Ioane 4 - Testamenta Áre 1983 (Toaripi PNG)

Iesu Samaria voa

¹ Soka Farisea karu ere fari mapōpe Iesu sa bapatiso leiape satiriaraita karu ere rauapo kofa, Ioane ve rauapo kao.

² Eite Iesu kofa bapatiso leiti kao, a—, areve satiriaraita karu sa haria leiape.

³ Soka Iesu lea o la ore leipe soa, are Iudea kiripi Galilea voa ata keroripe.

⁴ Areve otiharo Samaria ve aru voa reha.

⁵ Samaria voa are karikara farakeka aea voa forerōpe, Sukara la aravōpe, Iakobo areve atute Iosefa la evera miarōpe mea itua hōiri eaeiape.

⁶ Iakobo ve matoru ta lōvoa eaeiape. Sare haro arori voa feare soa, Iesu sariva lei lei maea‐uti sisapi, matoru maria voa au avōpe.

⁷ Samaria ua farakeka aea ma hivai vei kotipe; Iesu arero mō ōpe, Ma ara lari vei araro miaraia.

⁸ Ipi areve satiriaraita karu lōvoa kao, ere larietau itaea leiti vei karikara voa kavōpe eavia.

⁹ Lea Samaria ua arero mō ōpe, Lekōru? a Iuda karu araro Samaria ua la ma vei leafeare lei loki loi ei? Areve o lōfeare ve ipi Iuda karu Samaria karu ita leitita mai farehoria leiti sore.

¹⁰ Iesu tava o arero mō ōpe, A Ualare sa au miaraita lea meru la ore leitita, aea ma araro miaraia ara lari vei, lea o aro moipeta vita ta ore leitit’ oria, a—, a arero loki lei are makuri leita ma la aro miarai lare.

¹¹ Lea ua arero mō ōpe, Papuvita e, a ma voa paraea hivi aruovi pataita etau kasirau, aea matoru ta koa; lei! a lea makuri leita ma lehara?

¹² Mea matoru ereitave papa Iakobo sa elaro miarōpe; are ta mea ma la lape, areve atutemori ita aea areve animala ita. Aita! a areve rovaeka vita ei?

¹³ Iesu tava o arero mō ōpe, Mea ma la larita lea karu kōvōre‐tolo ata leiti roi;

¹⁴ a—, ara sa arero miaraita ma la larita lea karu are kōvōre‐tolo ata levi lei pepe peava roi; a—, ara arero miaraita ma areve iri voa popi, popotoa popotoa peita makuri voa forerai vei.

¹⁵ Lea ua arero mō ōpe, Papuvita e, lea ma araro miaraia ara kōvōre‐tolo ata levi leiti vei, aea mea oti voa ma hivai vei ata levi koti roi.

¹⁶ Iesu arero mō ōpe, Kei, ave vita isa mōvoa ata kerori kotia.

¹⁷ Lea ua tava o arero mō ōpe, Ara vita kasirau. Iesu arero mō ōpe, A mō moipeta, Ara vita kasirau, lea o haura;

¹⁸ ipi a vita five sa laeaiape, aea a faitora ovi meita lea vita are ave vita kofa kao. A moipeta lea o okofa.

¹⁹ Lea ua arero mō ōpe, Papuvita e, faitora ara ofae eavaipeta a peroveta vita.

²⁰ Elave papa mea raepa voa maso toaiape, a—, e mō aritore, Maso toaita oti kofa Ierusalema voa reha.

²¹ Iesu mō ōpe, Ua e, arave o la sukaerereaia; ora la kotipea lea mea karu Oa la mea raepa voa aea Ierusalema voa, maso levi toai roi.

²² E ore auke leita lea Ualare la maso toaitore; a—, ela ore leita lea Ualare la maso toa vovea. Ipi lei makuri leita siahu Iuda karu voa foreraitore.

²³ A—, ora la kotipea, a—, loita meha, lea mea maso toaita karu kofa Oa la arahoha ita lei aeata okofa ita lei maso lōri toai roi. Ipi Oa arero maso toai vei lōfeare karu la haikaea eli vovea.

²⁴ Ualare are Arahoha reha, aea arero maso toaita mai kofa farakeka meha, arahoha aea okofa ita maso toai vei.

²⁵ Lea ua arero mō ōpe, Ara ore Mesia, lea ve eite Keriso, koti roi, aea are kotita lea mea are etau foromai la ereitaro pisiri muiai roi.

²⁶ Iesu arero mō ōpe, Are eite arao, ara aro laua la sukavaipea meha.

²⁷ Soka lea soa voa areve satiriaraita karu koti foreri, are ua la laua sukavaiape lea vei haihava leipe; a—, karu farakeka aea arero mō moi kao, A lekōru vei elipea? aeata mea o, A arero laua levei sukavaipea?

²⁸ Lea ua areve ma posu kiripi, karikara voa kei foreri, karikara heavita la mō ōpe,

²⁹ Kotiria, ara leiape etau foromai la araro moita vita la ofae eavai vei. Mea Keriso varo?

³⁰ Lō mei, ere karikara kiripōpe reha arero tai isai vei.

³¹ Lea ua arero kiripōpe soa areve satiriaraita karu arero loki mō leipe, Rabai e, larietau laria.

³² A—, are erero mō ōpe, Ara e sa ore auke larita larietau ia, ia.

³³ Lō mei, satiriaraita karu lea o vei elore elore mō moipe, Karu aea larietau arero tai ovi koti ei?

³⁴ Iesu erero mō ōpe, Araro itapōpe Ualare ve haikaeaita mai la kakeva lei, areve tivi ta lei roroka leiti vei, arave larietau reha.

³⁵ Eve o aea ta meha ei? Papare orakaraka la eaea, aite fare sarapaita soa forerai roi. A—, ofae eavaia, ara ero o mō auai, Eve ofae moravi, forōva otioti la fofoisaia; ere sea lei, sora loi fare sarapai vei.

³⁶ Fare sarapaita karu areve tivi tava la ovi fare la arisovaipea peita makuri ve soa vei, lea vei mere vipaita karu aea fare sarapaita karu farehoria hailareva leiti roi.

³⁷ Ipi soa foromai moita mea o okofa, Karu farakeka aea mere vipaitore, karu aea ta fare sarapaitore.

³⁸ Ara ero itapi e sa tivi heafo leiti auke leipe lea fare la sarapai vei; karu haria sa tivi heafo leipe, a—, e ereve tivi heafo ve iri voa oropi la roroa.

³⁹ Soka lea karikara voa pepeita Samaria karu rauapo Iesu la sukaerereōpe, ipi lea ua sa mōri moipe o vei, Ara leiape etau foromai are sa araro omoi.

⁴⁰ Lea vei lea Samaria karu arero tai kotipe soa, ere arero loki leipe ere ita pavai vei, aea are sare orakoria lōvoa peiape.

⁴¹ Soka karu rauapo areve o vei arero ta sukaerereaiape.

⁴² Ere lea ua la mō ōpe, Ela arero faitora sukaerereaipeta ipi ave o vei kasirau; a—, ipi ela kofa sa arero mapi ore loita meha, mearovaeka la lei makuri leiti o oita vita kofa areo meha.

Galilea voa

⁴³ Soka lea sare orakoria kaleipe soa are lea oti kiripi Galilea voa kavōpe.

⁴⁴ Ipi Iesu elore maea o mōri evera moipe, Peroveta karu la areve elore karikara voa karu sa maea levi ati roi.

⁴⁵ Soka are Galilea voa kei forerōpe lea mea, Galilea karu arero maeafukapōpe ipi ere Ierusalema voa sosoka soa voa Iesu sa leiape etau foromai la ofae eavōpe, ipi ere ta lea sosoka soa voa patei forerōpe eavia.

⁴⁶ Soka are Kana, Galilea soa ve karikara aea voa forerōpe, are ma la toarōrisa uaina leipe lea oti voa. Gavana karu farakeka aea lōvoa, areve atute Kaperanauma voa eka lei eaeiape.

⁴⁷ Iesu Iudea kiripi Galileia voa forerōpe lea fari la are mapōpe lea mea, are Iesu tai patei, arero loki leipe are fauka areve atute ve eka la lei lareva leiti vei, ipi are opai vei leipe eavia.

⁴⁸ Iesu arero mō ōpe, E siahu ve peise aea haihava leita etau la ofae eavai auke leitita, a—, e levi sukaerereai roi.

⁴⁹ Lea gavana karu mō ōpe, Papuvita e, eapo ara ita faukaia, arave atute opai vei la leipea.

⁵⁰ Lea mea Iesu arero mō ōpe, Maea lei eapo faukaia, ave atute makuri leiti roi. Lea karu Iesu sa moipe o la sukaererea, maea lei elore voa faukōpe reha.

⁵¹ Soka are otiharo voa faukaiape lea mea, areve sarufa karu arero sukaea, arero mō ōpe, Ave atute makuri leitita.

⁵² Lea mea are erero lalasi mō leipe, Are ata lareva leitia ora lekōru? Ere arero mō ōpe, Area, sare haro arori soa voa eka ve siahu kaleitita.

⁵³ Lō mei, oa ore leipe Iesu sa arero mōri moipe o, Ave atute makuri leiti roi, lea o ve ora reha. Soka are areve uvi karu foromai ita sukaerereōpe reha.

⁵⁴ Iesu sa leipe orakori siahu ve peise reha, are Iudea kiripi Galilea voa forerōpe lea mea.