Luka 17 - Testamenta Áre 1983 (Toaripi PNG)

Kaiae la sasuka mutapai vei

¹ Soka Iesu areve satiriaraita karu la mō ōpe, Karu la kurea lei kaiae leita soasoa forerai roi; a—, kaiae la lei foreraita lea karu vei, ahai‐e!

² Uiti fare rorokea faihohōroaita fave rovaea areve kōvōrehau voa suka roroka lei, arero makaikara voa toapi paroroaita, lōfeare mai are vei lareva ia. A—, are mea karu kaekae la kurea ere kaiae leitita, a—, are vei maealolo kofa leiti roi.

³ E kiva kofa leitia; ave marehari kaiae leitit’ oria, arero o erere aria, aea are haiiri kerorita, a—, areve kaiae sasuka mutapaia.

⁴ Sare farakeka voa are soa seven aro kaiae leitit’ oria, aeata soa seven aro tai kerori o mō arita, Ara haiiri kerori; a—, a areve kaiae la au sasukaia.

Iesu areve aposetolo karu la lei rofo leita o

⁵ Soka aposetolo karu Papuvita la mō ōpe, Elaro lei ela aro foromai sukaerereai vei.

⁶ Papuvita tava o erero mō ōpe, E usoso sinapi mere farakeka ve rovaea feare sukaerereai oria, e mea oro tola la o mō arita, Likilea ita fareōvi isei makaikara voa vipai vei, aea lea tola ave o la mapi kakeva leiti roi.

⁷ Soka eve karu leisa sarufa karu ia, aea lea sarufa karu siva sukaita ō mamoe kiva leita tivi lei roroka lei, uvi voa kotita soa arero o mō ari roi ei, A utohoa koti ave larietau laria?

⁸ Kasirau! a—, e arero mō moi roi, Arave larietau pisosi, ave mate fasi, larietau araro omopa posasea, ara larietau ma ita la’ roroka lei, aite a ta larietau ma ita laria.

⁹ Are lea sarufa karu la maeati roi ei, ipi are arero o moita tivi la leitita lea vei ei?

¹⁰ Kasirau; e ta lōfeare, e ero o moita lea tivi foromai la lei roroka leita lea mea, e elore elore o mō ari roi, Ereita sarufa lareva kao, ipi ereita sa leitita lea tivi, sarufa la haisa leitita tivi eavia.

Iesu aea pokea eka karu ten

¹¹ Soka are Ierusalema voa patai vei Samaria itai aea Galilea itai soa ve aru voa sariva lei meiape.

¹² Meme are karikara aea voa oropōpe soa, pokea eka karu ten arero sukaea ára‐ita soi pōvi,

¹³ arero isa mō moipe, Iesu, Papuvita e, elaro rapi maeaforoe leitia.

¹⁴ Soka are erero ofae eovi erero mō ōpe, Te, eve maea la maso tivi karu la muiaia. Lō mei, ere otiharo voa teraiape soa ereve maea ovava au leipe.

¹⁵ Soka ereve karu farakeka, areve eka sa lareva leipe la ofae eovi, are ata kerori, Ualare la ape rovaea ita maeati,

¹⁶ Iesu ve mora ipi voa sukakoka hiopi arero o lareva ōpe. Soka are eite Samaria karu.

¹⁷ Lea mea Iesu mō ōpe, Karu ten maea ovava leiti kao ei? lea karu nine leavoa?

¹⁸ Mōvoa ata kerori Ualare la maeatita karu kasirau, a—, mea toruipi haria karu sa haria ei?

¹⁹ Soka are arero mō ōpe, Itei maea lei teraia; ave sukaerereaita haiiri sa aro lei lareva loi.

Ualare ve basileia foreraita mai

²⁰ Soka Farisea karu arero lalasi lei mō ōpe, Ualare ve basileia leasauka forerai roi. Soka are tava o erero mō ōpe, Ualare ve basileia foreraita soa, karu sa ofae sa eavaita etau feare kasirau.

²¹ Aea karu ta o mō levi ari roi, Ofae eavaia, are mōvoa, ō are lōvoa; ipi Ualare ve basileia eve aru voa.

²² Lea mea are areve satiriaraita karu la mō ōpe, Soa aite forerai roi lea mea e Karu ve Atute sa pisiri muiaita sare farakeka la ofae eavai vei haikaeai roi, a—, eite e arero ofae levi eavai roi.

²³ Aea karu hea ero o mō ari roi, Ofae eavaia, are lōvoa, ō are mōvoa; a—, e erero tai levi teraia, erero aite ta levi taia.

²⁴ Ipi usoso kevaro sa kauri ve itua‐tao soa kauri ve itua‐tao aea voa mavaita feare, Karu ve Atute ta areve sare voa mai lōfeare leiti roi.

²⁵ A—, mea soa ve karu sa arero hehea rauapo lei, arero ta haiarara lei omopa sukavuteai ao.

²⁶ Usoso Noa ve soa voa leiape mai feare, Karu ve Atute ve soa voa ta lōfeare leiti roi.

²⁷ Ere larietau ma ita lalape, ere vita ita ua ita laeaiape, pepepepe Noa vavaea voa foreōpe lea sare voa ma sa patei aieri erero lōri saroroapōpe.

²⁸ Usoso Lota ve soa voa leiape mai ta lōfeare, ere larietau ma ita la lalape, ere etau maeamaea itaea lei maravi itaea lei miaraiape, hasu toerori, uvi ta turaiape.

²⁹ A—, Lota sa Sodoma kiripi maea leipe lea sare voa solifara a ita kauri voa sisōvi fauka, erero foromai la sa’ saroroapōpe.

³⁰ Karu ve Atute sa pisiri muiaita sare ta lōfeare leiti roi.

³¹ Lea sare voa uvi maria voa meita, aea areve maea ve etauroro uvi iri voa siseita lea karu erero maravai vei uvi voa levi oropai vei; aeata forōva oti voa meita lea karu uvi voa ata levi kerori vei.

³² Lota ve ua la haikaeai vei.

³³ Areve makuri la kiva leiti vei seseōvaita lea karu areve makuri veverapai roi, a—, areve makuri la veverapai vei seseōvaita lea karu areve makuri la ovai roi.

³⁴ Ara ero o mō la auai, Lea soa voa karu orakoria faita voa, ivutu posa farakeka voa iroropi siseita, a—, farakeka la fareovai roi, farakeka aea la kiripai roi.

³⁵ Uamori oraka fareho uiti fare la rorokea faihohōroaita, farakeka la fareovai roi, farakeka aea la kiripai roi. [

³⁶ Karu orakoria forōva oti voa forōva arita; a—, farakeka la fareovai roi, farakeka aea la kiripai roi.]

³⁷ Soka ere arero lalasi lei mō ōpe, Papuvita e, soa leavoa? Iesu tava o mō ōpe, Opaita maea sa eaeita, lōvoa sarōva laloita ori kokorukai roi.