Luka 19 - Testamenta Áre 1983 (Toaripi PNG)

Sakaiusi ve fari

¹ Iesu Ieriko karikara voa oropi karikara pisiri voa teraiape.

² Soka karu rare Sakaiusi lōvoa peiape; are takis fareovaita harofave vita, are pisoso ta rovaea.

³ Are Iesu la ofae eovi ore leiti vei sukahoavea haikaeōpe, a—, usoso leiti kao ipi karu sivirikapo aea are maea tete eavia.

⁴ Soka are omopa voa soea vo te, sukomoro tola voa pataipe Iesu la ofae eavai vei, ipi are lea oti la foapai vei leipe eavia.

⁵ Iesu lea oti voa foreri misilei arero mō ōpe, Sakaiusi e, lavelave faukaia, ipi ara iso sare ave uvi voa pavai roi.

⁶ Lō mei, are lavelave fauka, arero hailareva ita maeafukapōpe reha.

⁷ A—, karu foromai lea la ofae eovi o ruruku a’ mō ōpe, Are iri kaiae karu ve uvi voa pavai vei teraita reha.

⁸ A—, Sakaiusi soi pōvi Papuvita la mō ōpe, Papuvita e, mapaia; ara arave maea ve etau la faea itai merava karu la aiorai roi; aea ara karu ve etau maeahahauhahau lei auraka ovait’ oria, a—, ara lea ve soa orakaraka topiari arero lōri miarai roi.

⁹ Iesu arero mō ōpe, Iso sare makuri leita soa mea uvi voa foreraita meha, ipi mea vita ta Abrahama ve atute.

¹⁰ Ipi Karu ve Atute veverapi roroaita karu la eli maravi lei makuri leiti vei koti mea.

Parabole o moni koru ten vei

¹¹ Lea o la mapaiape karu la Iesu sa o topiari parabole o ta moipe, ipi are Ierusalema haekao lei forerōpe, aeata ipi ereve seseōvaita haiiri Ualare ve basileia utohoa forerai vei leipe eavia.

¹² Soka are mō ōpe, Lohio karu farakeka oti ára voa basileia harofave vita ve siahu ovi aea lōri ata koti vei terōpe.

¹³ Soka are areve sarufa karu ten la isa, aea gold moni koru farafarapo erero farafarapo la miōri mō ōpe, Mea moni la ovi itaea leita tivi la lei lei tetete ara ata kotita soa.

¹⁴ A—, areve karikara karu arero kaifa lei, meu karu areve aite voa mō ari vei itapōpe, Ela mea vita elave basileia harofave vita leiti vei haikaeaia kao.

¹⁵ Soka are basileia harofave vita ve siahu ovi ata keroripe soa, are moni erero miarōpe lea sarufa karu la arero tai koti vei moipe, ere itaea leita tivi leafeare are lea la ore leiti vei.

¹⁶ Omopa vita areve soso voa foreri mō ōpe, Papuvita e, ara ave moni koru farakeka sa tivi lei lei ten topiari sukaeaita meha.

¹⁷ Lō mei, are arero mō ōpe, Lareva reha, sarufa lareva e, ipi a tivi seika voa ave leita mai haura eavia, a karikara ten ve harofave vita leiti roi.

¹⁸ Aite orakoria vita koti mō ōpe, Papuvita e, ara ave moni koru farakeka sa tivi lei lei five topiari sukaeaita meha.

¹⁹ Lō mei, are arero mō ōpe, A ta karikara five ve harofave vita leiti roi.

²⁰ Sarufa vita aea ta koti mō ōpe, Papuvita e, ave moni koru farakeka meha; ara arero muko sa fasi kiva lei mea;

²¹ ipi ara aro tore, a haiiri kere vita eavia; a sa miavai auke leita lea etau la fareōva vovea, aea a sa vipai auke leita lea oru mere ve fare la sarapa vovea.

²² Are arero mō ōpe, Sarufa maealolo e, ara ave elore o sa aro seseōvi kaiae o aro ari roi. A ore ara haiiri kere vita, ara miavai auke leita lea etau la fareōvi, aea ara vipai auke leitita lea oru mere ve fare la sarapa vovea.

²³ Soka a arave moni la ovi bank karu la miōri, ara ata koti ara moni aea arero topiaraita tava ita la ata ovai vei lealoi?

²⁴ Are haekao pepeita karu la mō ōpe, Lea moni arero fareōvi, aea moni koru ten ovaia karu la miaraia.

²⁵ Ere arero mō ōpe, Papuvita e, are moni koru ten ia.

²⁶ Ara ero o mō auai, Etau ovi meita lea karu la etau maea aeata topiari miarai roi; a—, etau ovi mei auke leita lea karu, are ovi meita lea etau orakafofa la farai roi.

²⁷ Soka, arave ote karu, ara ereve harofave vita leiti vei haiarara leita lea karu la mōvoa lariōvi koti, arave omopa voa paeaia.

Iesu Ierusalema voa pataipe

²⁸ Soka Iesu lea o mei roroka lei, are ereve omopa voa maea lei, Ierusalema voa au pataipe.

²⁹ Are Betefage aea Betania, Olive Raepa karikara oraka ve haekao voa forerōpe soa, are areve satiriaraita karu oraka la itapi,

³⁰ mō ōpe, Euka omopa voa eaeipeta karikara voa patei, euka lōvoa oropaita lea mea, euka fasi peipeta asini áre la ofae eavai roi, lea asini voa karu farakeka aea sa forea avaia kao. Arero felaukea mōvoa lariōvi kotiria.

³¹ Karu aea eukaro lalasi mō leit’ oria, Euka arero felaukeaipeta ipi lekōru vei? o mōri moia, Ipi Papuvita arero haikaeaipeta eavia.

³² Soka lea itapōpe karu oraka isei, aea usoso are moipe o feare ereuka lōri eavōpe reha.

³³ Ereuka asini áre la felaukeōpe soa, areve papukoru ereukaro mō ōpe, Euka asini áre la felaukeaipeta ipi levea?

³⁴ Euka mō ōpe, Papuvita arero haikaeaipeta eavia.

³⁵ Soka ereuka arero Iesu tai lariōvi kei, ere ereve maea puta asini ve kōu‐uti voa fururukea, ere Iesu la lei areve arori voa forea avōpe.

³⁶ Are isaiape lea mea ere ereve arori puta otiharo voa fururukeaiape.

³⁷ Are Ierusalema haekao lei, Olive Raepa ve faukaita otiharo voa forerōpe lea mea, are sa satiriaraiape karu sitavu foromai ere ofae eavaiape lea haihava leita etau foromai vei hailareva lei, i rovaea ita Ualare la maeati

³⁸ mō isa moiape, Papuvita ve rare ita kotipeta King lareva ita meava! Kauri voa tairu, koakoa‐eiteapo voa sosorusosoru leitia.

³⁹ Lea mea Farisea karu hea karu sitavu voa Iesu la mō ōpe, Satiriaraita Papuvita e, ave satiriaraita karu sa moipeta lea o la o erere aria.

⁴⁰ A—, are tava o erero mō ōpe, Ara ero o mō auai, ere ape kavuarait’ oria, mea fave sa isa moi roi.

⁴¹ Are haekao kofa lei, karikara rovaea la eavōpe soa, are are vei ovororo sisapi fi o a’,

⁴² mō ōpe, Ahai‐e! a ave tairu ve ipi iso sare voa ore leit’ oria, a lareva leiti lare! A—, faitora lea etau ave ofae voa sasauka laisisea.

⁴³ Ipi sare aite forerai roi lea mea ave ote karu mare mea lōva sa eli elapi aro eakoa toepi, itai itai foromai voa aro sasaukai roi.

⁴⁴ Ere aro mea voa toa foforuka, ave karu ita la saroroapi kaleiti roi; a voa eaeipeta fave koru farakeka aea la areve lea oti kofa voa levi kiripi eaeava roi; ipi a Ualare aro tai aro lei makuri leiti vei foreraita soa la a haveva leitita eavia.

Maso Uvi voa leipe mai

⁴⁵ Soka Iesu Maso Uvi voa oropi, aea itaea lei maravaiape karu la toa liōvea,

⁴⁶ erero mō ōpe, Safu Buka voa o uka laisisea, Arave uvi veveu leita uvi rare aravai roi; a—, e arero lei toarōrisa torea leita karu ve arafukaita uta la leipea.

⁴⁷ Soka sare sare foromai voa Iesu Maso Uvi voa satiriaraiape. Maso harofave karu, Safu Karoro ore karu ita, aeata opasora‐sora ita arero paeai vei seseōvaiape.

⁴⁸ A—, ere lōfeare leiti vei mai la sukaeai kasirau, ipi karu foromai areve o la mapai vei haihahari kofa leiape eavia.