Luka 15 - Testamenta Áre 1983 (Toaripi PNG)

Parabole o veverapaita mamoe vei

¹ Soka takis fareovaita karu aea iri kaiae leita karu foromai areve o la mapai vei arero heōhea roroaiape.

² A—, Farisea karu aea Safu Karoro ore karu o ruruku a’ mō ōpe, Mea vita iri kaiae karu la maeafukapi larietau ere ita fareho larō vovea.

³ Soka Iesu mea parabole o erero mō moipe,

⁴ E voa karu leisa, are mamoe 100 ia, a—, are ere voa farakeka la veverapaita, a—, are 99 kavuru lareva oti voa kiripi, veverapaita lea mamoe la eli eli tetete are arero ofae eavaita soa.

⁵ Are arero eavaita lea mea, are hailareva ita arero ovi areve avea‐ipi voa vipi sesetopi,

⁶ elore voa kerorita lea mea, are areve paumarehari areve haekao pepeita karu ita la isa kokoruka, erero mō ari roi, Ara ita hailareva leitia, ipi ara arave lea veverapaita mamoe la sukaeaita meha.

⁷ Ara ero o mō la auai, Lōfeare mai kaiae leita karu farakeka haiiri kerorita, a—, are vei kauri voa hailareva rovaea leiti roi, a—, haiiri kerori haikaeai auke leita lea karu 99 vei hailareva lōfeare levi leiti roi.

Parabole o veverapaita moni vei

⁸ Aeata moni koru ten ita ua leisa, are farakeka la veverapaita, a—, are lamepa a mopi, uvi tailea tailea eli eli te eavai roi.

⁹ Sukaeaita soa are areve maeapavora aea haekao pepeita uamori ita la isa kokoruka mō ari roi, Ara ita hailareva leitia, ipi ara veverapaita lea moni koru la eavaita meha.

¹⁰ Ara ero o mō la auai, Lōfeare areve mai kaiae vei haiiri kerorita lea karu farakeka vei kauri ve aneru ta hailareva leiti roi.

Parabole o veverapōpe atute vei

¹¹ Are o aeata mō ōpe, Karu aea atute orakoria ia.

¹² Soka atute kokoe areve oa la mō ōpe, Oa e, a sa aite miarai hasu la faea, arave itai faitora araro miaraia. Lō mei, oa areve etau foromai la faea ereukaro miarōpe reha.

¹³ Sare orakafofa orapōpe aite voa, lea atute kokoe areve ovi meita etau foromai la tava moni vei itaea lei miōri miōri kalei, sariva lei mea ára voa au terōpe, Lōvoa are maeakakare mai lei, areve moni foromai la lō miara lō miara lei kaleipe.

¹⁴ Soka are areve lea moni sa kaleipe soa, posera rovaea lea mea voa foreri, aea are merava lei meiape.

¹⁵ Meme are te lea mea ve karikara karu farakeka aea voa topiari, aea are arero areve kavuru oti voa ita savuai vei itapōpe.

¹⁶ Are areve ére popai vei ita sa lape tola fare ruru la lari vei haikaeaiape, ipi karu ta larietau arero miarai kasirau.

¹⁷ Soka areve haiiri fapōpe lea mea, are elore haiiri voa mō ōpe, Arave oa ve tivi karu leafere larietau rauapo lalō vovea aea hohoi ta ia, a—, ara mōvoa eroa sa’ opai vei la roi meha.

¹⁸ Ara itei arave oa tai te arero o mō ari roi, Oa e, Ualare ve omopa voa aeata ave soso voa ara kaiae kofa,

¹⁹ araro rare ave atute rare aravai vei usoso kasirau; araro ave tivi karu farakeka aea feare leiti vei.

²⁰ Soka are itei areve oa tai terōpe reha. A—, are ára‐ita itipe lea mea areve oa arero ofae eovi maeaforoe lei, soea arero pasavi evera sisipe.

²¹ A—, atute arero mō ōpe, Oa e, Ualare ve omopa voa aeata ave soso voa ara kaiae kofa, araro rare ave atute rare aravai vei usoso kasirau.

²² A—, oa areve sarufa karu la mō ōpe, Lavelave mopaita puta lareva kofa la oviti arero mopaia, aea lavekufi areve mai lakoka voa oreaia, aea tamaka areve mora oraka voa mopaia.

²³ Aea tapare leiti vei savuaita boromakao mere ta ovi savi, ereita la’ hailareva leiti roi.

²⁴ Ipi arave mea atute au opaita, a—, ata makuri loita meha; are au veverapaita, a—, ata eavaita meha. Soka ere hailareva leipe reha.

²⁵ A—, areve atute toare forōva oti voa meiape; are koti uvi haekao leipe soa, are fi foroe etau e‐oi ita ve hohororo la mapi,

²⁶ sarufa karu farakeka aea la isa lea etau ve eite vei lalasi leipe.

²⁷ Lei, are arero mō ōpe, Ave marehari kotita reha, aea ave oa tapare leiti vei savuaita boromakao mere la savai, ipi are arero maea kofa la lareva ita sukaeaita eavia.

²⁸ Soka atute toare kitou lei uvi voa oropai vei haiarara leipe. Lei areve oa maria voa arero lei haimeta leiti vei forerōpe.

²⁹ A—, are areve oa la tava o mō ōpe, Mapaia, ara sisoro rauapo ave tivi lei lei, ave o farakeka la kaeava ari sore; a—, a nani mere farakeka la araro miarai sore, ara arave maeapavora karu ita la’ hailareva leiti vei.

³⁰ A—, ave mea kotita atute, are ave maea ve etau la maravi, saruka uamori la lō miara lō miara lei kaleitita lea vita, aea a tapare leiti vei savuaita boromakao mere la are vei savaita reha!

³¹ A—, oa arero mō ōpe, Atute e, a ara ita fareho pea vovea, aea arave etau foromai ave etau.

³² Mai haura meha, hailareva ita havōu leiti vei, ipi ave mea marehari opaita, a—, makuri ata loi; veverapaita, a—, ata eavaita meha.