Mareko 15 - Testamenta Áre 1983 (Toaripi PNG)Iesu Pilato ve omopa voa ( Mataio 27:1–2 , 11–14 ; Luka 23:1–5 ; Ioane 18:28–38 ) 1 Miori sare sa muiōpe soa voa, maso harofave karu aea omopasora‐sora karu ita aea Safu Karoro ore karu ita aea kaunsila karu foromai ita laua utohoa seseōvi, ere Iesu la fasi, arero lariōvi te Pilato la miarōpe. 2 Soka Pilato arero lalasi lei mō ōpe, A Iuda karu ve king ei? Are tava o arero mō ōpe, O a sa la moipea. 3 Soka maso harofave karu havara rauapo are vei paraeaiape. 4 Paraea paraea, Pilato arero ata lalasi lei mō leipe, A tava o kao ei? Mapaia, ere havara rauapo aro la paraeaipea. 5 A—, Iesu tava o ata omoi kao, lea vei Pilato haihava leipe. Pilato Iesu la seseōvi tava paeai o omoipe ( Mataio 27:15–26 ; Luka 23:13–25 ; Ioane 18:38—19:16 ) 6 Soka sosoka soasoa voa Pilato dibura karu farafarapo, ere loki leita lea karu la erero tai paraea foreraiape. 7 Lea soa voa, gavana la sukavutea lavukakaea, karu hea la paeaiape karu dibura voa fasi pepeiape, aea lea karu aea ve rare Barabasi. 8 Soka karu sitavu papatavi, Pilato sa soa foromai leiape mai feare leiti vei arero loki leiape. 9 Lei lei, Pilato tava o mō ōpe, E haikaeaipeta haiiri ara Iudea karu ve king ero tai paraea itapai vei ei? 10 Ipi Pilato ore kofa maso harofave karu ere Iesu la hilisi lei, Iesu la are sa seseōvai vei miarōpe. 11 A—, maso harofave karu ere karu sitavu la kureope, Barabasi erero tai paraeai haikaeai vei. 12 Soka Pilato tava o erero ata mō moipe, Aita, e Iuda karu ve king o oita lea vita la ara leafeare leiti roi? 13 Ere i rovaea foromai ata mō isōpe, Arero satauro voa vitei paeaia. 14 A—, Pilato erero mō ōpe, Ipi levea? Are kaiae lekōru la loloi? Ere i rovaea foromai ata mō isōpe, Arero satauro voa vitei paeaia! 15 Soka ipi Pilato karu sitavu lei hailareva leiti vei haikaeōpe, lea vei are Barabasi erero tai paraea forerōpe, a—, are Iesu la lei, ere arero teavi sa’ roroka lei, are arero satauro voa vitei paeai vei miarōpe. Maola karu opasea lei Iesu la area sa vutea leipe ( Mataio 27:27–31 ; Ioane 19:2–3 ) 16 Soka maola karu ere Iesu la lariōvi te uvi iri‐aru‐pisiri oti voa, gavana karu ve uvi rovaea ve oti reha, aea ere ereve firu karu foromai la isa kokorukōpe. 17 Kokoruka ere Iesu la puta mohari sa mopi, aea ere kekeva kiri marekeke sa sa’ areve harofave voa topōpe. 18 Lea mea ere arero apeva ita maeati mō ape, Iuda karu ve King e, a eapo meha! 19 Aea ere areve harofave la sirivu sa teavi sa’ sa’, arero pea sa soea soea, aea ere sukakoka hiopi arero lohalai taivotaipe. 20 Ere arero opasea lei, area sa vutea a’ a’ kaleipe lea mea, ere lea puta mohari are voa fareōvi, areve elore puta kofa arero ata mopōpe. Aite ere arero satauro voa vitei paeai vei maria voa lariōvi kavōpe. Ere Iesu la satauro voa vitei paeōpe ( Mataio 27:32–44 ; Luka 23:26–43 ; Ioane 19:17–27 ) 21 Otiharo voa ere Kurene soa ve karu aea rare Simona, are Alesana auka Rufo ita ve oa, ere lea vita maria voa koti karikara voa forerōpe la sukaea, arero irori ita haisa Iesu ve satauro la taiovai vei. 22 Soka ere Iesu la lariōvi kei oti rare Gologota voa forerōpe, lea rare ve eite, harofave kōkuharo ve oti. 23 Foreri ere mura sa sisōvi kapekapeōpe uaina la are lari vei miarōpe, a—, Iesu arero lari haikaeai kao. 24 Soka ere arero satauro voa vitaipe, aea ere areve maea puta la faeōpe, lea puta vei ere feai fasōpe leisa leisa ovai vei. 25 Ere miori nine o’eloek soa voa arero satauro voa vitaipe. 26 Arero paeai ve ipi o mōfeare ukōpe, Iuda Karu ve King. 27 Ere are ita fareho torea karu oraka ta elore elore satauro voa vitaipe, farakeka areve mai toare voa, farakeka aea areve mai ava voa. [ 28 Safu Karoro voa mōri uka siseita o la lōfeare sa lei okofa leipe, Are kaiae karu ita firu farakeka leipe.] 29 Foapa vovo roroaiape karu ere arero o maealolo meimei, ereve harofave kaeakaea a’ mō ape, Haha! Maso Uvi la toa foforuka sare oroisoria voa ata turai o oita vita e, 30 satauro voa fauka elore maea la lōri lei makuri leitia! 31 Lōfeare mai ita maso harofave karu ta arero area sa vutea a’, ere elore elore laua Safu Karoro ore karu ita fareho sukōvi mō ape, Are karu hariaharia la lei makuri leiape, a—, are areve elore maea la lei makuri leitita ore kao. 32 Ereita Keriso, Israela ve King faitora satauro voa faukaita la ofae eavaita, a—, ereita arero sukaerereai roi. Are ita farehoria ereukave elore elore satauro voa vitaipe karu oraka ta auka o maealolo arero ōpe. Iesu ve opai ( Mataio 27:45–56 ; Luka 23:44–49 ; Ioane 19:28–30 ) 33 Sare koko leipe soa mea foromai la murumuru sa aierōpe; aieri eaea soa ora oroisoria kaleipe soa voa. 34 Sare sosi soa leipe lea mea, Iesu maea fi rovaea ita mō isōpe, Eloi, Eloi, lama sabaktani, lea o ve eite, Arave Ualare e, arave Ualare e, a araro kiripaita ipi levea? 35 Haekao soi pepeiape karu hea lea o la mapi mō ōpe, Mapaia, are Elia la la isaipea! 36 Soka karu farakeka soea, fave soase voa uaina peroro sisōvi soa’, sirivo voa vifei, are sosoai vei muia mō ōpe, Aupavaia! ereita ofae eavai ao, Elia koti arero ovi satauro voa fareōvi faukaita varo. 37 A—, Iesu maea fi rovaea a’, au opōpe. 38 Soka Maso Uvi ve sasaukaita puta tavaea lōva aru voa torerapi itai itai leipe, soa arori peto fauka soa ipi peto voa. 39 Areve omopa voa soi peiape maola firu aea la lariōvaita kapena, Iesu lōri opōpe la ofae eavōpe lea mea, are mō ōpe, Etakofa, mea vita are Ualare ve Atute. 40 Uamori hea ta ára‐ita pōvi fofoisaiape. Ere voa Maria Magadala karikara ua, aea Maria, Iakobo seika auka Iose ita ve lou, aeata Salome. 41 Iesu Galilea voa meiape soa lea uamori sa arero aitetei toara vovo roroaiape. Uamori hariaharia rauapo, are ita Ierusalema voa papatavi roroaiape lea uamori ta lōvoa popōvi fofoisaiape. Iesu la viopōpe ( Mataio 27:57–61 ; Luka 23:50–56 ; Ioane 19:38–42 ) 42 Soka mea aeai vei leipe soa voa, aea lea sare ta Kekese Leita Sare, lea ve eite Sabati ve omopa sare, 43 lea mea Iosefa, Arimatea karu, karu sa maeatita kaunsila karu aea, aea are ta Ualare ve basileia la taiape, are haiiri ivara lei, Pilato tai te, Iesu ve maea la fareovai vei loki leipe. 44 Pilato Iesu opi roroka leipe o la mapi, haihava lei, lea maola kapena la isa koti, are opi roroka loita varo, arero lea la lalasi leipe. 45 Soka lea maola kapena voa fari kofa la mapi, are maea Iosefa la miarai o moipe. 46 Iosefa puta maea‐sea mafu itaea lei, Iesu la fareōvi fauka, arero puta mafu sa fasi, aea tapu oti fave voa isōpe uta iri voa viopōpe; aite are fave utape la aroruka sasaukōpe. 47 Soka Maria Magadala karikara ua auka Maria Iose ve lou ita arero viopōpe oti la ofae eavōpe. |
Published by the Bible Society of Papua New Guinea in 1983.
British & Foreign Bible Society