Ioane 8 - Testamenta Áre 1983 (Toaripi PNG)

Saruka ua

¹ Iesu kei Olive Raepa voa pataipe.

² Soka sare pataipe soa Iesu Maso Uvi voa ata foreri, aea karu foromai arero tai koti, are avi erero satiriaraiape.

³ Soka Safu Karoro ore karu aea Farisea karu ita ere ua farakeka aea la arero tai lariōvōpe, lea ua ere saruka mai leipe la sukaeōpe. Ere arero aru voa vipi,

⁴ Iesu la mō ōpe, Satiriaraita Papuvita e, mea ua saruka mai lei ela eovi mai paeaita meha.

⁵ Mose Safu Buka voa o ereitaro mō moipe, Mōfeare ua la fave sa toa opai vei; a—, ave o leafeare?

⁶ Ere lea o la moipe ipi arero loharai vutea, are moita o kaiae la ovi arero havara paraeai vei. Iesu hiopi, areve mai lakoka sa karoro mea voa au ukōpe.

⁷ A—, ere taupi lalasi ata leipe lea mea, are haurori avi erero mō ōpe, Oarehōva fave sa arero toaita karu are e voa kaiae auke karu reha.

⁸ Are ata hiopi areve mai lakoka sa karoro mea voa ata ukōpe.

⁹ Soka ere lea o la mapi elore maea seseōvi, ere farafarapo maria voa terōpe, omopa miōpe karu omopa lōfeare fauka fauka aite‐sisa karu voa. Soka Iesu hariakao aisesea, aea lea ua ta aru voa peiape.

¹⁰ Iesu haurakao avi arero mō ōpe, Ua e, aro havara paraeaita lea karu leavoa? Karu farakeka kaiae o aro omoi kao ei?

¹¹ Are mō ōpe, Papuvita e, kasirau. Iesu arero mō ōpe, Ara ta kaiae o aro levi moi roi; a teraia; mai kaiae ata levi leitia.]

Mearovaeka ve ovava

¹² Iesu karu sitavu la ata itoro a’ mō ōpe, Mearovaeka ve ovava ara meha. Araro aitetei vovo roroaita lea karu murumuru voa levi terai roi, a—, makuri ve ovava ovai roi.

¹³ Lō mei, Farisea karu arero mō ōpe, A o ave elore maea vei haria moipea, aea ave lea o okofa kao.

¹⁴ Iesu tava o erero mō ōpe, Katareha, ara o arave elore maea vei la moipea, a—, ara moipeta mea o okofa, ipi ara kotipe lea oti ara ore, aeata ara terai vei leipeta lea oti ta reha; a—, ara kotipe lea oti e ore kasirau, aeata ara teraita lea oti ta reha.

¹⁵ E karu ve haiiri ita eovi seseōvi tava miara vovea, a—, ara karu la seseōvi tava miarai sore.

¹⁶ A—, ara karu la seseōvi tava miaraita, a—, ara karu la seseōvi tava haura miarai roi, ipi ara haria peia kao; araro itapōpe Oa ara ita fareho pea vovea.

¹⁷ Eve elore Safu Buka voa o mō uka sisea, Ore leita karu orakoria sa moita lea o okofa.

¹⁸ Soka o arave elore maea vei ore lei moita vita aea meha, aeata araro itapōpe Oa sa o ara vei ore lei moi vovea.

¹⁹ Lō mei, ere arero lalasi mō leipe, Ave oa leavoa? Iesu tava o erero mō ōpe, E araro ore kao, aeata arave Oa ta ore kao; e araro ore leitita, a—, e arave Oa ta ore leiti lare.

²⁰ Are lea o moni kokorukaita oti voa omoipe, are Maso Uvi voa satiriaraiape lea mea. Karu farakeka aea arero mai sa sukaforai kasirau, ipi areve ora forerai auke eavia.

²¹ Soka Iesu o erero ata mō ōpe, Ara terai roi, aea e araro eli, a—, e eve iri kaiae voa opai roi; ara sa teraita lea oti voa, e kotita ore levi leiti roi.

²² Lōfeare o vei Iuda karu mō ōpe, Are elore maea paeai roi ei? Ipi areve o mōfeare, Ara sa teraita lea oti voa e kotita ore levi leiti roi.

²³ Soka are erero mō ōpe, E ipi voa foreri roroa, ara arori voa foreri mea; e mea mearovaeka ve karu, ara mea mearovaeka ve karu kasirau.

²⁴ Lea vei ara ero o mō arita, E eve iri kaiae voa opai roi. Ipi ara moipeta mea o ve eite arao, e lea o la sukaerereai auke leitita, a—, e eve iri kaiae voa opai roi.

²⁵ Ere arero mō ōpe, A ita leisa? Iesu erero mō ōpe, Usoso ara oarehōva soa voa itiiti faitora o ero moi vovo mea vovea.

²⁶ Ara o rauapo ia e vei moi vei, aeata ipi ero seseōvi tava ero miarai vei; a—, araro itapōpe Ualare are okofa, aea ara are voa mapi ovaita lea o ara mearovaeka la omoi vovea.

²⁷ Iesu sa moipe lea o ve ipi Oa vei, ere haiiri ovava leiti kasirau.

²⁸ Lea mea Iesu mō ōpe, E Karu ve Atute la moravi roroka leita soa, ara ita leisa e lea la ore au leiti roi, aeata ara arave elore haiiri etau la leiti sore, a—, usoso Oa sa araro satiriaraita lōfeare la ara laua sukōvō vovea.

²⁹ Araro itapōpe lea Ualare araro tai pea vovea, are araro hariakao kiripai sore, ipi ara sa arero lei hailareva leita lea etau la lei vovea.

³⁰ Are lōfeare o la moipe soa karu rauapo arero sukaerereōpe reha.

Abrahama ve meavumōla

³¹ Soka Iesu arero sukaerereōpe lea Iuda karu la mō ōpe, E arave o la mapi kakeva leitita, a—, e arave satiriaraita karu kofa lōri leiti roi;

³² e okofa la ore lei, aea lea okofa sa ero lei paraea pisiri voa leiti roi.

³³ Ere tava o arero mō ōpe, Ela Abrahama ve meavumōla, aea ela evera soa itiiti faitora fasaita sarufa leiti kasirau. A elaro levei mō auai, Ero pisiri lei paraeai roi?

³⁴ Iesu tava o erero mō ōpe, Okofa ara ero o la moi, kaiae la leita lea karu, kaiae ve fasaita sarufa are reha.

³⁵ Fasaita sarufa are uvi voa soa foromai levi peava roi, a—, atute sa soa foromai lōvoa peava roi.

³⁶ Soka atute sa ero lei paraea pisiri voa leitit’ oria, a—, e etakofa pisiri lei roroava roi.

³⁷ Ara ore e Abrahama ve meavumōla; etau farakeka e araro paeai vei haikaeai, ipi arave o eve iri voa oti ovai kasirau.

³⁸ Ara arave Oa voa eavaiape lea etau vei laua sukavaitore; aea e ta, eve oa voa mapaiape lea etau la lei vovea.

³⁹ Ere tava o arero mō ōpe, Abrahama elave oa reha. Iesu erero mō ōpe, E Abrahama ve atutemori oria, a—, e Abrahama ve mai feare leiti lare.

⁴⁰ Ara Ualare voa mapaiape lea okofa la ero omoita vita; a—, faitora, e haikaeai araro paeai vei. Abrahama mai lōfeare leiti kasirau.

⁴¹ E eve oa sa leita mai feare lei vovea. Ere arero mō ōpe, Ela atute merava kasirau; ela Oa farakeka ia, Ualare reha.

⁴² Iesu erero mō ōpe, Ualare eve Oa oria, e araro haikakare leiti lare, ipi ara Ualare voa pea koti mea. Ara haria lei koti kao, a—, araro are sa itapi mea.

⁴³ E arave sukavaita laua ve eite ore leiti auke leipeta ipi levea? Ipi e arave o la mapai vei usoso auke eavia.

⁴⁴ E eve oa Diabolo voa foreraita atutemori, aea e eve oa sa haikaeaita mai la e haihahari ita lei vovea. Oarehōva soa voa itiiti faitora karu la paeaita vita are reha, aea are okofa voa pei sore, ipi okofa areve iri voa eaei sore. Are o apeva la arita, areve omoita mai kofa reha; ipi are apeva vita kofa, aea apeva foromai ve oa.

⁴⁵ A—, ipi ara okofa la moita lea vei, e araro sukaerereai sore.

⁴⁶ E voa karu leisa iri kaiae ara voa etakofa sukaeaita ei? Ara sa okofa la moita, a—, e araro sukaerereai auke leipeta ipi levea?

⁴⁷ Ualare voa pea foreraita karu Ualare ve o la mapa vovea; e mapai sore ipi e Ualare voa pea forerai sore.

⁴⁸ Soka Iuda karu tava o arero mō ōpe, Elave o a vei haura kao ei, a Samaria karu, aea a harisu sa ave iri voa peita vita?

⁴⁹ Iesu tava o mō ōpe, Harisu arave iri voa kasirau; ara arave Oa la taivotai vovea, a—, e araro taivotai sore.

⁵⁰ A—, ara arave haria fari la moravai vei eli sore; lea la elita aeata seseōvi tava miaraita Vita kofa ia.

⁵¹ Ara okofa ita ero o mō auai, Karu arave o la kakeva lei meita, a—, are opai levi ore leiti roi peava roi.

⁵² Soka ere arero mō ōpe, Faitora ela ore kofa a harisu ia. Abrahama evera opōpe; peroveta karu ta reha. A—, a mō auai, Karu arave o la kakeva lei meita, a—, are opai ore levi leiti roi peava roi.

⁵³ Ereitave papa Abrahama ve rovaeka vita a meha ei? Are opōpe, peroveta karu ta opaiape. A ita leisa?

⁵⁴ Iesu tava o mō ōpe, Ara arave haria fari la moravi rovaea leitita, a—, arave lea fari eite kao. Arave fari la moravi rovaea leiti Vita arave Oa reha, aea e are vei mō aritore are eve Ualare.

⁵⁵ Eite e arero ore leiti sore. A—, ara arero ore. Ara arero ore auke o arit’ oria, a—, ara ta e feare apeva vita leiti lare. Soka ara arero ore, aeata areve o la kakeva lei mea vovea.

⁵⁶ Eve papa Abrahama ve haiiri rovaea arave soa la ofae eavai vei; are ofae eovi hai ta lareva leipe reha.

⁵⁷ Iuda karu arero mō ōpe, A sisoro fifty ovaia kao, a—, a Abrahama la ofae eavai ei?

⁵⁸ Iesu erero mō ōpe, Okofa ara ero o la moi, Abrahama la epai auke soa ve omopa voa itiiti faitora ara la me meha.

⁵⁹ Lea mea ere fave korukoru arero toai vei arisovi, a—, Iesu murufakao Maso Uvi kiripi maria voa forerōpe.