Kolose 4 - Testamenta Áre 1983 (Toaripi PNG)

¹ Papukaru e, e mai haura aea mai lareva ita eve fasaita sarufa karu la leitia; mea la ore leitia, e ta Papuvita ia kauri voa.

² E Ualare la loki poetapai auke ita lei peava; aea haiiri ovoako lei, Ualare la maeatia.

³ Ualare la ela vei ta loki leitia, are utape ela vei fapi, ela Keriso ve hohore o la itoro ari vei; araro fasi peipeta ipi reha.

⁴ Lea vei Ualare la loki leitia ara lea o la ovava ita omei muiai vei, usoso araro miarōpe lea tivi feare.

⁵ Maria voa pepeita karu ve omopa voa haiovoro ita lei vovo roroava; leita soa lareva la ore lei ovai peava.

⁶ Haiforoe o ita laua sukavai peava, aea sōlo feare sa eve o la lei tapare lei peava; lōfeare vei e tava o haura karu hariaharia la miaraita ore.

Sisa o foroe

⁷ Arave fari foromai Tukiko sa ero omoi roi. Are arave haikakare leita marehari aea toaraita tivi vita lareva, aea Papuvita ve sarufa tivi voa arave maeapavora.

⁸ Ara arero ero tai la itapai, e elave leita mai la ore lei, aea are sa eve haiiri ta rofo leiti vei kureai vei.

⁹ Are ita farehoria, ara Onesimo ta la itapai, haikakare sa lei haifariseaita marehari reha, are ta eve karu farakeka aea. Ereuka sa mōvoa leipeta etau foromai ve fari la ero omoi roi.

¹⁰ Aristareko, ara ita fareho dibura voa fasi peita vita, aea Banabasi ve oemarehari, Mareko, ereuka ta maeaforoe o ero la aipea. E o Mareko vei evera sukaeōpe; are sa ero tai forerait’ oria, arero maeafukapaia.

¹¹ Iosua, areve rare aea ta Iusto, maeaforoe o ero ta la moipea. Iuda karu voa mea karu oroisoria sa haria ara ita fareho tivi lei vovea Ualare ve basileia vei, aeata ere sa araro lei rofo leiti vei toarai vovea.

¹² Eve karu aea, Epafara, Keriso Iesu ve fasaita sarufa karu, are ta maeaforoe o ero la moipea. Are soa foromai e vei Ualare la loki serea ita lei vovea, e haiiri sora ita kere ita soi popōvai vei, aea Ualare sa haikaeaita haiiri la ore kofa leiti vei.

¹³ Ara okofa la la moi, are tivi rovaea e vei lei vovea aea Laodikea ekalesia karu vei, aeata Hieropoli ekalesia karu vei ta reha.

¹⁴ Luka, haikakare leitita dokita karu aea Demasi ita maeaforoe o ta ero la moipea.

¹⁵ Ereitave paumarehari Laodikea voa maeaforoe o moia. Numufa, aea areve uvi voa kokorukaita ekalesia firu ita la maeaforoe o ta moia.

¹⁶ E mea karoro la eve aru voa muti roroka lei, arero ovi Laodikea ve kokorukai voa ta mutia. Aea e ta Laodikea paumarehari sa ero tai aite voa itapaita lea karoro ta mutia.

¹⁷ Akipo la o mō aria, A Papuvita voa ovōpe lea toaraita tivi la lei kekese kofa leitia.

¹⁸ Mea maeaforoe o la arao, Paulo, arave elore mai kofa sa ukai. Araro fasaita auri horou la hai levi safaia. Haiforoe leita meru e ita fareho lei peava.