Iakobo 2 - Testamenta Áre 1983 (Toaripi PNG)

Ekalesia voa karu foromai ere usoso

¹ Arave paumarehari e, e ereitave Papuvita Iesu Keriso, sosorusosoru ve Papuvita la sukaererea vovo roroaita lea vei, karu ve soso o arita lea mai ita levi roroava.

² Karu aea lavekufi gold la orea, aea puta mafu lareva ta mopi, eve kokorukai voa koti oropi, merava karu aeata puta ōsi mopi lōri kotita varo,

³ aea e lea puta lareva karu la taivotei mōri moita varo, Mea oti lareva voa eapo avaia, a—, lea merava karu la o mōri moita varo, A lōvoa pavaia, ō arave mora ipi voa avaia.

⁴ E lōri leitita soa e karu la mai hariaharia sa lei faeafaea a’ erero lei haiiri kaiae ita voa seseōvaita reha.

⁵ Arave haikakare leita paumarehari e, mapaia. Ualare mea mearovaeka ve merava karu la haikaea maravi la roroa, ereve pisoso ereve sukaerereaita haiiri reha, aea ere basileia ta ovai, Ualare sa arero haikakare araita lea karu la miarai vei evera otoare ōpe basileia reha.

⁶ A—, e lea karu merava la lōfeare sa lei maeamariti loita reha. Ivara eokere mai ita eve papukaru lei, kōto oti voa ero irori ita aruavaita lea karu lavea lavea? Ere pisoso karu reha.

⁷ Ero aravaita lea rare lareva voa lea pisoso karu sa lei o kaiae ō vovea.

⁸ A—, e haura mai la moita lea toare o la kakeva leitita, Safu Buka voa uka siseita mea o, A ave haekao peita karu la ave elore maea feare haikakare leiti vei. Lōfeare leitita, a—, e lareva loita reha.

⁹ A—, e karu ve soso o arita, a—, e lea vei kaiae leititore. Lea Safu Mai sa ero seseōvi, ero kaiae o arita reha.

¹⁰ Ipi Safu Mai la kiva lei, lei vovo roroaita, a—, etau farakeka voa putoita lea karu, are lea Safu Mai foromai la lei kaiae leititore.

¹¹ Ipi mea o moita Ualare, A ua torea levi leitia, are mea o ta moitore, A karu la levi paeaia. Soka a ua torea leiti auke lei, a—, karu la paeait’ oria, a Safu Mai la lei kaiae loita reha.

¹² Karu la felaukea pisiri leita Safu Mai sa seseōvai vei roroaita karu feare, moita o voa leita mai ita lei vovo roroava.

¹³ Maeaforoe leiti auke leitita lea karu, arero seseōvi tava miaraita lea mea Ualare sa arero maeaforoe levi muiai roi. A—, maeaforoe sa seseōvi tava miaraita mai la sapataitore.

Sukaerereai aeata leita mai

¹⁴ Arave paumarehari e, karu aea are sukaerereaita haiiri ita o la moita, a—, are lea haiiri ita etau aea la leiti auke leitita, a—, lōfeare mai ve eite leavoa? Lea sukaerereaita haiiri sa arero fareōvi makuri leitita ore ei?

¹⁵ Marehari aea ō uaroa aea maea puta auke lei, eroa sa’ meita,

¹⁶ aea eve karu farakeka arero mō arita, Eapo teraia, maea a siahu toa, ére popaia; a—, maea sa haikaeaita etau aea la arero miarai auke leitita, a—, lōfeare mai ve eite leavoa?

¹⁷ Sukaerereaita haiiri ta lōfeare, are haria aea leita mai auke leitita, a—, are opi la eaea.

¹⁸ Soka karu aea mō arita varo, A sukaerereaita haiiri ita mea, ara leita mai ita mea. Aita, arave tava o meha, Karu leita mai auke ita sukaerereaita ore lea la araro muiaia, aea ara arave leita mai sa arave sukaerereaita haiiri la aro muiai roi.

¹⁹ Ualare kofa are farakeka haria, a lōfeare sukaerereaitore. Lareva reha. A—, harisu ta lōfeare sukaererea, tore lei maeauti oriri‐oriri aritore.

²⁰ Hai auke iti auke karu e, leita mai auke ita sukaerereaita, a—, lōfeare haiiri eite kasirau. A lea la ore leiti vei haikaeaipea ei?

²¹ Soka, ereitave papa Abrahama are Ualare ita mai haura leafeare leipe ei? Are areve atute Isako la alitara voa Ualare vei omopa posaseōpe lea mea.

²² A ofae aura eavai: areve sukaerereaita haiiri are sa leita lea mai ita farehoria leipe, aeata are sa leipe lea etau areve sukaerereaita haiiri la lei kekese leipe.

²³ Safu Buka voa uka siseita mea o la lei okofa leipe reha, Abrahama are Ualare la sukaerereōpe, aea are Ualare ita haura karu rare lea vei ōpe, aea Ualare arero moraitai rare aravōpe.

²⁴ Soka karu are sa leita lea mai vei arero lei Ualare ita haura leititore, areve lea sukaerereaita haiiri haria voa kasirau.

²⁵ Lōfeare mai ita lea saruka ua Rahaba are Ualare ita haura leipe are lea Israela otiloa karu oraka la maeafukapi, ereukaro lei otiharo haria voa itapi safauka kavōpe lea mea.

²⁶ Maea ove auke voa opaita, lōfeare leita mai auke ita sukaerereaita haiiri ta opi la eaea.