Ioane 5 - Testamenta Áre 1983 (Toaripi PNG)

Sosoka aea Ierusalema voa

¹ Lea ve aite voa Iuda ereve sosoka aea leipe, aea Iesu ta Ierusalema voa pataipe.

² Soka Ierusalema voa, Mamoe ve Otiape haekao voa, sitoi lovoa eaeiape; are Heberu rare Betesata la aravōpe, aea tōvu five lōvoa pepeiape.

³ Maea eka karu rauapo lōvoa iroropi siseiape, ofae kuku karu, mora kaiae karu, maea kokoroōpe eka karu, [ma ve kukutare pataita soa vei taiape.

⁴ Ipi Papuvita ve aneru soasoa voa fauka ma la ovi ilafisaiape ma fae ve iri voa; ma voa omopa faukaita lea karu ve eka la lei lareva leiape. Eka hariaharia lōfeare sa lei lareva leiape.]

⁵ Sisoro thirty‐eight maea pui eka leipe karu farakeka lōvoa iavi eaeiape.

⁶ Iesu arero lōvoa iavi eaeiape la ofae eovōpe lea mea, are ore are eka soa savori lei ea vovea. Soka are arero mō ōpe, A rofo haikaeaipea ei?

⁷ Lea eka karu tava o arero mō ōpe, Papuvita e, ma ovi ilafisaita lea soa voa ara karu kasirau, araro sitoi ma voa paraeai vei; a—, ara faukaita lea soa voa, karu haria sa araro omopa sasauka vovea.

⁸ Iesu arero mō ōpe, Itei, ave kite la ovi mora teraia.

⁹ Lō mei, lea vita utohoa lareva lei, areve kite la fareōvi mora terōpe reha. Soka lea sare Sabati sare.

¹⁰ Lea vei Iuda karu ere lea eka kaleipe vita la mō ōpe, Sabati sare meha, aea a ave kite la taiovaita lareva kao.

¹¹ A—, are tava o erero mō ōpe, Araro lei lareva loita lea vita araro o mō auai, Ave kite ovi mora teraia.

¹² Ere arero lalasi lei mō ōpe, Ave kite ovi mora teraia lea o aro leisa moi?

¹³ A—, lea eka kaleipe vita are Iesu ore kofa leiti kao; ipi karu sitavu lōvoa aea Iesu murufakao maria voa soeōpe eavia.

¹⁴ Aite voa Iesu arero Maso Uvi voa sukaea arero mō ōpe, Mapaia, aro lei lareva loita reha; a mai kaiae ata levi leitia, etau maealolo kofa aro toai ave.

¹⁵ Lea vita te Iuda karu la omoipe, arero lei lareva leipe vita Iesu reha.

¹⁶ Lea vei Iuda karu ere Iesu la hasiavai vei aitetaiape, ipi are lōfeare etau la Sabati sare voa leiape eavia.

¹⁷ A—, Iesu tava o erero mo ope, Arave Oa sa itiiti faitora tivi lei vovea; ara ta tivi la leipea.

¹⁸ Lofeare vei Iuda karu ere haikaeai rovaea arero paeai vei, ipi are Sabati sare la hasiavaita lea haria kao, a—, ipi aeata meha, are Ualare la areve elore Oa rare la aravōpe, lōfeare are areve elore maea la lei Ualare ita usoso leipe reha.

¹⁹ Soka Iesu tava o erero mō ōpe, Ara okofa ita ero o la moi, Atute etau aea la are haria leitita ore kao; are Oa sa leitita etau la ofae eavaita, a—, are ta lea etau la leitita ore; Oa sa leitita lea etau, Atute ta lea etau la lōfeare lei vovea.

²⁰ Ipi Oa are Atute la haikakare leititore, aea are sa leipeta lea etau foromai arero muiai vovea; are mea etau la sapataita etau metameta kofa ta arero muiai roi, ero lei haihava foromai leiti vei.

²¹ Usoso Oa opai karu la moravi erero lei makuri leitita lōfeare, Atute ta lōfeare are haikaeaita lea karu la lei makuri lei vovea.

²² Ipi Oa karu la seseōvi tava miarai sore, a—, are lea seseōvi tava miaraita siahu foromai Atute la miōri la eaea,

²³ karu foromai Atute la taivotai vei, ere sa Oa la taivotaita lōfeare. Atute la taivotai auke leitita lea karu, Atute la itapōpe lea Oa ta taivotai sore.

²⁴ Ara okofa ita ero o la moi, Arave o la mapi, aea araro itapōpe Ualare la sukaerereaita lea karu peita makuri ovaita reha; are seseōvi tava miaraita soa voa levi forerai roi, a—, are opai soa la kiripi makuri voa foreri laipea.

²⁵ Ara okofa ita ero o la moi, Ora la kotipea, a—, loita meha, lea mea opai karu Ualare ve Atute ve i la mapai roi, aea mapaita lea karu makuri leiti roi.

²⁶ Ipi usoso Oa makuri ve ipi areve iri voa ovaita feare, lōfeare are siahu Atute la miarōpe makuri ve ipi ta areve iri voa ovai vei.

²⁷ Are siahu ta Atute la miarōpe seseōvi tava miarai vei, ipi are Karu ve Atute eavia.

²⁸ Mea etau vei haihava levi leitia; ipi soa forerai roi, lea mea tapu oti voa pepeita karu foromai areve i la mapi,

²⁹ aea ere pisiri voa forerai roi: lareva la leiape lea karu makuri soa voa itoteai vei; a—, kaiae la leiape lea karu seseōvi tava miaraita soa voa itoteai vei.

Iesu vei okofa la muiaita mai

³⁰ Arave haria haikaeaita etau la ara leiti sore; Ualare sa araro moita lea mai feare ara seseōvi tava lōfeare miara vovea; aea ara seseōvi tava miaraita mai haura, ipi ara arave haria haikaeaita mai la leiti sore, a—, araro itapōpe Ualare sa haikaeaita lea mai.

³¹ Ara arave elore mai vei karu la lei ore lei omoit’ oria, a—, ara moita lea o okofa la levi muiai roi.

³² A—, karu haria sa ara vei omoita, aea ara ore are ara vei moita lea o okofa reha.

³³ E sa meu karu Ioane tai itapōpe, aea are okofa la muiai vei o moipe reha.

³⁴ Eite ara haikaeaipeta okofa moita o, karu ve o kasirau; a—, ara mea o la ero lei makuri leiti vei moi.

³⁵ Ioane are usoso a mopi ovava haeaita lamepa feare lei, aea e soa harua voa areve ovava voa hailareva leiape.

³⁶ A—, ara vei okofa moita o ta ia, lea o Ioane sa moipe o la sapatai; ipi Oa sa ara leiti vei miōri aea ara lei kekese leipeta lea tivi sa muiai vovea, Oa sa itapōpe Atute ara meha.

³⁷ Aea araro itapōpe lea Oa, are ta okofa leita o ara vei moiape; eite e areve o‐ape mapai sore, aea areve opape ta ofae ruri sore.

³⁸ Areve o eve iri voa ta pavai sore, lea vei are sa itapōpe mea vita la e sukaerereai sore.

³⁹ E Safu Buka ve o la muti seseōva vovea, ipi eve haiiri e peita makuri lōvoa ovai vei. Eite lea Buka okofa leita o la ara vei moitore;

⁴⁰ a—, e makuri ovai vei araro tai koti haikaeai sore.

⁴¹ Karu sa araro maeati vei ara haikaeai sore.

⁴² A—, ara ore e Ualare la haikakare araita mai eve iri voa pei sore.

⁴³ Ara arave Oa ve rare ita koti la me meha, a—, e araro maeafukapai sore; etau farakeka, karu aea areve elore rare ita kotita, a—, e arero maeafukapaita reha.

⁴⁴ E leafeare sukaerereaita ore? E maeati elore elore voa haikaea eli vovea, a—, Ualare farakeka kofa voa foreraita lea maeati la e haikaea eli sore.

⁴⁵ E hai mō levi kaeaia, ara sa havara Oa ve omopa voa ero paraeai roi; ero havara paraeai vita farakeka laipea, are Mose reha, e sa sesearaipeta lea vita.

⁴⁶ Ipi e Mose la sukaerereai kofa leitit’ oria, e araro ta sukaerereai lare, ipi are o ara vei ukōpe eavia.

⁴⁷ A—, e are sa ukōpe o la sukaerereai auke leitita, a—, e arave o la leafeare lei sukaerereai roi?