Luka 4 - Testamenta Áre 1983 (Toaripi PNG)

Diabolo Iesu la kaiae leiti vei kureōpe

¹ Soka Iesu Safu Arahoha Lareva sa soa’, Ioridana mai la kiripi ata kerori, Safu Arahoha Lareva arero furuka merava voa lariōvi kei,

² are lōvoa sare forty Diabolo sa arero kaiae leiti vei kureaiape. Lea sare sare voa are larietau lari kasirau, aea aite voa are eroa sōpe reha.

³ Soka Diabolo arero mō ōpe, A Ualare ve Atute oria, mea fave koru la toarōrisa larietau leiti vei moia.

⁴ A—, Iesu tava o mō ōpe, O mō uka laisisea, Karu ve makuri ve ipi larietau voa haria kasirau.

⁵ Aite Diabolo arero lariōvi patei, mearovaeka ve basileia hariaharia foromai la soa farakeka arero muiōpe reha.

⁶ Muia arero mō ōpe, Ara mea siahu ita sosorusosoru ita foromai la aro miarai roi, ipi mea etau etau araro miōri laisisea, aea ara sa haikaeaita lea karu la erero miarai roi.

⁷ Mea etau foromai ave etau leiti roi, a araro sukakoka hiopi taivotait’ oria.

⁸ A—, Iesu tava o arero mō ōpe, O mō uka laisisea, A Papuvita ave Ualare la maso toa, arero haria la taivotei maeatia.

⁹ Aite Diabolo arero Ierusalema voa lariōvi foreri, arero ovi Maso Uvi ve tao voa vipi, arero mō ōpe, A Ualare ve Atute oria, a ipi voa forea faukaia;

¹⁰ ipi o mō uka laisisea, Are areve aneru la aro kiva leiti o moi roi;

¹¹ aeata, Ere ereve mai sa aro tatavai roi, a ave mora la fave sa toai ave.

¹² A—, Iesu tava o arero mō ōpe, O aeata meha, a Papuvita ave Ualare la etau leiti vei levi seseovaia.

¹³ Arero seseovi kureaiape mai foromai lei lei kalei, Diabolo arero kiripi taheka foaipe.

Iesu Nasareta voa

¹⁴ Soka Iesu Arahoha ve siahu ita Galilea voa ata kerori foreri, areve fari lea eakoa toepōpe mea foromai voa fafarapōpe.

¹⁵ Are ereve sunako uvi voa satiriaraiape, aea karu foromai ta arero marase ape.

¹⁶ Aite are Nasareta, are asi rovaea leipe lea karikara voa koti forerōpe; aea safu sare voa, usoso areve leita mai feare, are sunako uvi voa te oropōpe. Are buka muti vei itei pōvi,

¹⁷ ere Isaia peroveta vita ve buka la arero miarōpe. Are buka fapi o mōri uka siseiape o la eavōpe,

¹⁸ Papuvita ve Arahoha ara ita laipea. Ipi are araro teoru sa veveti hailareva leita fari la karu merava la itoro ari vei, aea iroro ita fasaita karu la felaukea paraeaita o la itoro a’, ofae kuku karu ve ofae la feferopeaita o ta moi vei araro itapi la me meha; aeata karu sa lei haisora leita lea karu la paraeai vei,

¹⁹ Papuvita sa maeaforoe leita sisoro la itoro ari vei.

²⁰ Soka Iesu buka kiva karu la miōri avōpe reha. Avi karu foromai lea sunako uvi voa arero ofae fofoisa,

²¹ are o erero ata mo moipe, Lea karoro ve o ve eite iso sare, e sa mapaita soa okofa loita meha.

²² Soka karu foromai arero maeati areve ape voa forerōpe lea o tapare vei haihava lei o mō ōpe, Mea vita Iosefa ve atute kao vuro?

²³ Lō mei are erero mō ōpe, Okofa e mea hohore o la araro moita varo, Dokita e, ave elore maea la lei lareva leitia, aea ela mapaia fari a Kaperanauma voa leitia lea mai mōvoa ave elore oti voa ta leitia.

²⁴ Are o aeata mō ōpe, Okofa ara ero omoi, areve elore karikara voa peroveta tivi la leita vita la karu arero mapi sukaerereai sore.

²⁵ A—, okofa ara ero omoi, Elia ve soa voa kauri sisoro oroisoria aea papare six sasauka lai ari auke lei, mea foromai voa posera rovaea leiape lea mea, ua lelesi rauapo Israela voa pepeiape.

²⁶ A—, Ualare sa ereve ua farakeka aea tai Elia la itapai kasirau, a—, Sarepta, Sidono soa ve karikara voa peiape ua lelesi haria.

²⁷ Peroveta Elisaia ve soa voa pokea eka karu rauapo Israela voa pepeiape, a—, ereve karu farakeka la lei ovava leiti kasirau, a—, Suria karu Namana sa haria.

²⁸ Soka karu foromai lea sunako voa lea o la mapi, kitou foromai leipe reha.

²⁹ Ere itotea arero karikara koravasa voa sukavutea, ereve karikara sa eaeiape raepa tatava voa mairi aruovōpe ere arero tatava ve ipi voa toapai vei.

³⁰ A—, are ereve aru voa foei oti haria voa terōpe.

Kaperanauma sunako uvi voa

³¹ Soka are Kaperanauma Galilea karikara aea voa fauka te forerōpe. Foreri are safu sare voa erero satiriaraiape.

³² Satiriōri, karu areve lea o vei haihava leiape, ipi areve o siahu ia.

³³ Soka harisu maeasiaviri sa toōpe karu farakeka aea lea sunako uvi voa pea; are ape rovaea ita isa mō moipe,

³⁴ Siō! a elaro leafeare leiti vei leipea, Iesu Nasareta karu e? A elaro saroroapai vei koti ei? Ara aro ore kofa, a Ualare ve Safu Vita.

³⁵ A—, Iesu lea harisu la o erere a’ mō ōpe, O isoka, arero kiripi foreraia! Soka lea harisu ereve aru voa arero mea voa toapi iavi arero hasiavai auke ita kiripi soeōpe.

³⁶ Karu foromai haihava lei elore elore mō ape, Mea lekōru o? Are siahu ita o kere ita harisu maeasiaviri la haisa mei, ere pisiri voa foreraita reha.

³⁷ Soka areve fari eakoa toepōpe otioti foromai voa fafarapaiape.

Simona ve ōvalou aeata eka hariaharia karu

³⁸ Soka are itei sunako uvi kiripi te Simona ve uvi voa oropōpe. Simona ve ōvalou vevekoko eka rovaea lei, ere are vei Iesu la loki leipe.

³⁹ Lei, are arero tai foreri araupi pōvi, areve vevekoko eka la o erere a’, lea eka arero paraea, are utohoa itei maeafukapaita mai ere vei leipe.

⁴⁰ Soka sare sukopi mea viriviri leipe soa, karu foromai ereve eka hariaharia karu la arero tai lariōvi itipe. Are areve mai posa ere farafarapo voa miavi ereve eka la lei lareva leipe reha.

⁴¹ Harisu ta karu rauapo kiripi maria voa forera maea fi a’ o mō isa moiape, A Ualare ve Atute! A—, are erero o erere a’ ereve o la lei safutōpe, ipi are Keriso ere lea la ore leipe eavia.

Iesu karikara hariaharia voa itoro ape

⁴² Soka sare pataipe lea mea are itei, furuka oti merava voa kavōpe. A—, karu sitavu arero eli eli, arero sukaeōpe soa ere arero sasaukōpe, are erero kiripi levi soeai vei.

⁴³ A—, are erero mō ōpe, Ara Ualare ve basileia ve Ovoro Lareva la karikara hariaharia ta itoro ari ao; ipi araro itapi meipeta eite reha.

⁴⁴ Soka are Iuda karu ve mea ve sunako uvi hariaharia voa itoro ō vovo meiape.