Kolose 2 - Testamenta Áre 1983 (Toaripi PNG)

¹ Ara haikaeai e ore leiti vei, arave heafo rovaea e vei, aea Laodikea karu vei, aea arave soso la eavai auke leitita lea karu foromai vei.

² Arave mai lōfeare ipi e foromai ve haiiri la lei rofo leiti vei, eve haiiri haikakare voa totorea foia farakeka lei, e ovava kofa haiiri sa ovaita pisoso la ovai vei. Lōfeare e foromai Ualare ve hohore etau la ore leiti vei, lea ve eite Keriso reha.

³ Ipi are haria voa Ualare ve haiovoro aea haiore ita ve etau foromai la toea milafuka laisisea.

⁴ Ara mea o la ero omoi, ero karu sa kureaita apeva o sa levi vuteai vei.

⁵ Ipi ara maea sa e voa ára‐ita peita, a—, eite ara arahoha ita e voa farehoria pea vovea, aea ara hailareva ipi ara e metakao soi popōvi, Keriso la lula auke ita sukaerereaita mai la ofae la eavaipea.

Makuri ve eite rovaea Keriso voa

⁶ Soka e Keriso Iesu la Papuvita vei ovōpe lea vei, are voa roroava.

⁷ Are voa likilea seaupi, are voa asi, aea eve sukaerereaita haiiri voa rofo topiaraia ero satiriaraiape lōfefeare, aeata Ualare la marase ae peava.

⁸ E kiva leitia, karu aea eite auke haiore sa ero apeva vutea fasi ovai ave; lea maeakakare haiore papa laua voa satiriōri, aea mearovaeka ve siahu etau hariaharia voa foreraitore; Keriso voa foreraita haiore lōfeare kao.

⁹ Ipi Ualare ve iri ve soarita etau Keriso ve maea voa popōvi,

¹⁰ aea Keriso voa Ualare sa makuri kofa ero miōri laepepea. Keriso are lohio karu aea siahu ita karu foromai ve harofave Vita.

¹¹ Are voa ero ta peritome leipe; karu ve mai sa sarapaita lea peritome kao, a—, e voa maeasarōva ve kaiae la fōovōpe lea vei, e peritome Keriso voa lōri ovōpe.

¹² Ipi e bapatiso leipe lea mea, ero Keriso feare lei, are ita viopi, aea are ita farehoria ta moravōpe, ipi eve sukaerereaita haiiri meha, Ualare sa lei, are Keriso la opai voa moravōpe lea vei.

¹³ E maeasarōva voa peritome auke lei, eve mai kaiae voa opai feare lei siseiape; a—, Ualare sa Keriso ita fareho ero lei makuri lei, ereitave kaiae foromai la sasuka kaleipe.

¹⁴ Ereitaro sasauka fasi Safu O voa ukōpe otoare la are safukavi, ereitaro hasiavaiape lea etau la are fareōvi satauro voa kalahe sa toa vitei lōri lei kaleipe reha.

¹⁵ Satauro voa are sa ovi aierōpe lea karisu ve siahu, aea siahu etau hariaharia ve rofo ita la fari, erero fasi karu ve soso voa erero maeamariti leiti vei muia, taravōpe.

¹⁶ Soka karu aea sa larietau vei aea lari ma vei, aea sosoka sare aea papare áre ve leita mai vei, aea Sabati sare leiti mai vei ero seseōvi kaiae o ero levi aria.

¹⁷ Lea leita mai hariaharia ere aite soa voa forerai vei leitita etau ve ove haria, a—, eite kofa Keriso reha.

¹⁸ Areve haiako auka vei hiva a’, areve ipi haiiri apeva ita lei, aea aneru la maso toai vei kureaita lea karu sa ero seseōvi kaiae o levi moia. Lōfeare karu areve maea ve haiiri sa arero lei meamarōva lei vovea, a—, are eite kasirau.

¹⁹ Are ekalesia ve harofave, lea ve eite Keriso voa topiari mei vei kiripi, hariakao mea. Eite Keriso voa maea foromai, hauhau ita, maea ve elele ita ilafisa, Ualare sa haikaeaita mai feare asa vovea.

²⁰ E Keriso ita fareho opōpe lea mea, e mearovaeka ve siahu etau hariaharia voa lōri safauka paparaea la roroa. Soka e mearovaeka ve karu fefeare roroaita ipi levea? E mea safu o la mapi kakeva leitita ipi levea?

²¹ O mōfeare, Lōfeare larietau mai levi paeaia, aea ape sa levi seseōvaia, aea mai sa levi mopaia.

²² Lōfeare etau foromai la maravi ereve soa lōri lei kaleititore. Lōfeare safu o karu sa moita aea satiriaraita o sa haria.

²³ O serea ita aneru la maso toaita mai, aea haiiri‐ipi lohalai lei, aea etau rauapo avoha leitita, lōfeare mai voa haiovoro ve soso feare sa ia; a—, eite lea mai maeasarōva sa haikakare leita haiiri la sukavuteai vei usoso kasirau.