Iuda 1 - Testamenta Áre 1983 (Toaripi PNG)

¹ Iuda, Iesu Keriso ve fasaita sarufa, Iakobo ve marehari, sa itapaita karoro meha; Oa Ualare sa haikakare lei, erero haikaea isa, aea Iesu Keriso sa kiva lei roroaita lea karu veia.

² Maeaforoe aea tairu aea haikakare ita e voa lei rovaea leitia.

Lohalai satiriaraita papukaru

³ Haikakare paumarehari e, arave haiiri rovaea ereita Iesu Keriso voa farehoria ovaita lea lei makuri leita siahu vei karoro uka ero tai itapai vei. A—, lea soa haikaeaita haiiri haria sa foreri, ara ero tai utohoa ukai ero kureai vei, e Ualare areve karu la soa farakeka haria miarōpe ereita sukaerereaita lea ovoro la e rofo foromai ita kiva leiti vei.

⁴ Ipi karu hea, erero seseōvi kaiae o evera ōpe, ere ereitave aru voa kekevari forera la roroa. Ere ereitave Ualare ve maeaforoe vei ōpe lea ovoro la toarōrisa, ere herei mai leiti vei, aea ere ereitave Harofave Vita farakeka, Papuvita Iesu Keriso la sukavutea avoa aritore.

⁵ Soka e mea etau foromai evera ore, a—, arave haiiri ero ata lei haikaeai vei, mōfeare, Papuvita are Israela karu la Egupto voa fari makuri leipe, a—, aite voa are sukaerereai auke leipe lea karu la saroroapōpe.

⁶ Aea aneru hea ta reha; ere ereve tivi soa kofa voa haiiri usoso auke lei, ere sa pepeiape lea oti la kiripōpe. Kiripi, Ualare erero murumuru soa ve iri voa peita auri horou sa fasi, ere lōvoa popōvai roi pepepe lea sare rovaea ve seseōvi tava miaraita soa voa.

⁷ Sodoma aea Gomora aea ereukave hōiri karikara karikara ita ta haikaeaia. Ereve karu ta lōfeare, ere herei lei, mu eokere mai ta leiape ereve haiiri foromai ita, ereve kaiae ve tava ere futai auke a voa ovōpe, karu foromai la kureaita fari reha.

⁸ Eite lōfeare mai ita mea karu haiako auka paea, ere ereve maeasarōva la lei maealolo lei, ere Ualare ve siahu la sukavutea, aea sosorusosoru leita aneru la kisari sa serovaitore.

⁹ Eite, Mikaele, harofave aneru, are Diabolo ita ape sosori a’, Mose ve maea leisa ovai vei o serea serea ōpe lea mea, arero kisari sa serovai vei, ape karōva leiti kasirau, a—, areve o meha, Papuvita sa o haiiri aro ari roi.

¹⁰ A—, mea karu ere ore auke leita lea etau la o maealolo la ō vovea, aea usoso fara animala sa ore leita mai feare, ere sa ore leita lea etau voa erero elore maea lei saroroapaitore.

¹¹ Ahai‐e ere vei! Ipi ere Kaino ve otiharo la tei la roroa, aeata ipi moni maravai vei ere Balaama ve kaiae voa haihahari ita lei, Kora sa Ualare la sukavuteaita mai ta lei elore maea la lōri saroroapaitore.

¹² Mea karu eve larietau fareho kokoruka avi larita soasoa voa ere ma iri fave fefeare lei, eve kokorukai la lei hasiava vovea. Ere mamoe kiva karu, a—, ere irori mai sa lei ereve maea la savua vovea. Ere usoso fareovaita mea sa ovi soeaita lai auke mea‐e fefeare. Ere usoso fare taita pisahu voa fare tai auke leita tola fefeare lei, likilea ita aruavi fari, soa orakoria opaita reha.

¹³ Ere usoso ma seseaita aro‐aro fefeare, ereve maeamariti usoso ma soare fefeare lei pisiri muia vovea. Ere kerori kerori ōvovo roroaita kauri koru fefeare, faita muru ve mea‐uru ere vei kekese lei la eaea.

¹⁴ Soa Adamu ve susumori ve taotao asease seven ve vita, Enoka, are peroveta o mea karu vei evera mei mō ōpe, Ofae eavaia, Papuvita are safu aneru firu sivirikapo ita farehoria la kotipea,

¹⁵ karu foromai la seseōvi tava miarai vei, aea Ualare la taivotai auke leita lea karu la kaiae o ari vei, ere Ualare la sukavuteaita lea mai foromai vei, aea ere sa Ualare la arita lea o ivara eokere foromai vei.

¹⁶ Ere o vituvitu oita karu, ere o poporu ō vovea; ere areve haiiri maealolo la haihahari ita lei vovea. Ere ereve elore maea o hiva rovaea a’ aea karu haria la lohalai lei maeatitore, ere haikaeaita etau etau la ere voa maravai vei.

Kureaita ovoro aea satiriaraita o

¹⁷ A—, haikakare paumarehari e, ereitave Papuvita Iesu Keriso ve aposetolo karu sa moiape lea o la haikaeaia.

¹⁸ Ere ero mōfeare moiape, Soa sarapaita soa voa ero area sa vutea oita karu forerai roi, ere ereve elore haikaeaita mai la lei, Ualare la sukavuteai roi.

¹⁹ Ere faeafaea arita karu, ere maeasarōva sa haikaeaita mai la lei vovea, Ualare ve Arahoha auke ita roroaita karu.

²⁰ A—, eo, haikakare paumarehari e, eve makuri la eve sukaererea safu leita haiiri ve arori voa vipi, Arahoha lareva la ovi Ualare la loki lei,

²¹ aea eve elore elore maea la Ualare ve haikakare voa kiva lei, lei vovo roroava, e ereitave Papuvita Iesu Keriso ero maeaforoe sa lei, peita makuri ero miarai vei tai vovo roroaita lea soa voa.

²² Karu hea horahora ia; e sa erero maeaforoe leitia.

²³ Karu haria hea la sarita a ve iri voa aruovi fari, erero lei makuri leitia. Aea karu hea ta, e maea totororo ita voa maeaforoe leitia, a—, maeasarōva la lei sirisiri leita lea maea puta la kaifa leitia.

Ualare la maeatita o

²⁴ E safosafoa levi putoi vei ero kiva leita ore Ualare, aea ero maita maealolo auke ita maravi, areve sosorusosoru ve omopa voa hailareva ita ero vipaita ore leita lea Ualare,

²⁵ Ualare farakeka, ereitave Papuvita Iesu Keriso voa ereitaro lei makuri leita lea Ualare: sosorusosoru, maeati, rofo rovaekapo, aeata siahu ita la, evera kofa soa ve omopa voa, aea faitora, aeata aite soa voa arero miarai peava. Amene.