Luka 20 - Testamenta Áre 1983 (Toaripi PNG)

Lalasi o Iesu ve siahu vei

¹ Sare farakeka voa are Maso Uvi voa karu la satiriōri Ovoro Lareva itoro ape soa, maso harofave karu ita Safu Karoro ore karu ita opasora‐sora ita foreri,

² arero mō ōpe, Elaro moia, a mea leita siahu ve ipi leavoa, aeata mea siahu aro leisa miarōpe ei?

³ Are erero tava o mō ōpe, Ara ta o farakeka ero lalasi leiti ao; araro o moia,

⁴ Ioane sa leiape lea bapatiso ve ipi leavoa, Ualare voa ei, ō karu voa ei?

⁵ Ere elore elore o mō seseōvōpe, Ereita mō arit’ oria, Ualare voa, a—, are ereitaro mō ari roi, E arero sukaerereai auke ipi levea?

⁶ A—, ereita karu voa o arita, a—, karu foromai ereitaro fave sa toai roi; ipi ere haiiri kekese kofa Ioane are peroveta vita reha.

⁷ Soka ere tava o mō ōpe, Areve forerōpe soa ela ore kao.

⁸ Lō mei, Iesu erero mō ōpe, Ara ta mea mai leipeta siahu ve ipi ta ero levi moi roi.

Parabole o vine oti kiva karu maealolo vei

⁹ Lea soa are mea parabole o karu la mō moipe, Karu farakeka vine forova oti porōpe. Pori are lea vine oti tava itai ovai vei otoare a’, vine forōva arita karu hea sa kiva leiti vei miōri, maea lei oti haria voa te soa savori lōvoa peiape.

¹⁰ Fare taita pisahu forerōpe lea mea, are sarufa karu aea la vine kiva karu tai itapōpe, ere vine oti ve fare hea arero miarai vei; a—, lea vine kiva karu arero tola sa teavi sa’ sa’ arero maea harokao larivatōpe.

¹¹ Aea are sarufa karu aea la ata itapi, ere arero ta tola sa teavi sa’ sa’, arero lei maeamariti foromai lei, arero maea harokao larivatōpe.

¹² Soka are oroisoria soa karu aea la itapi, ere arero ta toa maea tofei maria voa mutapōpe.

¹³ Lea mea vine oti ve papuvita mō ōpe, Ara leati roi? Ara arave haikakare araita atute la itapi, ere arero taivotaita varo.

¹⁴ A—, lea vine kiva karu o elore elore a’ mō ōpe, Hasu ovai o oita vita kofa meha; ereita arero paeaia, areve oti lōri ovai vei.

¹⁵ Lō mei ere arero ovi vine oti ve koravasa voa toapi arero paeōpe reha. Soka vine oti ve papuvita erero lea’ leiti roi?

¹⁶ Are koti roi, lea oti kiva karu la saroroapi, vine oti la fareōvi, kiva leiti karu haria la miarai roi. Ere lea o la mapōpe soa ere mō ōpe, Are kaka eaea!

¹⁷ A—, are erero ofae fofoisa mō ōpe, Buka voa uka siseita mea o ve eite lekōru? Uvi turaita karu sa haiarara lei eite auka o ōpe lea fave, are arori lalave fave lei la eaea.

¹⁸ Lea fave ve arori voa putoita lea karu foromai furira taratara leiti roi; a—, are ereve arori voa oaita lea karu foromai la toa hohōroai roi.

Kalsara la miaraita takis moni

¹⁹ Lea soa kofa voa Safu Karoro ore karu, maso harofave karu ita arero sukafori paea vei seseōvōpe, ipi ere ore are lea parabole o ere vei moipe, a—, ere karu la tore leipe.

²⁰ Soka ere soa kofa vei arero ofae sa kiva lei, aea okofa harapi leita karu maeahahauhahau la itapōpe, ere areve laua la mapi ovi havara apeva arero paraea, gavana ve fasaita siahu voa arero miarai vei.

²¹ Soka ere arero lalasi mō leipe, Satiriaraita Papuvita e, ela ore a o haura la mei satiriarai vovea, aea karu ve soso o ari sore, a—, Ualare sa haikaeaita mai la okofa ita satiriarai vovea.

²² Takis moni Kaisara la miaraita haura ei, ō haura kao ei?

²³ A—, Iesu ereve maeahahauhahau la ore lei, erero mō ōpe,

²⁴ Silva moni farakeka aea la araro aura muiai. Mea ove ita karoro ita leive? Ere mō ōpe, Kaisara ve.

²⁵ Iesu erero mō ōpe, Soka Kaisara ve etau Kaisara la miaraia, aea Ualare ve etau ta Ualare la miaraia.

²⁶ Ere karu ve omopa voa are moipe lea o la ovi lei kaiae leiti vei ore kao; a—, ere areve tava o vei haihava lei, ape kavuarōpe.

Opi ata itoita laua

²⁷ Soka Sadukea karu, opi ata levi itoi o la satiriaraita lea karu hea, arero tai foreri arero lalasi lei mō ōpe,

²⁸ Satiriaraita Papuvita e, Mose ereita vei o mōri ukōpe, karu aea ve paua opi are ua ia, a—, atutemori auke leitita, a—, areve marehari sa lea ua vitōva la laea, atutemori areve paua ve rare ita lei epai vei.

²⁹ Soka paua ita mariosu ita seven pepeiape; pepea omopa vita ua laea aea mere auke ita opōpe;

³⁰ opi, aite vita lea ua ta laea opi,

³¹ aite oroisoria vita ta reha, aea lea karu seven foromai ta lōfeare, ere atutemori auke ita opaiape.

³² Aite kofa voa lea ua ta opōpe.

³³ Soka opi ata itoita soa voa arero leisa ovai roi? Ipi lea karu seven sa arero laeaiape eavia.

³⁴ Iesu erero tava o mō ōpe, Mea mearovaeka soa ve karu ere vita ita, ua ita laeaitore.

³⁵ A—, aite makuri ve soa, aea opi ata itoita soa la ovai vei mai haura leita karu ere vita ita ua ita levi laeai roi.

³⁶ Ere usoso aneru fefeare lei, aea ata levi opai roi. Ere Ualare ve atutemori leiti roi, ipi ere opi ata itoita soa ve karu eavia.

³⁷ Soka karu opi ata itei makuri leiti o Mose sa tola meke ve fari voa uka la eaea, are Papuvita rare la aravi mōri moipe, Abrahama ve Ualare, Isako ve Ualare, aea Iakobo ve Ualare.

³⁸ Lea o ve eite lea karu ere makuri, ipi are opaita karu ve Ualare kao, a—, makuri karu ve, ipi karu foromai are vei makuri leititore.

³⁹ Safu Karoro ore karu hea tava o mōri moipe, Satiriaraita Papuvita e, ave tava o lareva reha.

⁴⁰ Lea ve aite voa ere arero ata lalasi ivara ita leiti kao.

Lalasi o ipi Davida ve atute vei

⁴¹ Soka Iesu erero lalasi lei mō ōpe, Karu Keriso are Davida ve atute lea o la leafeare moi vōvea?

⁴² Ipi Davida areve elore mai sa Salamo buka voa o mōri moipe, Papuvita Iehova are arave Papuvita la mō ōpe, Arave mai toare voa avaia,

⁴³ tetetete ara ave ote karu la ovi, ave mora posa ve ora voa miavai ao.

⁴⁴ Lōfeare Davida are Keriso la Papuvita rare aravaita, a—, Keriso areve atute leafeare leitita ore ei?

Safu Karoro ore karu ve mai maealolo

⁴⁵ Soka karu foromai arero mapaiape soa, are areve satiriaraita karu la mō ōpe,

⁴⁶ Safu Karoro ore karu vei kiva lei vovo roroava; ere mopaita puta savori ita mora kerori kerori a’, aea itaea leita otioti pisiri voa karu sa erero maeatita o moi vei, aea sunako uvi voa toare kiriposa, aea sosoka soasoa voa toare oti voa avai haikaea vovo roroa vovea.

⁴⁷ A—, ere ua vitōvavitōva ve etau maeamaea ta maravaita karu, aeata ere veveu o si ita lohalai toaitore. Soka kaiae ve tava rovaea‐rovaeaeite erero aite miarai roi.