Luka 6 - Testamenta Áre 1983 (Toaripi PNG)

Sabati sare ve safu vei

¹ Soka Sabati sare aea voa Iesu uiti forōva otioti ve aru voa terōpe lea mea, areve satiriaraita karu uiti fare la rurua, ereve mai sa ruru rorokea fari lalape.

² A—, Farisea karu hea mō ōpe, Lea mai Sabati sare voa safu, e lōfeare leipeta ipi levea?

³ Lō mei Iesu tava o mō ōpe, E Davida sa leipe lea mai ve fari muti sore ei? are aea are ita fareho roroaipe karu eroa sōpe lea mea.

⁴ Are Ualare ve uvi voa oropi, omopa posaseaita faloa koru la ovi lōpe, eite lea faloa karu merava sa lari vei safu, a—, maso tivi karu sa haria; aea are lea faloa hea ta maravi areve maeapavora karu la miarōpe.

⁵ Are o aeata erero mō ōpe, Arao, Karu ve Atute, ara ta Sabati ve Papuvita.

Mai hōru sisapōpe vita

⁶ Sabati sare aea voa are sunako uvi iri voa oropi satiriaraiape soa, mai toare mai hōru sisapōpe vita aea lōvoa aiseseiape.

⁷ Soka Safu Karoro ore karu aea Farisea karu ita Iesu la ofae sa fofoisa kiva leiape, are Sabati sare voa lea vita la lei lareva leitita varo, ipi ere arero havara lōfeare voa paraeai vei.

⁸ A—, are ereve seseōvaiape haiiri la ore lei, mai hōru sisapōpe vita la mō ōpe, A itei koti mōvoa pavaia. Lō mei lea vita itei koti lōvoa pavōpe reha.

⁹ Soka Iesu erero mō moipe, Arave lalasi o meha, Sabati sare voa karu la lei lareva leitita ei? ō karu la hasiavaita ei, mai haura leavoa? karu la lei makuri leitita ei, ō karu la saroroapaita ei?

¹⁰ Are erero foromai la ofae fofoisa kerori kerori a’, lea vita la mō ōpe, Ave mai sosoropaia. Are lōri leipe soa areve mai lareva au leipe.

¹¹ A—, ere kitou foromai lei, ere Iesu la leafeare leiti vei elore elore laua seseōvi sukavaiape.

Iesu areve aposetolo karu twelve la isōpe

¹² Soka lea soa voa are kei raepa oti voa Ualare la loki leiti vei patei, faita savori voa are loki lei vovo meiape.

¹³ Mea ōpōpe soa, are areve satiriaraita karu la isa koti, ere voa karu twelve la maravi erero rare aposetolo rare la aravōpe. Ereve rare rare meha:

¹⁴ Simona, are rare aeata Petero la aravōpe, lea vita, aea areve marehari Anderea; aea Iakobo aea Ioane; aea Filipi aea Batolomeo;

¹⁵ aea Mataio aea Tomasi; aea Iakobo Alefeo aea Simona Selote karu;

¹⁶ aea Iudasi Iakobo; aea Iudasi Iskariota, aite soa voa kivaia lei Iesu la paeai vei miarōpe lea vita.

¹⁷ Soka are ere ita fareho lea raepa voa fafuka mea vevete voa soi popōvōpe, areve satiriaraita karu sitavu rovaea ita, aea Iudea foromai aea Ierusalema aea Turo aea Sidono ve miri taotao voa pepea areve o la mapi ereve eka hariaharia la lei lareva leiti vei foreraiape karu sivirikapo ita farehoria.

¹⁸ Aea harisu maeasisiaviri sa toaiape karu la are lei lareva leiape.

¹⁹ Lei, lea karu sitavu foromai arero mai sa mopai vei haikaeaiape, ipi siahu areve maea voa foreri erero foromai la lōri lei lareva leiape eavia.

Lareva lavea?

²⁰ Soka are areve ofae moravi areve satiriaraita karu la fofoisa mō ōpe, E merava karu lareva ia, ipi Ualare ve basileia eve.

²¹ E faitora eroa sa sapeta karu lareva ia, ipi e aite ére popai roi. E faitora fi aipeta karu lareva ia, ipi e aite area ari roi.

²² Karu ero Karu ve Atute vei kaifa lei ero sukavutea, ero sukahoroa maeamariti o a’, eve rare etau maealolo feare o a’ mutapaita, a—, e lareva ia.

²³ Lōfeare leita soa hailareva lei maea fareovaia, ipi mapaia! tava rovaea e vei kauri voa miavi la eaea; ipi ereve papa‐ita ta lōfeare mai peroveta karu la evera leiape eavia.

²⁴ A—, ahai‐e e vei, pisoso karu e; ipi ero lei lareva leita etau la e maravi kaleita reha.

²⁵ Ahai‐e e vei, a faitora ére popaita karu e; ipi e aite eroa sari roi. Ahai‐e e vei, e faitora area aipeta karu e; ipi e aite fi savei ovororo sisapai roi.

²⁶ Ahai‐e e vei, karu foromai sa ero maeatita lea mea, ipi ereve papa‐ita ta apeva peroveta karu la lōfeare meatiape eavia.

Haikakare kofa

²⁷ A—, e arave o la mapaipeta karu e, ara ero o mō aipea: Eve ote karu la haikakare lei, ero kaifa leita karu la lei lareva leitia;

²⁸ ero lei maealolo leiti o oita karu la lei lareva leiti o aria, aea ero maeamariti o oita lea karu vei Ualare la loki leitia.

²⁹ Karu aea aro heva itai la toaita, a—, itai ta arero muiaia; karu aea ave arori puta la fareovaita, a—, ave iri puta ta hahaea levi leitia.

³⁰ Aro loki leita lea karu foromai la au miaraia; aea ave etauroro la au fareovaita lea karu la etau ata ovai vei levi eakoa moia.

³¹ Karu ero leiti vei e haikaeaita lea mai feare, erero ta lōri leitia.

³² Ero haikakare leita lea karu la haria haikakare leitita, a—, eve lareva leavoa? Iri kaiae karu sa erero haikakare leita lea karu ta haikakare lei vovea.

³³ Aea ero lareva leita lea karu la haria lareva leitita, a—, eve lareva leavoa? Iri kaiae karu ta lōri lei vovea.

³⁴ E etau tava ata ovaita haiiri ita karu la abitorea lei miaraita, a—, eve lareva leavoa? Iri kaiae karu ta tava etau ata usoso ovai vei iri kaiae karu aea la abitorea lei miara voven.

³⁵ A—, eve ote karu la haikakare lei mai lareva leitia, aea etau ata ovai haikaeai auke ita abitorea vei miaraia; aea eve tava rovaea kofa leiti roi; aea e ta Koakoa‐eiteapo Ualare ve atutemori leiti roi. Ipi are arero maeati auke leita karu aeata mai kaiae leita karu ita la maeaforoe lei vovea.

³⁶ E karu la maeaforoe leitia, usoso eve Oa sa maeaforoe leita lōfeare.

³⁷ E karu ve kaiae la seseōvi tava miarai auke leitita, a—, Ualare eve kaiae la seseōvi tava ta levi miarai roi; seseōvi kaiae o karu vei omoi auke leitita, a—, Ualare ero seseōvi kaiae o ta levi moi roi; kaiae ve tava sasukaita, a—, Ualare eve kaiae ve tava ta sasukai roi.

³⁸ Au miaraia, aea Ualare ta ero au miarai roi, seseōvaita etau soa’, vifarapi, pailalaea sisapa sisapa a’ ero lōri miarai roi. Ipi usoso e seseōvi miaraita lea rauapo feare, Ualare ta lōfeare seseōvi ero miarai roi.

Parabole o hariaharia

³⁹ Are ta parabole o la erero mō ōpe, Ofae kuku karu aea are ofae kuku karu aea la lariōvaita ore ei? Ereuka oraka toruuta voa levi oai roi ei?

⁴⁰ Satiriaraita karu are arero satiriaraita lea papuvita ve arori voa kasirau, a—, karu etau foromai la satiriōri malasa leita lea soa voa are arero satiriaraita lea papuvaita ita usoso leiti roi.

⁴¹ A ave marehari ve ofae voa eaeipeta lea tola eloe la eavaita, a—, ave elore ofae voa eaeipeta lea tola hōru la ore auke leipeta ipi levea?

⁴² Aeata a ave marehari la o mō leafeare moitore, Marehari e, ara hopa ave ofae voa lea tola eloe la fareovai ao, a—, eite a ave elore ofae kofa voa eaeita lea tola hōru la a ore leiti sore. Aiera‐aiera vita e, lea tola hōru la ave elore ofae voa fareovai ao, aea aite ave marehari ve ofae voa eaeita lea tola eloe la fareovai vei a ofae ovava ita lōri eavai roi.

⁴³ Tola lareva fare maealolo tai sore, aeata tola maealolo ta fare lareva tai sore.

⁴⁴ Ipi tola la ereve elore elore fare voa eovi ore leititore. Karu haue tola fare la kiriraua voa itōvai sore, ō vine fare makaisa voa.

⁴⁵ Karu lareva areve haiiri voa toea siseita etau lareva‐lareva voa etau lareva la pisiri voa muiaitore; a—, karu maealolo areve haiiri voa toea siseita etau maealolo maealolo voa etau maealolo la pisiri voa muiaitore; ipi haiiri voa so kofa arita lea etau ape sa moi vovea.

Uvi ve ipi oraka

⁴⁶ E araro, Papuvita e, Papuvita e, o moita, a—, e ara sa ero o moita lea o la leiti auke ipi levea?

⁴⁷ Araro tai foreri arave ovoro la mapi aea leitita lea karu ve eite, ara ero mōfeare muiai roi.

⁴⁸ Are usoso uvi turaita karu aea feare; are mea isa fauka iri karera lei, uvi ve ipi la fave ve arori voa miavōpe. Ma fareōpe soa lorara ma popotoa lea uvi la sukavutea sukavutea ōpe, a—, arero lei lulalula ari kasirau, ipi arero lareva ita turōpe eavia.

⁴⁹ A—, ovoro la mapi leiti auke leitita karu are usoso karu aea feare; are uvi la mea ve arori voa au turōpe. Lorara ma popotoa uvi la sukavutea sukavutea a’, are utohoa marukapi foforukōpe reha, aea are foforuka furira maealolo foromai leipe.