Iakobo 3 - Testamenta Áre 1983 (Toaripi PNG)

Eve ape o kiva leitia

¹ Arave paumarehari e, eve karu satiriaraita papukaru rauapo levi leitia, ipi e ore, elaro satiriaraita papukaru Ualare sa mai kere kofa ita seseōvai roi, karu haria la lōfeare levi seseōvai roi.

² Ereita karu foromai soa rauapo mai eae la leititore. A—, are sa omoita lea o foromai voa eae auke ita leitita lea vita, are haura ita lei kekese leita vita kofa, aea areve maea foromai voa ta papuvita leitita ore.

³ Ereita aruavaita auri hōsi ve ape iri voa musukeaitore erero lei kakeva leiti vei; erero ereve maea foromai la lōri aruovi eakoa eakoa aritore.

⁴ Vavaea ta ofae eavaia; ere metameta, aea fareovaita mea ve rofo sa pōvi soeaitore; a—, erero tari kaekae sa vutea vutea aritore, tari karu sa lariōvai haikaeaita lōfefeare.

⁵ Uri ta lōfeare, maea ve etau seika aea are reha, a—, are sa etau metameta vei hiva o ō vovea. Leafeare tola iri oti hauara, a—, a eroe sa oei iavi sarita ore.

⁶ Soka uri ta a feare etau. Ereitave maea ve etau hariaharia voa are mearovaeka ve maealolo lei, maea foromai voa kaiae fafarapi, makuri lei vovo meita soasoa voa a vifei eakoa toepi saritore, aea lea a saroroapaita oti voa foreraitore.

⁷ Ipi makuri etau etau foromai, aea animala aea ori, aea tititaita etau, aeata ekaka ita la karu sa satiriōri malasa leitita ore, aeata erero karu sa satiriōri malasa leiape.

⁸ A—, karu uri la lei malasa leiti sore; lavukakaea lei maealolo leitita etau are reha, paeaita opu sa soō vovea.

⁹ Ereita uri sa Papuvita, ereitave Oa la maeati vovea, aeata uri sa Ualare ve opape feare pisosiape lea karu la o maealolo ō vovea.

¹⁰ Ape farakeka voa lei lareva leitita o aeata lei maealolo leitita o forera vovea. Arave paumarehari e, lōfeare mai la leiti vei lareva kakaeite.

¹¹ Ma popotoa sisapaita oti ma pusu aeata ma kapesa ita ape farakeka voa sisapai sore.

¹² Arave paumarehari e, haue tola olive fare la taita ore ei? Aea vine tola ta haue fare la taita ore ei? Kasirau. Makaikara ta ma pusu la miaraita ore kasirau.

¹³ E voa karu leisa haiovoro aeata haiore ia ei? Are areve makuri ve lareva la haiovoro kofa aea haiiri‐ipi ita sa areve leita mai voa muiaia.

¹⁴ A—, hilisi eokere aea maeamarōva ita eve haiiri voa siseit’ oria, a—, e haiovoro vei hiva levi aria, okofa la sukavutea lei kaiae lōri leiti vei.

¹⁵ Lea haiovoro kauri voa fauka leitita haiovoro kao; a—, are mearovaeka ve etau, maeasarōva sa haikaeaita etau, Diabolo ve etau.

¹⁶ Ipi hilisi aea maeamarōva ita sa siseita lea oti voa, lavukakaeai aea leita mai maealolo foromai ta lōvoa sisea vovea.

¹⁷ A—, arori voa fauka leitita haiovoro ve omopa peise ovava reha, aea aite tairu, aeata haimafu. Are karu sa moita loki o la utohoa mapi, maeaforoe leititore, aeata fare lareva lareva sa soa’ meitore. Are horahora leitita etau kasirau, aeata lohalai mai ta leiti sore.

¹⁸ Tairu karu ere mere la totoeaita haiiri ita vipaita, ere haura leita mai ve fare la sarapaitore.