Mareko 4 - Testamenta Áre 1983 (Toaripi PNG)

Iesu ve parabole o uiti mere vei

¹ Soka Iesu miri voa ata satiriaraiape lea mea, karu sivirieka arero tai kokoruka pepeiape. Are lea vei oroti aea voa forea ōso voa avōpe; aea lea karu sitavu foromaiapo ere miri ma poe voa popōva puavōpe.

² Are etau rauapo la parabole o ita erero satiriaraiape. Satiriōri are erero mō ōpe,

³ Mapaia, forōva arita karu aea mere tovuseai vei terōpe.

⁴ Te are uiti mere tovuseaiape soa, mere hea otiharo voa sisapi, ori fufuka fafuka erero la’ haroavōpe.

⁵ Mere hea fave mea voa sisapi siseiape; lōvoa mea kafearu kao; haiauru utohoa forerōpe ipi mea seseroro eavia,

⁶ aea sare pataipe lea mea, erero toa hehea lei fefeōpōpe, ipi ere likilea seaupai kofa auke leipe eavia.

⁷ Etau mere hea ikoika ve aru voa sisapi, lea ikoika ere ita haiauru foreri erero aieri mekeke lei, ere fare tai auke leipe.

⁸ Soka mere hea sisi mea voa sisapi, haiauru foreri, asi metameta lei, fare taipe, uti hea fare 30, hea ta 60, hea ta 100.

⁹ Lō mei are mō ōpe, Karu mapaita ōvauta ita oria, lea o la mapaia.

¹⁰ Soka karu sitavu arero kiripi are aiseseiape lea mea, areve lea twelve karu aea are ita fareho roroaiape karu ita ere parabole ve eite vei arero lalasi leipe.

¹¹ Lei, are erero mō ōpe, Ualare ve basileia ve hohore etau la ero miōri, e sa ore leiti vei; a—, maria voa roroaipeta lea karu vei ovoro foromai la parabole o erero omoitore.

¹² Lea ve ipi meha, Ere ofae eovi eovi, a—, ere eite ore levi leiti roi; ere mapi mapi, a—, haiiri levi fapai roi; ere haiiri kerori, aea ereve kaiae la sasuka mutapai ave.

¹³ Aea are erero mō ōpe, E lea parabole ve eite ore leiti kao ei? E parabole o foromai ve eite la leafeare lei ore leiti roi ei?

¹⁴ Lea uiti mere la tovuseaita vita are ovoro la tovuseaitore.

¹⁵ Tovusea, otiharo voa sisapi siseiape mere ve eite karu, ere ovoro la mapaita lea mea, Satani utohoa foreri ereve iri voa tovuseaita lea ovoro la fareovaitore.

¹⁶ Aea fave oti voa tovusea sisapi siseiape mere ta lōfeare, ere eite karu, ere ovoro la mapi, utohoa hailareva ita arero sukaerereai;

¹⁷ a—, ereve iri voa likilea auke feare lei, soa taheka haria pōvi, aite haisora ō hasiavaita etau lea ovoro vei foreraita lea mea, ere utohoa haiarara lei kiripaitore.

¹⁸ Uiti mere ikoika ve aru voa tovuseaita lea karu hea ere ovoro la mapai,

¹⁹ a—, mearovaeka ve haikavora etau hariaharia, aea pisoso etau ve maeahahauhahau, aea etau maeamaea la haikakare araita sa karu ve iri voa foreri, ovoro la aieri mekeke lei, fare lōfeare levi tai roi.

²⁰ A—, sisi mea voa tovuseaita lea karu ere ovoro la mapi, sukaererea, fare taitore, hea fare 30, hea fare 60, hea fare 100.

Ovava ve o

²¹ Soka are erero lalasi mō leipe, Lamepa la elōela sa kaupi vipai vei, ō ivutu posa ve hiairi voa vipai vei ovi kotitore ei, a—, areve posa kofa voa levi vipai vei ei?

²² Ipi milafuka siseita etau kasirau, a—, erero pisiri voa muiai roi, arorisa siseita etau ta kasirau, a—, erero pisirikao ore leiti roi.

²³ Karu mapaita ōvauta ita oria, lea o la mapaia.

²⁴ Soka are erero mō ōpe, E mapaita lea etau la hai sukafori kaeaia; e karu haria la miaraita lōfeare ve rauapo feare, ero ta miarai roi, aea maea aeata topiari ero lōri miarai roi.

²⁵ Ipi etau ovi meita lea karu la etau maea aeata topiari miarai roi; a—, etau ovi mei auke leita lea karu, are ovi meita lea etau orakafofa la fareovai roi.

Parabole o asaita mere vei

²⁶ Soka are mō ōpe, Ualare ve basileia are usoso mōfeare, karu aea are areve mere la mea fae voa sisōvi roroka lei,

²⁷ faita ita sare ita iavaia itoia lei vovo meita, aea lea mere haiauru foreri asai roi, a—, mere sa asaita mai leafeare are ore kao.

²⁸ Mea sa haria lei asa vovea, omopa haiauru, aite fari hari, aite fare sora kavōvo ve iri voa.

²⁹ A—, fare sora leitita lea mea, are utohoa naosoi sa sarapi fareovai roi, ipi fare sora pisahu foreraita eavia.

Parabole o sinapi mere vei

³⁰ Soka are mō ōpe, Ereita Ualare ve basileia ve usoso etau leafeare la ovi seseōvai vei, aea ereita parabole o lekōru la ovi areve eite muiai vei ei?

³¹ Are sinapi mere feare, arero mea fae voa vipaita lea mea, are foromai titilese kofa, mea voa lōvelōveaita mere foromai ve titilese are feare kao;

³² a—, arero vipi are asi rovaea lei, laloita tolotolo foromai la sapatei, lakai ta metameta leititore, lea vei arori voa roroaita ori areve tōvu iri voa iroropaita ore.

³³ Lōfeare parabole o rauapo ita are ovoro la erero satiriaraiape, ere sa mapi ore leita lea rofo feare.

³⁴ Are erero o parabole o auke ita satiriarai kao, a—, are etau ve eite foromai la areve satiriaraita karu la murufakao omoiape.

Iesu karivaripu la o erere a’ akoka leipe

³⁵ Lea sare mea aeōpe soa voa are erero mō ōpe, Ereita sitoi ve mai itai voa ufai vei.

³⁶ Lō mei ere karu sitavu kiripi, aea are aiseseiape lea oroti voa arero ere ita farehoria lariōvi, oroti hea ta are ita fareho ufaiape.

³⁷ Ufi karivaripu sa fareōvi, aroaro ma oroti voa suka sisōvi, oroti lea vei soari vei leipe.

³⁸ A—, are evoe voa ivutu pute hiori voa eaeiape. Ea ere arero sukitapi mō ōpe, Satiriaraita Papuvita e, a haiiri kao ei? ereita ma isosea opai vei la roi!

³⁹ Soka are itei, mea la o erere a’, ma la mō ōpe, Isora, iavaia! Aea mea sarapi, ma peti faipe.

⁴⁰ Aite are erero mō ōpe, Eve tore ve ipi lekōru? E sukaerereai kao ei?

⁴¹ A—, ere haihava foromai lei, elore elore o mō ōpe, Mea lekōru karu, mea ita ma ita areve o la mapai!