Mareko 11 - Testamenta Áre 1983 (Toaripi PNG)

Iesu Ierusalema voa pataipe

¹ Ere koti Ierusalema haekao leipe, Betefage aea Betania karikara voa, Olive Raepa voa forerōpe. Lea mea are areve satiriaraita karu oraka la itapi,

² ereukaro mō ōpe, Euka eukave omopa voa eaeipeta lea karikara voa patei oropaia, aea euka lōvoa foreraita lea mea, euka fasi peita asini áre la utohoa ofae eavai roi, lea asini voa karu farakeka aea sa forea avaia kao; arero felaukea lariōvi faukaia.

³ Karu aea eukaro mō arit’ oria, Euka mōri leipeta ipi lekōru vei? euka mō aria, Papuvita arero haikaeaipeta eavia, aea arero mōvoa utohoa ata itapai roi.

⁴ Lō mei ereuka te, asini áre uvi aea ve utape, karikara pisiri voa fasi peiape la ofae eovi, arero falaukeōpe.

⁵ Felaukea, lōvoa soi pepeiape karu hea ereukaro lalasi mō leipe, Euka asini áre la felaukeaipeta ipi levea?

⁶ Lei, ereuka Iesu sa moipe o feare erero mei, ere ereukaro paraea itapōpe.

⁷ Soka ereuka lea asini áre la Iesu tai lariōvi iti, ere ereve maea puta asini ve kōu‐uti voa fururukea miavi, Iesu forea avōpe.

⁸ Karu rauapo ereve maea puta otiharo voa fururukea, aea karu hea ta tola lakai koseva forōva oti voa sairea miavaiape.

⁹ Omopa voa teraiape karu aea aite voa kotiape karu i mō isa moiape, Hosana! Papuvita ve rare ita kotipeta mea vita lareva ita meava!

¹⁰ Ereitave papa Davida sa vipi aea ata forerai vei leipeta basileia la lei lareva lei peava! Hosana aria koakoa eiteapo voa!

¹¹ Soka are Ierusalema voa foreri Maso Uvi voa te oropōpe; aea are etau foromai la ofae fofoisa fofoisa a’ eakoa toepi roroka leipe soa, are karikara kiripi twelve karu ita fareho Betania voa terōpe, ipi mea aeōpe eavia.

Haue tola la leipe mai

¹² Lea ve aite sare ere Betania kiripi kotipe soa voa, are eroa sōpe.

¹³ Soka are haue tola aea tolotolo ita ára‐ita ofae eovi, are te eite are voa sukaeaita varo, a—, are foreri eavōpe soa, eite kakaeite, tolotolo sa haria, ipi lea soa haue ve fare taita soa auke eavia.

¹⁴ Soka are lea tola la mō ōpe, Karu aea fare a voa taheka aeata levi lari roi. Lō mei, areve satiriaraita karu ta lea o la mapōpe.

Maso Uvi voa leipe mai

¹⁵ Soka ere Ierusalema voa foreri, are Maso Uvi voa oropi, aea Maso Uvi voa itaea lei miaraiape karu aea itaea lei maravaiape karu la toa liōvea, moni ilala leiape karu ve posa, aea sua la itaea lei miaraiape karu ve kiriposa ita la mavitoaiape;

¹⁶ aea etau maeamaea la Maso Uvi ve aru voa taiovaiape karu la are o erere ape.

¹⁷ Aea are karu la satiriōri mō ōpe, Mea o uka siseia kao ei? Arave uvi la torutoru karu foromai vei veveu leita uvi rare aravai roi, a—, e arero toarōrisa torea leita karu ve arafukaita uta la leipea.

¹⁸ Soka maso harofave karu aea Safu Karoro ore karu lea o la mapi, ere arero leafeare paeai vei lea la seseōvaiape; a—, ere arero tore leiape, ipi karu sitavu sitavu foromai areve satiriaraita o vei haihava leiape eavia.

¹⁹ Soka mea aeōpe soa Iesu aea ereve satiriaraita karu ita karikara kiripi maria voa terōpe.

Ualare la loki leita mai kofa ve siahu

²⁰ Ere miori soa otiharo voa te orapi ofae eavōpe soa, lea haue tola are likilea ita fefeopi kaleipe.

²¹ Eovi Petero Iesu sa moipe o la haikaea, arero mō ōpe, Papuvita e, ofae aura eavai, a o haiiri aria lea haue tola fefeopi laipea.

²² Iesu erero tava o mō ōpe, Ualare la sukaerereaia.

²³ Okofa ara ero o la moi, Mea raepa la mō arita vita, Fareōvi makaikara voa farea isaia, aea areve haiiri voa horahora auke lei, are lōfeare sukaerereaita, a—, are vei etau lōfeare leiti roi.

²⁴ Lea vei ara ero omoi, E veveu lei Ualare la loki leita lea etau etau foromai, e maravai vei sukaerereait’ oria, e lea la lōri maravai roi.

²⁵ O aeata meha, e Ualare la loki leiti vei soi pavaita lea soasoa voa, e karu sa ero kaiae leita lea la haikaeait’ oria, areve kaiae ve tava sasuka mutapaia; lea vei eve kauri voa peita Oa ta e areve safu la hasiavaita tava e voa sasuka mutapaita ore. [

²⁶ A—, e karu ve kaiae ve tava la sasuka mutapai auke leitit’ oria, eve kauri voa peita Oa ta e areve safu la hasiavaita tava e voa levi sasuka mutapai roi.]

Iesu sa leipe siahu ve ipi vei

²⁷ Soka ere Ierusalema voa ata forerōpe; aea are Maso Uvi iri voa mora kerori meiape soa, maso harofave karu aea Safu Karoro ore karu aea opasorasora ita arero tai koti,

²⁸ arero mō ōpe, A mea leipeta siahu ve ipi leavoa, aea mea mai leiti vei siahu aro leisa miarōpe?

²⁹ Iesu erero mō ōpe, Ara ta o farakeka ero lalasi leiti ao; e tava o araro omoita soa, ara ta ara mea mai leipeta siahu ve ipi la ero omoi roi.

³⁰ Ioane sa leiape lea bapatiso ve ipi leavoa, Ualare voa ei, ō karu voa ei? Tava o araro omoia.

³¹ Lō mei, ere elore elore o mō seseōvōpe, Ereita mō arit’ oria, Ualare voa, are mō ari roi, E arero sukaerereai auke leita ipi levea?

³² A—, ereita karu voa o arita, a—, ere karu sitavu la tore leipe, ipi karu foromai ve haiiri meha, Ioane are peroveta vita kofa.

³³ Lea vei ere Iesu la tava o mō ōpe, Ela ore kao. Iesu erero mō ōpe, Ara ta ara mea mai leipeta siahu ve ipi la ero levi moi roi.