aea Iakobo, aea Iakobo ve marehari Ioane ita sa haria.

³⁸ Ere sunako harofave vita ve uvi voa forerōpe lea mea, Iesu karu ora fofi, ovororo sisapi, fi savoiape la ofae eavōpe.

³⁹ Are oropi erero mō moipe, E ora fofi ovororo sisapi fi aipeta ipi levea? Mori seika opai kao, are ivutu la eaea.

⁴⁰ A—, ere arero area sa vutea ōpe. Soka are erero foromai maria voa taivati, aea mori seika ve oalou ita aea are ita fareho roroaiape karu ita la lariōvi, lea mori sa eaeiape lalava voa oropōpe.

⁴¹ Oropi, are arero mai sa paea mō ōpe, Talita kumi, lea o ve mavitoaita eite meha, Mori seika e, ara ero o mō la auai, itoia.

⁴² Soka lea mori utohoa itei mora keroripe, ipi ereve sisoro twelve eavia. Ere utohoa haihava foromai leipe.

⁴³ A—, are erero o kere ita o erere ōpe, ere karu haria lea fari la levi lei ore leiti vei, aea ereukaro larietau arero miarai vei moipe.