Ioane 2 - Testamenta Áre 1983 (Toaripi PNG)

Iesu sa oarehōva leipe siahu ve peise

¹ Soka oroisoria sare voa eva‐e sosoka Galilea soa ve karikara Kana voa leipe. Iesu ve lou ta lōvoa,

² aea Iesu aea areve satiriaraita karu ita ta lea eva‐e sosoka lari vei isa forerōpe.

³ Soka uaina kaleipe soa Iesu ve lou arero mō ōpe, Ere uaina sa kaloi.

⁴ A—, Iesu arero mō ōpe, Mea ua e, ara vei a lekōru la leipea? Arave soa foreraia kao.

⁵ Areve lou tivi karu la mō ōpe, Are sa ero omoita lea etau foromai la leitia.

⁶ Iuda karu ere maea la lei ovava leita mai vei safu ia. Lea mai la leiti vei fave ma posu six lōvoa pepeiape, farafarapo ve rovaea usoso 100 litre feare.

⁷ Iesu erero mō ōpe, Posu ma sa sisōvi sisōvi soaria; lō mei ere erero soōpe reha.

⁸ Are erero o ata mō ōpe, Faitora lea soarita ma hea hivi eva‐e sosoka papuvita tai ovi teraia. Lō mei, ere lōfeare leipe.

⁹ Lei lea ma toarōrisa uaina leipe. Sosoka papuvita ape sa tarapōpe soa, are lea uaina forerōpe oti haveva, eite ma hivaita lea tivi karu sa ore leipe. Soka are ua la laeai vei leipeta vita la isa mō ōpe,

¹⁰ Karu foromai uaina tapare kofa omopa miara vovea, aea kokorukaita karu uaina rauapa la’ la’, ere aite tapare auke uaina la miaraitore; a—, a uaina tapare kofa la kiva lei itiiti faitora.

¹¹ Iesu sa oarehōva leipe siahu ve peise reha, are Kana karikara Galilea soa voa leipe. Lōfeare voa are areve sosorusosoru pisiri voa muia, aea areve satiriaraita karu arero sukaerereōpe.

¹² Lea ve aite voa are, areve lou, aea areve maraiosu aea areve satiriaraita karu ita fareho Kaperanauma voa fafuka, ere lōvoa sare hiake popōvōpe.

Iesu Ierusalema voa

¹³ Soka Iuda karu ve Foapaita Sosoka haekao leipe, lea vei Iesu Ierusalema voa pataipe.

¹⁴ Maso Uvi voa are boromakao aea mamoe aea sua aea moni ilala leiape karu aipepeiape la ofae eavōpe.

¹⁵ Eovi are pete toa lea pitaki sa erero foromai, mamoe ita, boromakao ita farehoria Maso Uvi ve maria voa toa larivatōpe. Are ta moni ilala leiape karu ve moni la toa tovusea, ereve posa ta mavitoōpe.

¹⁶ Aite are sua la itaea lei miaraita karu la mō ōpe, Erero maria voa maravi forera teraia; arave Oa ve uvi la lei, etau la itaea leita oti levi leitia.

¹⁷ Areve satiriaraita karu mea uka siseiape o la haikaeōpe reha, Ipi ave uvi vei arave haihahari araro la’ haroava vovea.

¹⁸ Soka Iuda karu ere lalasi lei arero mō ōpe, A siahu ve peise lekōru la elaro muiai vei, ipi a mai mōfeare leipeta lea vei?

¹⁹ Iesu tava o erero mō ōpe, Mea Maso Uvi la toa foforukaita, a—, sare oroisoria voa ara arero ata moravai roi.

²⁰ Lō mei, Iuda karu arero mō ōpe, Sisoro forty‐six voa mea Maso Uvi la turaiape, a—, a arero sare oroisoria voa ata turi moravai roi ei?

²¹ A—, are omoipe lea maso uvi ve eite areve elore maea reha.

²² Are aite soa voa api ata itoipe lea mea, areve satiriaraita karu are moipe lea o la haikaea, aea ere Safu Buka aea areve satiriaraita o ita la sukaerereōpe reha.

²³ Soka Iesu Ierusalema voa Foapaita Sosoka lei peiape lea mea, karu rauapo are leiape lea siahu ve peise la ofae eovi arero sukaerereōpe.

²⁴ A—, Iesu ve sukaerereai ere voa kasirau, ipi are karu foromai la ore leipe eavia.

²⁵ Karu aea sa ereve eite arero satiriarai vei are haikaeai kasirau, ipi are karu ve haiiri voa siseita lea etau etau la ore fae.