Ioane 6 - Testamenta Áre 1983 (Toaripi PNG)

Iesu larletau karu 5,000 la miarōpe

¹ I ea ve aite voa Iesu Galilea ve Sitoi voa ufōpe, rare aeata Tiberio ve Sitoi reha.

² Soka karu sitavu rovaea arero aitetei vovo roroaiape, ipi ere are eka karu voa leiape siahu ve peise la ofae eavaiape lea vei.

³ Iesu raepa voa patei, areve satiriaraita karu ita lōvoa avōpe.

⁴ Soka Iuda karu ve Foapaita Sosoka ve soa haekao leipe.

⁵ Iesu areve ofae moravi, karu sitavu arero tai kotiape la eovi, are Filipi la mō ōpe, Ereita larietau leavoa itaea leiti roi, mea karu lari vei?

⁶ Are o lōri moipe ipi Filipi la seseōvai vei; are kofa are leiti vei leipe lea etau ore.

⁷ Soka Filipi tava o arero mō ōpe, Larietau ve tava soa silva moni korukoru 200 usoso kao, ere taratara la haria lari vei.

⁸ Areve satiriaraita karu farakeka aea, Anderea, Simona Petero ve marehari, arero mō ōpe,

⁹ Siare seika mōvoa laipea, are bali faloa koru five aeata ekaka orakoria ia; a—, mea karu rauapo vei, lea leafeare leiti roi?

¹⁰ Iesu mō ōpe, Karu ava puavai vei moia. Soka lea oti voa kavuru mea pisasa eaeiape. Soka lea karu ava puavōpe, erero mai mutipe 5,000 feare.

¹¹ Lea mea Iesu faloa korukoru la maravi, Ualare la maeati o a’ roroka lei, lōvoa aipepeiape karu la miarōpe. Are ekaka ta lōri lei miarōpe usoso ere sa haikaeōpe lōfeare.

¹² Ere ére popōpe lea mea, are satiriaraita karu la mō ōpe, Siseipeta larietau eloe‐eloe arisovaia, taheka aeata levi veverapai vei.

¹³ Soka ere erero arisovi arisovi, lea bali faloa korukoru ve eloe‐eloe posea twelve soōpe, lape karu sa kiripōpe larietau eloe‐eloe reha.

¹⁴ Soka karu are leipe siahu ve peise la ofae eavōpe lea mea, ere mō ōpe, Okofa mearovaeka voa forerai vei taipeta peroveta vita meha.

¹⁵ Soka ere irori ita arero king leiti vei koti vei leipe lea o la Iesu sa mapōpe lea mea, are hariakao raepa voa ata pataipe.

Iesu ma ve arori voa mora sa meiape

¹⁶ Mea aeōpe soa areve satiriaraita karu sitoi miri voa fafuka,

¹⁷ oroti aea voa forerōpe, Kaperanauma itai voa ufai vei. Soka faita muru leipe aea Iesu erero tai forerai kasirau.

¹⁸ Mea rovaea fareōvi aroaro itoipe reha.

¹⁹ Soka ere maili oroisoria varo orakaraka varo fala toaiape lea mea, ere Iesu ma ve arori voa mora sa meiape la ofae eovi, are oroti ve haekao voa koti forerōpe. Ere tore foromai leipe;

²⁰ a—, are erero mo isa moipe, Mea arao; tore levi leitia.

²¹ Soka ere hailareva ita arero lei oroti voa foreōpe, lea mea ere kavaiape lea miri voa utohoa kei forōpe.

²² Aite mea ōpōpe miori voa, lea sitoi itai voa seseravi pepeiape karu sitavu ere ore oroti aea lōvoa eaei kasirau, a—, satiriaraita karu sa foreōpe lea farakeka sa haria; ere ta ore Iesu are areve satiriaraita karu ita fareho lea oroti voa ta foreai kao, a—, satiriaraita karu sa haria.

²³ A—, oroti hea Tiberio karikara voa fosi, karu sitavu Papuvita sa lei lareva leipe faloa la lōpe lea oti voa fafuka popōvōpe.

²⁴ Soka karu sitavu ere ofae eavōpe Iesu areve satiriaraita karu ita lea oti voa kasirau, ere lea fosipe oroti voa forea Kaperanauma voa ufōpe Iesu la eli vei.

²⁵ Ufi ere sitoi poe aea voa arero eli sukaeōpe lea mea, ere arero mō ōpe, Rabai e, a mōvoa leasauka fosita?

²⁶ Iesu tava o erero mō ōpe, Okofa ara ero o la moi, e araro elipeta ipi e arave siahu ve peise la ofae eavai vei kasirau, a—, ipi e lea faloa la la’ ére popaia lea vei.

²⁷ Sisia leita larietau vei tivi heafo levi leitia, a—, mea savori peita makuri ve lea larietau vei. Lea larietau Karu ve Atute sa ero miarai roi, ipi Oa Ualare arero rare toa siahu miarōpe eavia.

²⁸ Soka ere arero mō ōpe, Ela lekōru la lei Ualare sa haikaeaita tivi la leiti vei?

²⁹ Iesu tava o erero mō ōpe, Ualare sa haikaeaita tivi meha: are sa itapi meita mea vita la sukaerereai vei.

³⁰ Ere arero lalasi ata mō leipe, Aita, a leita peise lekōru, ela ofae eovi ore lei aro sukaerereai vei? A sa leita tivi elaro lekōru la muiai roi?

³¹ Ereitave papa mana furuka merava oti voa lalape, usoso Safu Buka voa uka siseita mea o feare, Are kauri larietau ere lari vei erero aioraiape.

³² Soka Iesu erero mō ōpe, Ara okofa ita ero o la moi, Mose sa kauri voa faukaita larietau ero miarai kao; a—, kauri voa faukaita larietau kofa la arave Oa sa miara vovea.

³³ Ipi Ualare sa miaraita lea larietau kauri voa fauka aea makuri mearovaeka la miaraitore.

³⁴ Lea vei ere arero mō ōpe, Papuvita e, lea larietau elaro miarai peava.

³⁵ Iesu erero mō ōpe, Makuri ve larietau eite ara meha; araro tai kotita lea karu eroa levi sae peava roi; aea araro sukaerereai vo meita lea karu kōvōre‐tolo levi lei peava roi.

³⁶ A—, ara ero omoita o meha, E araro ofae eovi, a—, e araro sukaerereaia kasirau.

³⁷ Oa sa araro miaraita lea karu foromai araro tai koti roi, aea araro tai kotita lea karu la ara maria voa levi sukavuteai roi.

³⁸ Ipi ara kauri kiripi faukōpe, arave elore haikaeaita haiiri la leiti vei kasirau, a—, araro itapōpe Ualare sa haikaeaita lea haiiri.

³⁹ Aea araro itapōpe Ualare sa haikaeaita haiiri meha, are araro miarōpe karu foromaiapo voa farakeka aea levi veverapai vei, a—, ara erero foromai la soa sarapaita sare voa moravi itoteai roi.

⁴⁰ Ipi arave Oa sa haikaeaita haiiri meha: Atute la ofae eovi arero sukaerereaita karu foromai peita makuri ovai vei, aea ara erero soa sarapaita sare voa ta moravai roi.

⁴¹ Lea mea Iuda karu are vei o poporu ōpe ipi are sa mō ōpe, Kauri voa faukaita larietau ara meha.

⁴² Aea ere mō ōpe, Mea Iesu are Iosefa ve atute kao ei? Ela areve oa ita lou ita ore. Ipi levea are mō aipea, Ara kauri voa faukōpe?

⁴³ Iesu tava o erero mō ōpe, E o poporu elore elore levi aria.

⁴⁴ Araro itapōpe lea Oa sa veveovaita karu haria sa araro tai foreraita ore; aea ara soa sarapaita sare voa erero moravi itoteai roi.

⁴⁵ Peroveta buka voa o mōfeare uka sisea, Erero foromai la Ualare sa satiriarai roi. Oa voa mapi satiriaraita lea karu foromai araro tai koti vovea.

⁴⁶ Karu Oa la ofae eavai sore, a—, Ualare ita pea faukōpe lea vita, are Oa la ofae eavōpe vita reha.

⁴⁷ Okofa ara ero omoi, Araro sukaerereaita lea vita peita makuri ovaitore.

⁴⁸ Makuri ve larietau ara meha.

⁴⁹ Eve papa‐ita mana furuka merava voa la’ la’ opaiape.

⁵⁰ A—, kauri voa faukaita larietau meha, karu arero larita, are levi opai roi.

⁵¹ Kauri voa pea fauka makuri lei vovo meipeta larietau ara meha; mea larietau la larita lea karu makuri lei peava roi. O aeata meha, ara miaraita larietau arave sarōva, ara mearovaeka makuri leiti vei miarai roi.

⁵² Soka Iuda karu ere elore elore o serea a’ mō ōpe, Mea vita are leafeare ore lei areve sarōva la elaro miōri lari vei?

⁵³ Iesu erero mō ōpe, Okofa ara ero omoi, E Karu ve Atute ve sarōva aea ovo ita la lari auke leitita, a—, e makuri eve iri voa ovaita ore kasirau.

⁵⁴ Arave sarōva aea arave ovo la larita lea karu peita makuri ovaitore; aea ara arero soa sarapaita sare voa moravai roi.

⁵⁵ Ipi arave sarōva larietau eite kofa reha, aea arave ovo ta lari ma eite kofa reha.

⁵⁶ Arave sarōva aea arave ovo ita la larita lea karu arave iri voa pea vovea, aea ara ta areve iri voa.

⁵⁷ Makuri lei peita Oa sa araro itapōpe, aea ara Oa vei makuri lei peita lōfeare, araro larita lea karu ara vei makuri lei peava roi.

⁵⁸ Kauri voa pea faukōpe larietau meha; eve papa‐ita sa la’ la’ opaiape lea larietau feare kasirau, a—, mea larietau la larita karu are makuri lei pepe peava roi.

Karu rauapo Iesu la kiripōpe

⁵⁹ Lea o Iesu sa sunako voa omoipe, are Kaperanauma voa satiriaraipe lea soasoa voa.

⁶⁰ Lea o la mapi satiriaraita karu rauapo mō ōpe, Lea o heafo rovaea kofa; arero mapi ovaita ore karu leisa?

⁶¹ A—, Iesu areve elore haiiri voa ore lei areve satiriaraita karu sa ōpe o poporu vei, arero mō ōpe, Lea o sa ero lei safosafoai ei?

⁶² E Karu ve Atute are evera peiape oti voa pataita la ofae eavaita, e leafeare leiti roi?

⁶³ Lei makuri leita siahu Ualare ve Arahoha voa, sarōva are eite kasirau. Ara ero laua sukavaita mea o ere Arahoha ita makuri ita reha;

⁶⁴ a—, e voa karu hea sukaerereai sore. Ipi Iesu arero sukaerereai auke leipe lea karu la oarehōva soa voa ore leipe, aea arero kivaia lei opai voa miarai vita ta reha.

⁶⁵ Aea are ta mō ōpe, Ara lea vei ero o mō auai, Oa sa haiiri arero miarai auke leitita, lea karu sa araro tai foreraita ore kao.

⁶⁶ Lea soa voa areve satiriaraita karu rauapo arero aitetai vei kiripi, aea are ita fareho roroai vei haiarara leipe.

⁶⁷ Soka Iesu twelve karu la mō ōpe, E ta araro kiripai haikaeaipea ei?

⁶⁸ Simona Petero tava o arero mō ōpe, Papuvita e, ela leiro tai terai roi? Peita makuri ve o a voa reha.

⁶⁹ A Ualare ve Safu Vita lareva ela lea la sukaererea ore lei la roroa meha.

⁷⁰ Iesu tava o mō ōpe, Ara ero twelve karu la haikaeai ovai kao ei? Eite e voa karu farakeka aea diabolo.

⁷¹ Are lea o Iudasi Simona, Isakariota karu vei moipe, ipi arero kivaia lei opai voa miarai vita are reha, lea twelve karu voa farakeka aea are reha.