Kolose 3 - Testamenta Áre 1983 (Toaripi PNG)

Makuri áre Keriso voa

¹ Soka e Keriso ita makuri voa moravi pepeita lea vei, e kauri voa siseita etau etau la elia, Keriso sa Ualare ve mai toare itai voa aiseseita lea oti voa.

² Arori voa siseita lea etau la maravai vei haikaeaia, mearovaeka voa siseita lea etau kao.

³ Ipi e opai feare leipe, aea eve makuri kofa Keriso ita Ualare voa arorisa roroa vovea.

⁴ Ereitave makuri ve eite Keriso reha, aea are pisirikao foreraita lea mea, e ta are ita sosorusosoru leita soa voa forerai roi.

⁵ Lōfeare vei eve maeasarōva sa haikaeaita maealolo etau hariaharia la paea opaia; herei mai, sirisiri mai, uamori heavita ita leita mai kaiae, maealolo la hahaea arita mai, aeata etau maravai vei liri arita mai, ipi lea aite kofa mai usoso apeva ualare ve ove la maso toaita mai feare reha.

⁶ Lōfeare mai foromai vei Ualare ve kitou kaeava karu tai forerai vei la roi.

⁷ Evera soa e ta lōfeare mai la leiape, e sa ereve aru voa roroaiape lea soa voa.

⁸ A—, faitora lea etau foromai la fari mutatapaia; irifae, kitou hehea, hasiavaita haiiri, kisari maealolo, ape laua maeamariti ta reha.

⁹ E elore elore apeva levi vuteaia; ipi e eve evera karu aea e evera leita mai ita la fōovi,

¹⁰ e karu áre la mopi roroka lei laepepea. Mea karu áre la arero pisosipe Ualare sa areve elore opape feare lei áre la leipea, ipi ero lei e Ualare la ore foromai leiti vei.

¹¹ Mea karu áre voa Helene karu aea Iuda karu ve eite hariaharia kasirau, peritome karu aea peritome auke karu ita, toru hariaharia karu aea furuka karu merava ita, fasaita sarufa karu aea pisiri voa roroaita karu ita ta eite farakeka, a—, Keriso sa haria eite kofa ia, aea are sa e foromai voa pea vovea.

¹² E Ualare ve karu; are ero haikakare lei areve elore vei ero haikaea maravōpe. Lea vei e mōfeare mai la puta feare mopaia: maeaforoe leita haiiri, haimafu, haiiri‐ipi, foroe hai, aeata mea savori kitou auke roroaita haiiri ta reha.

¹³ E elore elore morari vovo roroava. Karu aea maeapavora la kaiae vei havara paraeait’ oria, areve kaiae la felaukea mutapaia, usoso Papuvita sa eve kaiae la felaukea mutapōpe lōfeare.

¹⁴ A—, lea etau foromai ve arori voa haikakare ta puta feare mopaia; lea leita mai foromai la toepi lei farakeka leita etau are reha.

¹⁵ Keriso ve tairu sa eve haiiri la lei haura leiti roi; ipi Ualare sa lea tairu voa ero isa e maea farakeka feare lei toepi pepei vei. Ualare la maeatia.

¹⁶ Keriso ve ovoro eve haiiri voa areve etau lareva‐eiteapo ita peava. E salamo o, fara o, aeata ove ve aua ita elore elore haiovoro foromai ita kurea satiriōri fara feraia, Ualare la maeatita fara eve haiiri voa feraia.

¹⁷ E sukavaita o aea e leitita etau foromai voa, e Papuvita Iesu ve rare ita leitia; aea are voa Ualare Oa la maeati peava.

Kureaita ovoro

¹⁸ Uamori e, e eve elore elore vita heaea la mapi kakeva lei roroava, ipi Papuvita voa mai haura reha.

¹⁹ Vita heaea e, e eve elore elore uamori la haikakare araia, aea haiiri eokere ere vei levi leitia.

²⁰ Atutemori e, e etau foromai voa eve oalou‐ita la kakeva leitia, ipi Papuvita la lei haiiri lareva leitita mai kofa reha.

²¹ Oa‐ita e, e o haiiri rauapo eve atutemori la levi moia, ereve haiiri ve rofo veverapai ave.

²² Fasaita sarufa karu e, e etau foromai voa eve mearovaeka papuvita la kakeva ita lei vovo roroava, ereve ofae sa eovi, ere sa maeati vei lea tivi feare kao, a—, harapaharapa auke haiiri ita, e sa Ualare la haikavora ita leitita lea vei.

²³ Eve tivi foromai la eve rofo foromai ita leitia, karu vei leitita feare kao, a—, ereitave Papuvita vei.

²⁴ Mea la ore leitia, Papuvita sa areve karu vei toea miavaita lea tava ta ero miarai roi, ipi e sa areve tivi lei roroaita lea Papuvita kofa Keriso reha.

²⁵ A—, mai kaiae leita lea karu areve mai kaiae vei tava la ovai roi, ipi Ualare sa seseōvaita mai farakeka, are karu ve soso o ari sore.