Ioane 16 - Testamenta Áre 1983 (Toaripi PNG)

¹ Ara mea etau ero omoi eve sukaerereaita haiiri oai ave.

² Ere ero sunako voa sukavutea e maria karu leiti roi; okofa, soa forerai vei la roi lea mea ero paea opaita lea karu hai mō seseōvai roi, are lōfeare voa Ualare sa haikaeaita tivi la leiti roi.

³ Ere lea etau ero leiti roi, ipi ere elaka Oa ita la ore leiti sore.

⁴ A—, ara lea etau ero omoi, ipi ereve eite sa aite voa foreraita lea soasoa voa, e arave mea o la ata haikaeai vei. Ara omopa soa voa mea etau ero omoi kao, ipi ara e ita farehoria peiape eavia.

Safu Arahoha Lareva sa leita mai

⁵ A—, faitora ara araro itapōpe Ualare tai terai vei la leipea; a—, e karu farakeka aeata araro lalasi mōri leitia kao, A leavoa terai roi?

⁶ A—, ipi ara sa mea etau ero omoita eavia, e haiiri eae foromai la leipea.

⁷ Etau farakeka, ara okofa ita ero o la moi; ara ero kiripi teraita, a—, e lareva la sukaeai roi; ipi ara terai auke leitita, a—, Toaraita Vita ero tai levi koti roi; a—, ara teraita, a—, ara arero ero tai itapai roi.

⁸ Are foreraita lea mea, are mearovaeka la iri kaiae vei aeata mai haura vei aeata seseōvi tava miaraita soa vei pisiri muia lei ore kofa leiti roi.

⁹ Are ereve iri kaiae la pisiri muiai roi, ipi ere araro sukaerereai auke eavia.

¹⁰ Are mai haura la pisiri mōri muiai roi, ipi e araro ofae ata eavai auke leita soa ara sa Oa tai teraita eavia.

¹¹ Are seseōvi tava miaraita soa la pisiri mōri muiai roi, ipi mea mearovaeka ve papuvita la seseōvi tava miōri roroka loita eavia.

¹² Ara etau rauapo hea ta ia ero omoi vei, a—, e lea la faitora mapai vei rofo usoso kao.

¹³ A—, Okofa ve Arahoha sa foreraita soa, are okofa foromai voa ero lariōvai roi; ipi are areve elore siahu sa o levi moi roi, a—, are mapi ore leita lea o foromai la omoi roi, aea aite forerai vei leita etau ta ero everori omoi roi.

¹⁴ Are araro lei sosorusosoru leiti roi, ipi are ara voa mapaita lea o la ovi ero omoi roi.

¹⁵ Arave Oa ve etau foromai arave; lea vei ara o mō aipea, Are ara voa mapaita lea o la ovi ero omoi roi.

¹⁶ Soa taheka la eaea aea e araro ofae ata levi eavai roi, aeata soa taheka la eaea aea e araro ofae eavai roi.

Haiiri eae aeata hailareva

¹⁷ Soka areve satiriaraita karu hea elore elore mō ōpe, Are ereitaro moipeta mea o lekōru, Soa taheka la eaea aea e araro ofae levi eavai roi, aeata soa taheka la eaea aea e araro ofae eavai roi, aeata areve o ta meha, Ipi ara Oa tai terai vei leipeta eavia.

¹⁸ Ere elore elore ata lalasi lei mō ōpe, Are moipeta lea o, Soa taheka ve eite lekōru? Are moipeta lea o ve eite ereita ovava leitia kao.

¹⁹ Iesu ere sa arero lalasi leiti haikaeōpe lea la ore lei, erero mō ōpe, E elore elore lalasi leipeta ipi arave o mōfeare ei? Soa taheka la eaea aea e araro ofae ata levi eavai roi, aeata mōfeare, soa taheka la eaea aea e araro ofae eavai roi, ei?

²⁰ Okofa ita ara ero o la moi, E ovororo sisapi fi ari roi, a—, mearovaeka hailareva la leiti roi. E haiiri eae leiti roi, a—, eve haiiri eae toarōrisa hailareva la leiti roi.

²¹ Ua avasa pataita hehea leitita lea mea, are haisora ia, ipi areve soa foreraita eavia; a—, mere mi a’ roroka leitita, are hehea la ata levi seseōvai roi, ipi areve hailareva karu áre la mearovaeka voa miarita lea vei.

²² Soka e ta lōfeare, faitora e haisora ia, a—, ara ero ofae ata eovi, eve hai ta lareva leiti roi, aea karu eve hailareva e voa levi fareovai roi.

²³ Lea sare voa e etau taheka aea vei araro lalasi levi leiti roi. Okofa ita ara ero o la moi, e etau aea la Oa voa arave rare vei loki leitita, a—, are ero au miarai roi.

²⁴ Itiiti faitora e etau aea arave rare vei loki leitia kasirau. Loki leitia, aea e ovai roi, eve hailareva foromai la lei kekese leiti vei.

Iesu mearovaeka la ovi aierōpe

²⁵ Mea etau vei ara hohore o ita ero moi, a—, soa forerai vei la roi lea mea ara hohore o ita ero ata levi moi roi, a—, ara Oa vei o pisiri ero omoi roi.

²⁶ Lea sare voa e etau arave rare vei loki leiti roi, ara Oa la e vei loki leiti roi, ara lea la ero omoia kao;

²⁷ ipi Oa are kofa ero haikakare araitore, ipi e araro haikakare ari aea ara Oa voa pea forerōpe, e lea la sukaererea vovo roroaita eavia.

²⁸ Ara Oa voa pea forerai, aea ara mearovaeka voa foreri la mea; a—, ara mearovaeka la kiripi Oa tai ata terai roi.

²⁹ Areve satiriaraita karu mō ōpe, Mea faitora soa a o pisiri aipea, hohore o ita moia kao.

³⁰ Ela faitora etakofa ore, a etau foromai ore, aea karu aea aro lalasi leiti vei lea eite kao. Elave sukaerereaita haiiri, a Ualare voa pea foreri la me meha.

³¹ Iesu tava o erero mō ōpe, E faitora sukaerereai ei?

³² Mapaia, ora la kotipea, a—, foreraita meha, lea mea ero liōvea, e elore elore oti voa fu a’, araro hariakao kiripai roi. Eite ara hariakao peia kao, ipi arave Oa ara ita fareho peipeta eavia.

³³ Ara mea etau etau ero la moipea ipi e tairu ara voa ovai vei. Mearovaeka voa e haisora ia, a—, hailareva leitia, ara mearovaeka la ovi aieri la mea.