Iakobo 5 - Testamenta Áre 1983 (Toaripi PNG)

Pisoso karu la kureaita o

¹ Pisoso karu e, fi ita o ita isa moia, ero tai forerai vei leipeta lea haisora rauapo veia.

² Eve pisoso etau puruta lei kaloi, aea eve maea puta ta ifo sa la’ haroavai.

³ Eve gold aea eve silva siri sa pōvi, aea ereve siri sa eve kaiae la pisiri muia, eve maeasarōva la usoso sarita a feare sa sa’ haroavai roi. E tava rovaea etau la soa sarapaita sare voa maravi laisesea.

⁴ Mapaia, eve otioti voa forōva arita karu ve tivi tava, e apeva lei miarai auke leitia lea tava fi la aipea; aea fare sarapaita karu ve fi o Sitavu sitavu ve Papuvita ve ōvauta voa foreraita meha.

⁵ E mearovaeka voa etau lareva rauapo ita, hailareva lei la roroa. E eve maea la lei pakura la leipea paea opaita soa ve sare vei.

⁶ E haura karu la seseōvi kaiae o a’ paea ōpe, ere tava ivara lei ero sukavuteai sore.

Ualare la loki lei, au taia

⁷ Soka, paumarehari e, haiiri rofo ita au moraria pepepe Papuvita sa foreraita soa voa. Haiiri seseōvaia, forōva arita karu mea ve fare lareva la tai vovo mea vovea tetete avora lai aea mauta lai ita sa mea la a’ vevea vevea roroka leita soa.

⁸ E ta lōfeare haiiri rofo ita tai vovo roroava, ipi Papuvita forerai soa haekao loi.

⁹ Paumarehari e, o ruruku elore elore levi aria; lōfeare Ualare ta seseōvi tava ero levi miarai roi. Mapaia, seseōvi tava miaraita Papuvita utape voa soi laipea.

¹⁰ Paumarehari e, peroveta karu, Papuvita ve rare ita ovoro omoiape lea karu, ereve hehea aea ereve haiiri rofo ita morariape mai la ruruiaia.

¹¹ Mapaia, haisora la haiiri rofo ita au morariape lea karu vei ereita o lareva aritore. E Iobu ve haiiri rofo ve fari la mapi ore kofa, aea Papuvita sa aite soa voa are vei leipe lea mai ta ofae eovi ore la leipea. Ipi Papuvita are haimafu rovaea aea maeaforoe foromai lei vovea.

¹² A—, arave paumarehari e, etau rovaea meha: e otoare arita lea mea, okofa lei ari vei moita o farakeka ita levi topiari moia; kauri ō mearovaeka ō etau aea ve rare ita otoare levi aria. A—, eve a o ve eite a, aea eve kao o ve eite kao; lōfeare voa Ualare ero seseōvi kaiae o ero levi ari roi.

¹³ Eve karu aea haisora ita meita, a—, are Ualare la loki leitia. Karu aea hailareva ita meita, a—, are maeatita fara feraia.

¹⁴ E voa karu aea eka leitita, a—, are ekalesia opasora‐sora la isa koti, aea ere Papuvita ve rare ita arero teoru sa veveti, are vei Ualare la loki leitia.

¹⁵ Sukaerereaita haiiri ita Ualare la loki leitita, lea eka karu la lei lareva lei, Papuvita sa arero moravai roi, aea are sa leitita lea kaiae ta felaukea mutapai roi.

¹⁶ Lea vei e eve iri kaiae la elore elore vavavaia, aea elore elore vei Ualare la loki leitia, eve eka la lei lareva leiti vei. Haura karu ve veveu o voa foreraita eite siahu rovaea ia.

¹⁷ Elia are ta karu, ereitave leita mai ita usoso, a—, are lai levi ari vei lea o Ualare la loki leipe, aea sisoro oroisoria aea papare six soa voa lai mearovaeka voa ari auke leipe.

¹⁸ Lea ve aite voa are loki ata leipe, aea kauri voa lai a’, mearovaeka ta areve fare la ata taipe.

¹⁹ Arave paumarehari e, eve karu aea okofa ve otiharo la kiripi maria voa meita, aea karu aea sa arero lariōvi ata kotit’ oria,

²⁰ a—, mea etau lea karu la lei ore leitia, iri kaiae leita karu la lei areve leita mai kaiae la kiripi, ata lariōvi kotita lea karu, areve elore ove la opai voa fareōvi makuri leiti roi, aea iri kaiae rauapo ta aierai roi.