Iakobo 4 - Testamenta Áre 1983 (Toaripi PNG)

Sosori ve ipi leavoa foreraitore?

¹ E voa sosori aea o serea elore elore ve ipi leavoa forera vovea? Ere mōfefeare forera vovea: eve maeasarōva sa haikakare leitita lea mai sa eve iri voa sosori oita lea vei.

² E etau la maravai vei haikaeai rovaea kofa, a—, e maravai auke leitita lea vei, e karu aea la paeai vei. Aea e etau maravai vei haikakare rovaea, a—, e erero sukaeai auke leitita lea vei, e o serea elore elore a’ sosori ō vovea. E etau ovai auke ve ipi e Ualare la loki leiti sore.

³ Aea e loki leitia lea soasoa voa, ero miarai auke leitia ipi e Ualare la loki kaiae ita leititore; eve haiiri e loki leita lea etau la maravi eve elore haikaeaita mai vei mutatapi kaleiti vei.

⁴ Apeva vuteaita karu e! e ore kao ei! Mearovaeka la haikakare leitita, a—, Ualare ve ote leitita mai reha. Lea vei mearovaeka ita moraitai paeai haikaeaita lea karu are Ualare ve ote karu loita reha.

⁵ Ave haiiri Safu Buka voa mōfeare o auraka auea ukōpe ei? O meha, Karu ve haiiri voa Ualare sa vipi pepeita lea arahoha ereita vei liri ita tōtō ita a’ hilisi lei vovea.

⁶ A—, are haiforoe leita meru rovaea maea aea ta topiari miara vovea. Usoso Safu Buka voa uka siseita mea o fefeare, Ualare maeamarōva karu la sukavutea vovea, a—, are haiforoe leita meru haiiri‐ipi karu la miara vovea.

⁷ Lea vei, e Ualare la mapi kakeva lei vovo roroava, a—, Diabolo la sukavuteaia, aea are ero kiripi soeai roi.

⁸ E Ualare tai haekao voa foreraia, aea are ta ero tai haekao voa forerai roi. Kaiae leita karu e, eve mai oraka la maukaia. Haiiri orakoria karu e, eve haiiri la lei ovava leitia.

⁹ E haiiri eae lei, fi a’, ovororo ta sisapaia; eve area toarōrisa fi aria, aea eve hailareva ta toarōrisa haiiri totopaia.

¹⁰ Papuvita ve soso voa haiiri‐ipi leitia, aea are sa ero moravai roi.

Hiva o levi aria

¹¹ Arave paumarehari e, e elore elore faeafaea oita o levi aria. Karu aea are areve marehari la faeafaea oita o, ō arero seseōvi kaiae o arit’ oria, are Safu Mai la seseōvi kaiae o lea mai vei arita reha. A Safu Mai la seseōvi kaiae o arit’ oria, a Safu Mai la kakeva leita karu kao, a—, Safu Mai la seseōvaita karu.

¹² Ualare sa haria Safu Mai la mei, aea karu la seseōvi tava miara vovea. Are sa haria fareōvi makuri leitita ore, aea saroroaita ta ore. A—, ao, a ita leisa, a ave haekao peita vita la seseōvi tava miarai vei ei?

¹³ Aupavaia, e o mōri moita karu e, Iso ō vevere ereita lea karikara voa terai roi; lōvoa ereita sisoro farakeka voa pōvi, etau maeamaea itaea lei, moni maravai vei.

¹⁴ Eite e vevere ve etau leafeare leitita varo, e lea la ore kasirau. Eve makuri ve eite lekōru? Ma‐huvu feare, soa taheka haria muia, ata veverapi kaleititore.

¹⁵ A—, e o mōri moita e haura, Papuvita sa haikaeai oria, ela makuri lei, mea etau aeata lea etau la leiti roi.

¹⁶ A—, faitora e maeamarōva lei, hiva la aipea, aea lea hiva arita mai maealolo.

¹⁷ Mai haura la ore lei, a—, leiti auke leitita lea karu are kaiae loita reha.