Iakobo 1 - Testamenta Áre 1983 (Toaripi PNG)

¹ Iakobo, Ualare aea Papuvita Iesu Keriso ve sarufa vita ve karoro meha; mearovaeka foromai voa fafarapi pepeita toruipi‐ipi twelve veia; e foforoe reha.

Sukaerereai aeata haiovoro

² Arave paumarehari e, e ero seseōvai vei vuteaita etau hariaharia sa sukaeaita lea mea, e lea etau vei hailareva o aria.

³ Ipi eve sukaerereaita haiiri la seseōvi rofo la ore leitita, a—, lula auke haiiri kere mai la lōfeare sa lei forera vovea.

⁴ Aea eve lula auke haiiri kere ita lei vovo roroava, e ta etau foromai voa lareva ita lei kekese lōri lei, etau aea la hai levi kaeai vei.

⁵ Eve karu aea haiovoro auke ita meita, a—, are Ualare la loki leitia, aea karu foromai la lōfoa lōfoa la o haiiri ari auke ita miaraita lea Ualare sa haiovoro arero miarai roi.

⁶ A—, are loki sukaerereaita haiiri voa, horahora auke ita leitia; ipi horahora leitita lea karu are usoso fareovaita mea sa toa morava morava a’ seseaita aroaro fefeare.

⁷ Lōfeare karu are hai mō levi kaeaia, are etau aea la Papuvita voa ovai roi;

⁸ ipi haiiri orakoria karu, are areve leita mai foromai voa maea fasafasa lei vovea.

Merava aea pisoso

⁹ Ekalesia karu merava lei meit’ oria, aea Ualare sa arero moravaita, a—, hailareva leitia;

¹⁰ aea pisoso karu ta hailareva leitia, Ualare sa arero lei faukait’ oria. Ipi pisoso karu are ta usoso kavuru ve pupuri feare sisapai roi.

¹¹ Ipi sare patei siahu ita haea, kavuru la lei fefeopi, areve pupuri sisapi, aea areve maeahoa kaleitita reha. Pisoso karu ta lōfeare, are sa areve leita mai hariaharia ita meita voa, veverapi kaleiti roi.

Ualare karu la seseōvaita mai voa vuteai sore

¹² Seseōvai vei vuteaita soasoa voa haiiri rofo ita meita lea vita lareva ia, ipi arero seseōvaita voa are sapataita lea mea are makuri ve kekeva la ovai roi, usoso Ualare sa arero haikakare araita lea karu la miarai o ōpe lea otoare feare.

¹³ Seseōvaita voa vutea vo meita lea karu o mō levi moia, Araro Ualare sa seseōvai vei la vuteaipea; ipi kaiae sa Ualare la seseōvaita ore kasirau, aea are ta karu la vuteai vei seseōvai sore.

¹⁴ A—, karu areve haria haikaeai maealolo sa arero apeva vutea areve haiiri la larō vovea.

¹⁵ Aite areve haikaeai maealolo, ére voa moeita feare lei, mikumiku a’, mai kaiae la epaita feare, aea lea kaiae asi sora lei, opai la lei foreraitore.

¹⁶ Haikakare leita paumarehari e, eve elore haiiri apeva levi vuteaia.

¹⁷ Meru lareva foromai aea lohio etau lareva‐lareva‐eiteapo kauri voa, ovava foromai la pisosiape Oa Ualare sa lei fafuka forera vovea; are sare feare mai hariaharia lei, aea kerorikerori a’ murumuru la lei foreraita lea mai la leiti sore.

¹⁸ Are haria sa haikaeōpe lea vei, are areve okofa ve o sa ereitaro lei forerōpe, ereita are sa lei foreraiape etau etau foromai voa fare toare feare leiti vei.

Mapaita mai aeata leitita mai

¹⁹ Haikakare leita paumarehari e, mea la ore leitia, karu foromai o mapai vei utohoa lei vovo roroava, a—, o omoi vei aeata kitou leiti vei, lekaleka lei vovo roroava.

²⁰ Karu ve kitou sa Ualare ve haura leita mai lei forerai sore.

²¹ Lea vei sirisiri leita mai aea mai kaiae foromai la sukavutea mutapi, aea Ualare sa eve haiiri voa vipi peita lea o, ero lei makuri leitita ore o la haiiri‐ipi ita voa ovai haikaeaia.

²² E o la mapi leitita karu lei roroava; o la au mapaita haria voa kasirau, ipi lōfeare voa e eve elore haiiri apeva vutea vovea.

²³ Ipi o la au mapai haria leitita, a—, leiti auke leitita lea karu, are usoso areve soso la ma‐ove voa ofae eavaita karu feare;

²⁴ are ofae eovi, te, si kao areve soso leafeare are hai utohoa safaita reha.

²⁵ A—, safu o kofa, karu la felaukea pisiri lei paraeaita lea safu o kofa la, ma‐ove voa feare ofae fofoisa haisafai auke ita mapi haisukafori lei vovo meita, lea safu mai la leitita karu, Ualare sa arero lei lareva leiti roi are sa leitita lea etau foromai voa.

²⁶ Karu aea areve haiiri mōfeare, are Ualare la maso toaita karu; a—, are areve ape sa o seseōvai auke ita moita, a—, are elore haiiri la apeva vuteaita, aea areve maso toaita mai ta eite kasirau.

²⁷ Ualare Oa ve omopa voa ovava ita kaiae auke ita maso toa vovo meita mai meha: haieae ita roroaita oa auke atutemori aea ua lelesi lelesi ita la maeaforoe lei toarai vei, aea areve elore maea la mearovaeka ve kaiae voa, kaiae auke ita kiva lei vovo mei vei.