Ioane 19 - Testamenta Áre 1983 (Toaripi PNG)

¹ Lea ve aite Pilato Iesu la ovi, o mei ere arero teavi sape.

² Aea maola karu kekeva kiri marekeke sa sa’ areve harofave voa topi, puta mohari ta arero mopi,

³ aea arero tai te mō moiape, A eapo reha, Iuda karu ve King e! Aea ere arero mai sa toaiape.

⁴ Soka Pilato maria voa ata foreri mō ōpe, Ofae eavaia, ara arero ero tai ata lariavaita meha, ero lei ore leiti vei ara areve kaiae eavaia kasirau.

⁵ Lō mei, Iesu, kiri marekeke kekeva topi aea puta mohari ita mopi, maria voa forerōpe reha. Pilato erero mō ōpe, Ofae eavaia, lea vita meha!

⁶ Soka maso harofave karu aea maso uvi kiva karu arero ofae eovi, i mō isa moipe, Arero satauro voa vitei paeaia, arero satauro voa vitei paeaia! Pilato erero mō ōpe, E haria arero ovi satauro voa vitei paeaia; ipi ara areve kaiae eavaia kasirau.

⁷ Iudea karu tava o arero mō ōpe, Ela safu ia, aea lea safu arero paeaita haura, ipi are areve elore maea la lei Ualare ve Atute ve maea lei mea vovea.

⁸ Pilato lea o mapi, are tore foromai leipe.

⁹ Are gavana ve uvi ata oropi, Iesu la mō ōpe, A leavoa forerai? A—, Iesu tava o arero moi kasirau.

¹⁰ Lea vei Pilato arero mō ōpe, A araro o moi haikaeaia kao ei? Ara siahu ia aro paraeai vei, aeata ara siahu ia aro satauro voa vitei paeai vei, a lea la ore kao ei?

¹¹ Iesu tava o arero mō ōpe, Arori voa fauka foreraita siahu la aro miarai auke leitita, a—, a siahu ara vei taheka aeata levi ovai roi; lea vei araro aro miaraita lea vita ve itai voa kaiae rovaeka la eaea.

¹² Soka Pilato arero paraeaita otiharo metakao eliape; a—, Iuda karu i mō isa moiape, A mea karu la paraeaita, a—, a Kaisara ve moraitai kao, ipi areve maea la lei king leitita lea karu foromai Kaisara la sukavuteatore.

¹³ Pilato lea o la mapi, are Iesu la maria voa lariōvi, aea seseōvi tava miaraita lea oti voa avōpe; lea oti ve rare Fave Korukoru Oti; Heberu uri areve rare Gabata reha.

¹⁴ Foapaita Sosoka vei etau pisosi kekese leita sare reha, sare koko soa feare. Soka Pilato are Iuda karu la mō ōpe, Ofae eavaia, eve king meha!

¹⁵ A—, ere i mō isa moipe, Fareovaia! Fareovaia! Arero satauro voa vitei paeaia! Pilato erero mō ōpe, Ara eve king la satauro voa vitei paeai vei ei? Maso harofave karu tava o mō ōpe, Ela king aea kao, Kaisara sa haria.

¹⁶ Soka are Iesu la satauro voa paeai vei erero miarōpe reha. Ere Iesu la maria voa lariōvi forerōpe.

Iesu la satauro voa paeōpe

¹⁷ Iesu areve satauro la taiovi kei oti rare Harofave Kōkuharo oti, Heberu uri Gologota rare aravōpe lea oti voa forerōpe.

¹⁸ Foreri ere lōvoa arero satauro voa vitaipe, aea karu oraka ta are ita farehoria elore elore satauro voa, aea itai, aea itai aea Iesu aru voa.

¹⁹ Pilato karoro ukōpe satauro ve haro voa vitai vei, aea lea karoro ve o meha, Iesu, Nasareta Karu, Iuda ve King.

²⁰ Iuda karu rauapo lea karoro mutiape, ipi Iesu la satauro voa paeōpe lea oti karikara hōiri eaeiape, aea lea karoro ta Heberu uri aea Roma uri aea Helene uri voa ta ukōpe eavia.

²¹ Lea mea Iuda maso harofave karu ere Pilato la mō ōpe, Iuda Karu ve King, lea o levi ukaia, a—, o mōfeare ukaia, Mea vita ve o Ara Iuda karu ve King.

²² A—, Pilato tava o mō ōpe, Ara sa ukaita lea o ara uka roroka loita reha.

²³ Soka maola karu Iesu la satauro voa vitei roroka lei, ere areve maeaputa la firufiru orakaraka voa faeōpe, firu farafarapo maola karu farafarapo sa ovai vei. Ere areve iri puta savori ta ovōpe, lea puta totorai auke lei, soa arori soa ipi voa arero maea makora farakeka sa sōpe.

²⁴ Soka ere elore elore mō ōpe, Ereita arero levi torerapaia; ereita feai fasi leisa ovai roi lōri ore leiti vei. Mai lōri leipe ipi Safu Buka ve mea o la lei okofa leiti vei, Ere areve maea puta ere voa faea, aea arave iri puta ovai vei ere feai fasōpe. Soka lea maola karu ere mai lōri leipe.

²⁵ Soka areve lou aea areve lou kokoe, Maria, Klopasi ve ua, aeata Maria, Magadala ua, ere satauro voa hōiri soi pepeiape.

²⁶ Pepea Iesu areve lou aea are haikakare leiape lea satiriaraita karu farakeka ita haekao pepeiape la ofae eovi, are areve lou la mō ōpe, Lea ua e, ave atute reha.

²⁷ Aite are lea satiriaraita karu ta mō ōpe, Lea atute e, ave lou reha. Soka lea soa ve aite voa lea satiriaraita karu sa Maria la ovi areve uvi voa kiva lei peiape.

²⁸ Lea ve aite voa, Iesu etau foromai roroka leipe lea la ore lei, are Safu Buka ve o la lei okofa leiti vei, mō ōpe, Ara kōvōre‐tolo loi.

²⁹ Uaina peroro posu soa’ haekao peiape. Soka ere fave soase ovi uaina peroro sisōvi, hora kui voa vifei, areve ape voa muiōpe.

³⁰ Muia Iesu lea uaina peroro sosoa roroka lei, are mō ōpe, Roroka loita reha. Are areve harofave totopi, areve ove la paraea socōpe.

³¹ Lea sare Foapaita Sosoka ve etau la kekese leita sare, Iuda karu haikaeai kao opaita maea satauro voa Sabati sare voa lōri totoei vei, ipi lea Sabati safu sare rovaea eavia. Lōfeare vei ere Pilato la loki leipe satauro voa vitei totoeiape karu ve mora la topupukovi, lōri fareovai vei.

³² Soka maola karu koti, omopa vita ve mora oraka la topupukavōpe, aeata are ita fareho satauro voa paeōpe lea vita aea ve mora oraka ta reha.

³³ A—, ere Iesu tai koti, ere are everori opōpe la ofae eovi, areve mora oraka la topupukavai kasirau.

³⁴ A—, maola karu farakeka aea areve koesa hora sa suka faropi, ovo ita ma ita utohoa foreri sisapōpe reha.

³⁵ Lea la ofae eavōpe vita sa o pisiri moita meha, aea areve lea o okofa. Are ore areve o okofa aea are lea la moita ipi e ta sukaerereai vei.

³⁶ Etau lōfeare forerōpe ipi Safu Buka ve o la lei okofa leiti vei, Areve uti farakeka aea la levi topukavai roi;

³⁷ Safu Buka ve o aeata mōfeare, Ere suka faropōpe lea vita la ere ofae fofoisai roi.

Iesu la viopōpe

³⁸ Lea ve aite voa Iosefa Arimatea karu, Iesu ve satiriaraita karu farakeka aea, a—, are murufakao leipe ipi are Iuda karu la tore leipe lea vei, are Iesu ve maea la fareovai vei Pilato la loki leipe. Lei, Pilato areve lea o la mapi haiiri usoso leipe. Soka Iosefa kei Iesu ve maea la fareovōpe reha.

³⁹ Nikodemusi, arero tai faita aea voa omopa forerōpe lea vita, are ta hore aea horovoso ita ilafisa muramura muforoe ovi kavōpe, lea muramura ve pasou usoso 50 kilo feare.

⁴⁰ Soka ereuka Iesu ve maea la ovi fauka, fasaita muramura muforoe ita ilafisa fasi fasi roroka leipe; Iuda karu ve viopaita mai lōfeare.

⁴¹ Soka arero satauro voa paeōpe lea oti voa forōva oti aea ta eaeiape, aea lea forōva oti voa viopaita oti áre ita ia, karu lōvoa evera viopai kasirau.

⁴² Soka ereuka Iesu la lōvoa viopōpe ipi lea sare Iuda karu ve Foapaita Sosoka ve etau kekese leita sare, aeata ipi lea viopaita oti ta haekao eaeiape eavia.