Ioane 9 - Testamenta Áre 1983 (Toaripi PNG)

Ofae kuku ita epōpe vita

¹ Are foapōpe lea mea Iesu karu aea la ofae eovōpe, lea karu la ofae oraka kuku ita epōpe.

² Eovi areve satiriaraita karu arero lalasi mō leipe, Rabai e, kaiae leipe karu leisa, ipi arero ofae kuku ita epōpe lea vei, mea vita ei, a—, areve oalou ei?

³ Iesu tava o mō ōpe, Mea vita aea areve oalou ta kaiae leiti kao; a—, arero ofae kuku ita epōpe ipi Ualare ve leita mai la areve maea voa muiai vei.

⁴ Ereita araro itapōpe Ualare ve leita mai la sareri leiti vei; faita muru foreraita soa, karu tivi leitita ore kao.

⁵ Ara mearovaeka voa peita soa, ara mearovaeka ve ovava lei meitore.

⁶ Lea o mei roroka lei, are pea mea voa soea, sauka pea ita ilafisa, lea vita ve ofae oraka sauka sa veveti,

⁷ arero mō ōpe, Fauka te Siloama ve Sitoi voa maukaia (lea rare ve eite Itapōpe). Soka are fauka te mauka, aea ofae ovava lei ata iti pataipe.

⁸ Soka haekao peita karu aea arero evera meru vei loki leiape la ofae eavaiape lea karu mō ōpe, Avi meru vei loki leita vita meha ei?

⁹ Karu hea mō ōpe, Are reha. Karu aea ta mō ōpe, Kao, eite areve soso feare. A—, lea vita mō ōpe, Ara kofa meha.

¹⁰ Soka ere arero mō ōpe, Ave ofae leafeare lei ovava loi?

¹¹ Are tava o mō ōpe, Iesu la aravaita lea vita, sauka la pisosi arave ofae la veveti araro mō auai, Siloama voa fauka te maukaia. Soka ara fauka te mauka, ara ofae ovava loita meha.

¹² Ere arero mō ōpe, Are leavoa? Are mō ōpe, Ara ore kao.

¹³ Soka ere lea evera ofae kuku leipe vita la Farisea karu tai lariōvōpe.

¹⁴ Iesu sauka la pisosi areve ofae la vevetipe lea sare, Sabati sare reha.

¹⁵ Lea vei Farisea karu arero ta lalasi leipe, areve ofae ovava leafeare leipe. Soka are erero mō ōpe, Are sauka arave ofae oraka voa lei pasaea, ara fauka te mauka, ofae eavaita meha.

¹⁶ Lō mei, Farisea karu hea mō ōpe, Mea vita Ualare voa pea forerai kao, ipi are Sabati sare kiva kao. A—, karu hea mō ōpe, Iri kaiae karu lōfeare siahu ve peise leafeare ore lei leiti roi ei? Ere haiiri hariaharia tofei itai itai leipe.

¹⁷ Soka ere ofae kuku karu la ata mō ōpe, A are vei o leafeare moi, ipi are ave ofae oraka la lei ovava loita lea vei? Are mō ōpe, Are peroveta vita.

¹⁸ Soka Iuda karu are ofae kuku lei ata ovava leipe lea o la sukaerereai vei haikaeai kao, tetete areve ofae ata ovava leipe lea vita ve oalou la ere isa,

¹⁹ ereukaro mō ōpe, Ofae oraka kuku ita epōpe o arita mea atute eukave ei? Soka are faitora ofae leafeare lei eavaipea?

²⁰ Areve oalou tava o mō ōpe, Elaka ore mea elakave atute, aea arero ofae kuku ita epōpe;

²¹ a—, are faitora leafeare lei ofae eavaipea elaka ore kao, aea areve ofae la lei ovava loita lea vita leisa, elaka lea ta ore kao. Arero lalasi leitia, are karu sora; are areve elore etau vei laua sukavaita ore.

²² Areve oalou o lōri moipe ipi ereuka Iuda karu la tore leipe eavia, ipi Iuda karu haiiri farakeka lei kekese leipe, Iesu are Keriso o lōri haikaea arita karu la sunako voa sukavutea are maria karu leiti vei.

²³ Lea vei areve oalou mō ōpe, Are karu sora, arero lalasi leitia.

²⁴ Soka ere ofae kuku leipe karu la ata isa arero mō ōpe, Ualare ve fari la moravi sosorusosoru leitia; ela ore kofa lea vita are iri kaiae vita.

²⁵ Lō mei, are erero mō ōpe, Are iri kaiae vita varo kasirau varo, ara lea la ore kao. Etau farakeka ara ore, ara omopa ofae kuku, a—, faitora ara eavaita meha.

²⁶ Soka ere arero mō ōpe, Are aro loita mai leafeare? Are ave ofae leafeare lei ovava loi?

²⁷ Are tava o erero mō ōpe, Ara o ero evera moi, a—, e mapaia kao. E ata mapai haikaeaipeta ipi levea? E ta areve satiriaraita karu leiti vei haikaeaipea ei?

²⁸ Soka ere arero o haiiri ita mō ōpe, A sa areve satiriaraita karu; ela Mose ve satiriaraita karu.

²⁹ Ela ore Ualare are Mose la laua sukavaiape; a—, mea vita are leavoa forerai ela lea ore kasirau.

³⁰ Areve ofae ovava leipe lea vita tava o erero mō ōpe, Haihava etau soa haria reha! Are leavoa forerai e lea la ore kao, eite are sa arave ofae la lei ovava loi.

³¹ Ereita ore Ualare iri kaiae karu la mapai sore; a—, Ualare la tore lei, areve haikaeai la kakeva leita lea karu la are mapaitore.

³² Mearovaeka ve oarehōva soa itiiti faitora ofae oraka kuku ita epōpe karu ve ofae la ovava leita lea fari la mapai sore.

³³ Lea vita Ualare voa forerai auke leiti oria, are etau farakeka aea la leitita ore levi leiti lare.

³⁴ Ere tava o arero mō ōpe, Aro kaiae leita mai foromai voa miōpe. A ta elaro satiriarai haikaeaipea ei? Soka ere arero sunako voa sukavuteōpe are maria karu leiti vei.

³⁵ Ere arero maria voa sukavuteōpe fari la Iesu sa mapi, are arero tai koti mō ōpe, A Karu ve Atute la sukaerereai ei?

³⁶ Are tava o mō ōpe, Papuvita e, are ita leisa? ara arero sukaerereai vei.

³⁷ Iesu mō ōpe, A arero ofae eovi roroka; are eite a ita laua la sukavaipea meha.

³⁸ Lea mea are mō ōpe, Papuvita e, ara sukaerereai, aeata are sukakoka avi arero maeatipe reha.

³⁹ Soka Iesu mō ōpe, Ara karu la seseōvi tava miarai vei mearovaeka voa foreri mea. Ofae eavai auke leita lea karu la lei ofae eavai vei, aea ofae eavaita lea karu la lei ofae kuku leiti vei.

⁴⁰ Are ita fareho peiape Farisea karu hea lea o la mapi arero mō ōpe, Lei, ela ta ofae kuku ei?

⁴¹ Iesu erero mō ōpe, E ofae kuku leitita, a—, e kaiae ita levi leiti lare. A—, ipi e mō aritore, Ela ofae ovava, lea vei eve kaiae laisisea.