Luka 5 - Testamenta Áre 1983 (Toaripi PNG)

Iesu ve oarehōva satiriaraita karu

¹ Soka are Genesareta Sitoi miri voa soi peiape soa, karu sitavu Ualare ve o la mapai vei arero topiferavōpe.

² Are oroti orakoria miri koata voa siseiape la ofae eavōpe; oroti karu ereukaro kiripi ereve loko la maukaiape.

³ Lea oroti aea Simona ve; Iesu lōvoa forea miri kiripi sukavutea taheka ára‐ita avai vei arero lalasi leipe. Lei are oroti voa avi karu sitavu la lōri satiriaraiape.

⁴ Areve o kaleipe lea mea, are Simona la mō ōpe, Toru voa suka toa isei eve loko ekaka vei paraeaia.

⁵ Lō mei Simona tava o mō ōpe, Papuvita e, ela faita savori voa tapora heafo lei lei ekaka farakeka paeai kasirau; a—, ipi ave o eavia ara loko paraeai roi.

⁶ Soka ere lōfeare leipe soa, ere ekaka sitavu rovaeka lei elori ovi loko torerapai vei leipe.

⁷ Lei ere oroti aea voa roroaiape maeapavora karu la ere koti erero toarai vei mai toōpe. Toa ere koti oroti orakoria ekaka sa soa’, ere toitapai vei leipe.

⁸ Soka Simona Petero lea la ofae eovi, Iesu ve mora ipi voa sukakoka avi mō ōpe, Papuvita e, araro kiripi teraia, ipi ara iri kaiae vita eavia.

⁹ Ipi are aea areve maeapavora karu foromai ita ere sa paeōpe lea ekaka sivirikapo vei haihava foromai leipe eavia;

¹⁰ Sebede ve atute oraka, Iakobo auka Ioane ita ta reha, Simona ita tivi fareho leiape lea karu oraka. A—, Iesu Simona la mō ōpe, Tore levi leitia; mea soa ve aite voa a karu la usoso ekaka feare tapora lei maravai roi.

¹¹ Soka ere oroti la miri voa aruovi patei miavi, etau foromai la kiripi, Iesu la aitetei au terōpe.

Iesu aea pokea eka karu

¹² Soka are karikara aea voa peiape lea mea, pokea eka sa foromai leipe karu farakeka aea foreri, Iesu la eovi soso mea voa totopi hiopi, arero loki lei taupi mō ōpe, Papuvita e, a haikaeai oria, a araro lei ovava leita ore.

¹³ Iesu areve mai sosoropi arero mopi mō ōpe, Ara hai la kaeaipea, a ovava leitia. Soka lea pokea eka arero utohoa kiripōpe reha.

¹⁴ Are arero o erere a’ karu farakeka aea la levi moi vei, mō ōpe, Te ave maea maso tivi karu la muiaia, aea ipi a ovava loita eavia, a Mose sa moipe lea etau la omopa posaseaia, ave eka la lareva loita siahu oapai vei.

¹⁵ A—, Iesu ve fari fafarapi pisiri kofa lei, karu sitavu sitavu areve ovoro la mapi, ereve eka hariaharia la lei lareva leiti vei kokorukaiape.

¹⁶ A—, are furuka merava oti voa ta kavaiape Ualare la loki leiti vei.

Iesu maea susuru eka karu la lei lareva leipe

¹⁷ Soka sare aea voa are satiriaraiape lea mea, Galilea karikara foromai voa aea Iudea aeata Ierusalema voa forerōpe Farisea karu aea Safu Karoro la satiriaraita karu ta lōvoa aipepeiape. Iesu Ualare ve siahu ita leiape eka karu la lei lareva leiti vei.

¹⁸ Soka karu hea maea susuru eka karu aea la kakosa voa taiovi koti, arero Iesu ve omopa voa alaea miavai vei seseōvōpe.

¹⁹ A—, ere alaeai oti eavai kao ipi karu sitavu eavia. Soka ere uvi kōu voa patei, uta areravi, eka karu areve kakosa ita karu ve aru voa Iesu ve omopa voa paraea fauka miavōpe.

²⁰ Miavi, Iesu ereve sukaerereaita haiiri la ofae eovi mō ōpe, Karu e, ave iri kaiae sasuka mutapaita meha.

²¹ Soka Safu Karoro ore karu aea Farisea karu ita laua mō sukavaiape, Ualare la hasiavaita o aipeta mea vita leisa? Iri kaiae la sasuka mutapai vei leisa ore? Ualare sa haria reha.

²² A—, Iesu ereve seseōvaiape haiiri la ore lei, erero mō ōpe, E eve haiiri voa lōfeare seseōvaipeta ipi levea?

²³ Heafo auke etau leavoa, o mō aritōva, Ave iri kaiae la sasuka mutapai vei ei? ō mō aritōva, Itei, mora terai vei ei?

²⁴ Soka ipi ero lei ore leiti vei, Karu ve Atute mearovaeka voa iri kaiae la sasuka mutapai vei siahu ia — are maea susuru eka karu la mō ōpe, Ara aro o mō la auai, Itoia, ave kakosa fareōvi taiovi elore voa teraia.

²⁵ Lō mei are ereve omopa voa utohoa itei, are eaeiape lea etau la fareōvi taiovi, Ualare la maeatita o ita elore voa terōpe reha.

²⁶ Ere foromai haihava lei, Ualare la maeati aeata tore ita mō ōpe, Etau ve soa haria ta ereita iso sare eavaita meha.

Iesu Levi (Mataio) la isōpe

²⁷ Lea ve aite voa are karikara kiripi kei takis karu farakeka aea rare Levi, etau maeamaea ve takis oti voa aiseseiape la ofae eovi, arero mō moipe, Araro aitetei kotiria.

²⁸ Lō mei are etau foromai la kiripi, itei arero aitetaipe.

²⁹ Soka Levi Iesu ve ére‐forai larietau rovaea areve uvi voa pisosipe. Pisosi takis karu aeata karu hariaharia rauapo ereuka ita fareho posa voa avi larietau lalape.

³⁰ Soka Farisea karu aea ereve Safu Karoro ore karu ere o vituvitu a’, areve satiriaraita karu la mō ōpe, E takis karu aea kaiae karu ita fareho larietau ma ita lalapeta ipi levea?

³¹ A—, Iesu erero tava o mō ōpe, Maea rofo karu ere dokita haikaeai sore, a—, eka leita karu sa haria.

³² Ara haura leita karu la isai vei koti kao, a—, kaiae leita karu erero lei ere haiiri kerori vei.

Larietau avoha leita mai vei

³³ Soka lea karu o aeata arero mō moipe, Ioane ve satiriaraita karu soa rauapo larietau avoha lei Ualare la loki lei vovea, aeata Farisea firu karu ta lōfeare. A—, ave karu larietau ma ita la au lalō vovea.

³⁴ Lō mei, Iesu erero mō ōpe, Ua laeai vei leitita vita ita farehoria roroaita soa areve lea maeapavora larietau avoha leitita ore ei?

³⁵ Kasirau; a—, sare aite forerai roi lea mea ua laeaita vita la ereve aru voa fareovai roi, aea lea sare voa ere larietau avoha leiti roi.

³⁶ Are mea parabole o ta erero mō ōpe, Karu maea puta áre voa itua la levi torerapi ovi, maea puta ōsi voa miavi totorai roi; lōri leitit’ oria, are puta áre ta torerapi, aea lea puta áre itua la puta ōsi voa miavaita ta usoso levi leiti roi.

³⁷ Karu uaina áre la ovi uaina ruru everove voa sisōvai sore; are sisōvait’ oria, lea uaina áre ruru la lei haea sisapi veverapai roi, aea uaina ruru ta hasiavai roi.

³⁸ A—, karu uaina áre la ruru áre voa sisōvaitore.

³⁹ O aeata meha, uaina everove la loloita lea karu uaina áre la haikaeai sore, ipi areve o meha, Uaina everove tapare.