Luka 8 - Testamenta Áre 1983 (Toaripi PNG)

Iesu Ovoro Lareva la itoro a’ farapaiape

¹ Lea ve aite voa Iesu karikara metameta aea kaekae ita voa Ualare ve basileia ve Ovoro Lareva la itoro ō vovo teraiape. Twelve karu are ita farehoria roroaiape,

² aea uamori hea ta reha, harisu maealolo la are sa ere voa larivataiape uamori, aea eka maeamaea la ere voa are sa lei lareva leiape lea uamori; ua aea Magadala ua Maria, Iesu are voa harisu maealolo seven la taivati oroōpe;

³ aea Ioana, Heroda ve uvi karu ve harofave vita Kusa ve ua, aeata Susana. Uamori rauapo ta reha, ere ereve ovi roroaiape etau hea la miōri, Iesu areve satiriaraita karu ita la lōfeare toaraiape.

Parabole o ipi uiti mere tovuseaita vita vei

⁴ Soka karu sitavu sitavu, karikara karikara voa arero tai foreri kokorukōpe soa, Iesu parabole o ita arero mō ōpe.

⁵ Forōva arita karu aea areve uiti mere tovuseai vei terōpe. Te are tovuseaiape soa, uiti mere hea otiharo voa sisapi, karu ve mora sa patei, ori fufuka fafuka erero la’ haroavōpe.

⁶ Uiti mere hea fave mea voa sisapi siseiape; aea ere haiauru foreri au fefeōpōpe, ipi mea ma auke leipe eavia.

⁷ Uiti mere hea ikoika ve aru voa sisapi, lea ikoika ere ita haiauru foreri erero aieri mekeke leipe.

⁸ Uiti mere hea sisi mea voa sisapi, haiauru foreri, asi metameta lei, fare 100 uti farafarapo voa taipe. Iesu o lōri mei roroka lei mō isa moipe, Karu mapaita ōvauta ita oria, lea o la mapaia.

⁹ Soka areve satiriaraita karu lea parabole o ve eite vei arero lalasi leipe soa,

¹⁰ Iesu mō ōpe, Ualare ve basileia ve hohore etau la ero miōri, e sa ore leiti vei; a—, karu haria vei ovoro foromai la parabole o sa erero omoitore; lea vei ere ofae eovi eovi, a—, ere eite ore levi leiti roi, ere mapi mapi, a—, haiiri levi fapai roi.

¹¹ Soka lea parabole o ve eite meha: lea mere eite Ualare ve ovoro.

¹² Otiharo voa sisapi siseiape mere ve eite karu, ere ovoro la mapi, a—, Diabolo foreri lea ovoro la ereve haiiri voa tofareovaita reha, ere sukaererea makuri leita ave.

¹³ Aea fave mea voa sisapi siseiape mere ve eite karu, ere ovoro la mapi, utohoa hailareva ita arero sukaerereai, a—, ere likilea auke feare lei, soa taheka haria seseari roroa, aite erero kaiae leiti vei kureaita soa voa ere haiarara lei kiripaita reha.

¹⁴ Soka ikoika ve aru voa sisapi siseiape mere ve eite karu, ere mapi kakeva lei roro’, haikavora etau hariaharia, aea pisoso etau maeamaea, aea makuri voa hailareva leita etau rauapo ita sa erero aieri mekeke lei, ere fare tei sora leiti kasirau.

¹⁵ A—, sisi mea voa sisapi siseiape mere ve eite karu ere ovoro la mapi, ere haiiri haura ita okofa ita ovoro la taupi kere lei, haisora auke ita roro’ fare taitore.

Ovava ve o

¹⁶ Karu lamepa a mopi roroka lei, arero elōela sa kaopai sore, aeata arero ovi ivutu posa ve hiairi voa ta vipai sore, a—, arero ovi lamepa posa kofa voa vipaitore, iri voa oropaita karu ovava la ofae eavai vei.

¹⁷ Milafuka siseita etau foromai la muia forera pisiri leiti roi, arorisa siseita o foromai ta fafarapi pisirikao ore leiti roi.

¹⁸ Lea vei e mapaita mai la haisukafori kiva leitia; ipi etau ovi meita lea karu la etau maea aeata topiari miarai roi, a—, etau ovi mei auke leita lea karu, areve haiiri are sa elore o a’ ovi meita etau la are voa fareovai roi.

Iesu ve elore karu kofa

¹⁹ Soka Iesu ve lou aea maraiosu ita foreri pepeiape, a—, ipi karu sitavu eavia ere arero tai heōheai kasirau.

²⁰ Karu hea arero mō ōpe, Ave lou ave maraiosu ita aro ofae eavai haikaea maria voa laepepea.

²¹ A—, are tava o mō ōpe, Arave lou aea arave maraiosu ita meha; Ualare ve o la mapi kakeva lei aeata leitita karu.

Iesu karivaripu la o erere ōpe

²² Soka sare aea are areve satiriaraita karu ita oroti aea voa forea, are erero mō ōpe, Ereita sitoi ve mai itai voa ufai vei. Soka ere auvia suka maea leipe reha.

²³ Ere soea vo ufaiape soa are ivutu iavi eaeiape. Ea, karivaripu lea sitoi voa fareōvi, ma oroti voa suka sisōvi soa’ toitapai vei leipe.

²⁴ Ere arero tai te sukitapi mō ōpe, Papuvita e, Papuvita e, ereita ma isoseai vei la loi! Soka are itei mea ita seseaiape loru ma ita la o erere a’, mea sarapi ma peti faipe.

²⁵ Aite are erero mō ōpe, Eve sukaerereai leavoa? A—, ere tore ita haihava lei elore elore mō ape, Mea lekōru karu? mea ita ma ita are sa moita o la mapaita reha.

Harisu rauapo ita vita

²⁶ Lea mea ere ufa Gerasene karu ve miri voa susuri pavōpe, Galilea ve mai itai miri reha.

²⁷ Iesu oroti kiripi miri voa fauka pavōpe lea mea, karikara la kiripi maria voa meiape karu aea arero sukaeōpe. Lea karu are harisu maealolo ia, aea soa savori are maea paseare lei meiape; are uvi voa pavai haiarara lei, tapu oti hariaharia voa pōva vovo meiape.

²⁸ Soka are Iesu la ofae eavōpe lea mea, are maea fi ita areve omopa voa soso mea voa hiopi, ape rovaea ita mō moipe, A ara ita leati loi, Iesu Koakoa‐eiteapo Ualare ve Atute e? A araro eapo lei hehea levi leitia.

²⁹ Lea o ve ipi Iesu harisu maeasiaviri la lea karu la kiripi maria voa forerai o mei roroka. Ipi soa rauapo lea karu harisu maea siaviri sa pasavaiape, karu arero mai ita mora ita auri horou sa fasi sasaukaiape, a—, are lea fasaiape etau la topupuka, harisu maeasiaviri sa arero furuka merava voa larivataiape.

³⁰ Soka Iesu arero lalasi mō leipe, Ave rare leisa? Are mō ōpe, Maola‐sitavu, ipi harisu sitavu sa are voa oropi pepeiape eavia.

³¹ Ere Iesu la loki sukarōpe erero toru‐uta karera voa levi itapai vei.

³² Soka lea raepa ōsefase voa ita sitavu rovaea kavuru la lalō vovo roroaiape; aea harisu sitavu arero loki leipe erero lei lea ita voa oropai vei. Soka are erero itapōpe reha.

³³ Lea soa harisu sitavu lea vita la kiripi te ita sitavu ve iri voa oropi, lea ita sitavu tatava voa oroa, ma voa foforea, ma isoseōpe.

³⁴ Soka ita kiva karu lea leipe mai la ofae eavōpe lea mea, ere oroa lea fari karikara metameta aea kaekae ita voa fafarapi,

³⁵ karu rauapo lea leipe etau la ofae eavai vei kotiape. Ere Iesu tai foreri, harisu sa toōpe vita Iesu ve mora ipi voa, puta mopi, haiiri ta ovava lei aiseseiape la eovi, ere tore leipe.

³⁶ Soka lea leipe mai la eovi ore leipe karu ere harisu sa toōpe vita la lei lareva leipe lea fari kotiape karu la omoiape.

³⁷ Lea soa Gerasene mea ve karu foromai Iesu la loki leipe erero kiripi terai vei, ipi ere tore foromai leipe eavia. Soka Iesu oroti voa forea ata kerori vei leipe soa,

³⁸ harisu sa kiripōpe lea vita arero loki leipe are Iesu ita fareho toari mei vei. A—, Iesu arero itapi mō ōpe,

³⁹ Ave elore voa teraia, aea Ualare sa aro loita lea etau rovaea ve fari la fafarapaia. Soka are maea lei, aea Iesu sa are vei leipe lea etau rovaea ve fari la karikara foromai voa itoro ōvovo terōpe.

Iairo ve mori aea ovo eka leipe ua

⁴⁰ Soka Iesu sitoi voa ata kerori fosi forerōpe soa, karu sitavu arero hailareva ita sukaeōpe, ipi ere foromai arero taiape eavia.

⁴¹ Lea mea karu aea rare Iairo, sunako uvi ve harofave vita, foreri, are Iesu ve mora ipi voa sukakoka avi hiopi, loki sukarōpe areve uvi voa koti vei,

⁴² ipi areve mori farakeka, sosoro twelve feare sa opai vei leipe eavia. Soka are teraiape lea soa voa karu sa arero topiferavaiape.

⁴³ Ua farakeka aea are ovo eka sisoro twelve lei meiape; are areve etau foromai la dokita karu la miōri miōri kaleipe, a—, arero lei lareva leiti karu kasirau.

⁴⁴ Are Iesu ve kōu‐aite voa koti, areve maea puta ve peto la mai sa mopōpe; mopi areve ovo utohoa toelapōpe reha.

⁴⁵ E Iesu mō ōpe, Araro mai sa mopaita karu leisa? Lea mea karu foromai avoa a’, Petero ta mō ōpe, Papuvita e, karu sitavu aro eakoa toepi la topiferavaipea.

⁴⁶ A—, Iesu mō ōpe, Karu aea araro mai sa mopai, ipi ara ore loi, siahu arave maea voa kiripi forerai.

⁴⁷ Soka lea ua lea leipe mai la eovi ore lei, milafukai maea kakapiso lei, hai‐uti oriri ita foreri, areve omopa voa sukakoka hiopi, are arero mai sa mopōpe eite la karu foromai ve soso voa vavavōpe, aea arero utohoa lei lareva leipe fari ta reha.

⁴⁸ Soka Iesu arero mō ōpe, Mori e, ave sukaerereaita haiiri sa aro lei lareva loi; eapo tairu ita teraia.

⁴⁹ Soka are laua sukavaiape lea soa kofa voa, karu aea sunako harofave vita ve uvi kiripi iti mō ōpe, Ave mori opai; a Satiriaraita Papuvita la heafo ita ata levi leitia.

⁵⁰ A—, Iesu lea o la mapi arero mō ōpe, Tore levi leitia; a—, au sukaerereaia, are lareva leiti roi.

⁵¹ Iesu te uvi voa forerōpe soa, karu are ita fareho oropai vei o erere ōpe, a—, Petero, aea Ioane aea Iakobo, aea lea mori ve oa ita lou ita sa haria.

⁵² Karu foromai lea mori vei ovororo ita fi savoiape. A—, are mō ōpe, Fi levi aria, are opai kao, a—, are ivutu la eaea.

⁵³ Lō mei ere arero area sa vutea ōpe, ipi lea mori opai kofa leipe la ere ore leipe eavia.

⁵⁴ A—, Iesu arero mai sa paea mō ōpe, Mori e, itoia.

⁵⁵ Soka areve ove ata kerori oropi, are utohoa itoipe reha. Lea mea Iesu areve oa ita lou ita la larietau arero miarai vei moipe.

⁵⁶ Ereuka haihava leipe; a—, Iesu ereukaro o erere ōpe, karu farakeka aea la lea fari levi moi vei.