Luka 21 - Testamenta Áre 1983 (Toaripi PNG)

Ua lelesi aea sa omopa posaseōpe meru moni

¹ Soka are ofae moravi, pisoso karu ereve meru moni la moni oroasi voa paparaeaiape mai la ofae fofoisaiape.

² Are ua lelesi merava farakeka aea moni kaekaelese oraka la paparaeōpe ta eovi,

³ mō ōpe, O ara ero o kofa la moi, lea ua lelesi merava moni rovaea kofa la moni oroasi voa paparaeaita reha, aea are sa karu hariaharia foromai la sapatai.

⁴ Ipi lea karu hariaharia foromai ereve moni rauapo voa hohoi la fari oroasi voa paparaeai, a—, are areve merava soa areve ovi meita moni foromai la paparaeai, areve makuri la lei toaraita etau foromai reha.

Ierusalema maso uvi la toa foforukai o

⁵ Soka karu hea Maso Uvi ve maeahoa vei laua sukavaiape, are fave lareva ita meru etau ita moupa leipe eavia. A—, are mō ōpe,

⁶ E ofae eavaipeta mea etau, sare aite forerai roi lea mea mōvoa eaeipeta fave koru farakeka aea la areve oti kofa voa levi kiripi eaeava roi, erero foromai la toa foforukai roi.

Heafo ita haisora ita leita soasoa

⁷ Soka ere arero lalasi mō leipe, Satiriaraita Papuvita e, lea etau leasauka forerai roi; aea lea etau leiti vei leita soa ve peise lekōru?

⁸ Iesu mō ōpe, Kiva leitia, karu ero apeva vuteai ave. Karu rauapo arave rare ita foreri ere elore elore vei mō ari roi, Ara Keriso, aeata, Soa haekao loita meha. A—, erero aitetei levi roroava.

⁹ Soka e marehaukai aeata heohea ve fari la mapaita, a—, tore levi leitia; ipi lea etau rauapo omopa forerai roi, a—, soa sarapaita soa utohoa kao.

¹⁰ Are o aeata mō ōpe, Toruipi hariaharia ere toruipi hariaharia karu ita marehaukai vei itotea itotea ari roi, aeata basileia aea basileia haria ita sosori ari roi;

¹¹ aea pupuiōvu metameta lō patei lō patei lei, aea posera aea fafarapaita eka soasoa voa ta leiti roi; lei tore leita etau etau aea kauri ve peise metameta ta forera forera ari roi.

¹² A—, lea etau forerai auke leita soa, ere ero sukafori paea, ero hasiōvi, sunako ve kōto aeata dibura voa ero lariōvi, aea e king karu aea gavana karu ita ve omopa voa forerai roi ipi arave rare vei.

¹³ Soa lareva reha e sa ore leita etau la pisiri vavavai vei.

¹⁴ Eve haiiri mōfeare kekese leitia, e haiiri everori levi seseōvaia;

¹⁵ ipi ara sa ape o haiovoro ita la ero miarai roi, ero sosori oita karu tava o lea o la sukavuteai vei usoso levi leiti roi.

¹⁶ Eve oalou‐ita, aea maraiosu, aea paumarehari, aea moraitai‐tai ita sa ero kōto vei miarai roi, aea eve karu hea la lōri paea opai roi.

¹⁷ Karu foromai arave rare vei ero kaifa leiti roi.

¹⁸ A—, tui farakeka eve harofave voa levi veverapai roi.

¹⁹ E haiiri rofo lei pavaita, a—, e makuri lōri ovai roi.

Ierusalema la saroroapai roi

²⁰ A—, e Ierusalema maola karu sitavu sa eakoa toepi elapaita la ofae eavaita lea mea, ore leitia arero saroroapaita soa haekao loita reha.

²¹ Lea soa voa Iudea mea voa pepeita karu raepa voa oroaia, aea karikara iri voa pepeita karu arero kiripi maria voa oroaia, aea maria voa roroaita karu karikara voa levi oropaia.

²² Ipi kitou ita kaiae tava miaraita sare reha, uka siseita o foromai la o kofa lei forerai vei.

²³ A—, lea sare sare voa ére ita uamori aea kō savuaita uamori ita vei ahai‐e! Ipi haisora rovaea mearovaeka voa forerai roi, aeata kitou rovaea mea toruipi karu vei.

²⁴ Marehaukaita soi ve tao sa ereve karu hea la toa putei, aea hea la fasi toruipi‐ipi hariaharia karu foromai ve aru voa taravi fafarapai roi; aea toruipi haria karu Ierusalema la mora sa pōvi sari roi pepepe lea toruipi haria karu ve siahu ve soa kaleiti roi.

Karu ve Atute sa forerai soa

²⁵ Sare aea papare aeata koru voa peise rauapo muia muia ari roi; aeata mearovaeka voa torutoru karu haisora lei haiiri kapekapeai roi, makaikara aea aroaro ita ve hohororo rovaea vei.

²⁶ Karu hai foromai isei, mearovaeka voa forerai vei leita lea etau vei haikavora lei maea opaopa ari roi; ipi kauri ve siahu etau etau ta lulalula ari roi.

²⁷ Lea mea Karu ve Atute mea‐e voa, siahu ita sosorusosoru rovaea ita kotita la karu sa misilei fofoisai roi.

²⁸ A—, mea etau sa foreraita lea mea, misilei eve soso moravaia, ipi ero fareōvi lei makuri leiti soa haekao loita reha.

Malaila tola sa satiriaraita o

²⁹ Soka are parabole o erero mō moipe, Malaila tola ō tola hariaharia foromai ita la haikaeaia.

³⁰ Ere sa rorore faita lea mea, e elore mai sa eovi ore loita reha, avora soa haekao la loi.

³¹ Soka lōfeare, e mea etau sa mōri foreraita la ofae eavaita lea mea e ore leitia, Ualare ve basileia haekao loita reha.

³² Ara ero o kofa o la moi, mea taotao levi kaleiti roi tetete lea etau foromai forerai ao.

³³ Kauri ita mearovaeka ita kaleiti roi, a—, arave o levi kaleiti roi.

Kiva leitia

³⁴ A—, e kiva kofa leitia, larietau rauapo aeata maeakakare leita ma la la’ la’, mea makuri ve haikavora leita etau ita sa eve haiiri la ovi aieri, lea sare ero tai hōvakao forerai ave.

³⁵ Ipi are usoso saro feare mearovaeka ve soasoa foromai voa pepeita karu tai forerai roi.

³⁶ Lea vei ovoako leitia, aea loki taupaia, e rofo lei mea forerai vei leita etau foromai la safaukai vei, aeata e Karu ve Atute ve omopa voa soi pavai vei.

³⁷ Lea soa voa Iesu sare soasoa Maso Uvi voa satiriaraiape, a—, faita soasoa voa are maria voa te Olive Raepa voa iavaiape.

³⁸ Aea miori kofa voa karu foromai areve o mapai vei arero tai Maso Uvi voa foreri kokorukaiape.