Heberu 8 - Testamenta Áre 1983 (Toaripi PNG)

Otoare áre ve maso harofave vita

¹ Elave ovoro ve eite kofa meha: ereita ta lōfeare maso harofave vita ia. Are Rofo Rovaekapo Ualare ve terona ve mai toare voa laisesea kauri voa.

² Are maso harofave vita ve tivi safu rovaea oti, puta maso uvi kofa voa lei vovea; lea puta maso uvi la karu sa safai kasirau, a—, Papuvita sa moravi vipōpe.

³ Maso harofave karu foromai la larietau meru, aea ovo maso etau Ualare ve omopa voa posaseaita tivi vei vipaitore; lea vei mea maso harofave vita are etau ta haikaea arero ovi omopa posaseai vei.

⁴ Are mearovaeka voa peit’ oria, are maso tivi vita levi leiti lare, ipi Mose ve Safu sa moita mai lōfeare meru la omopa posaseaita karu laepepea.

⁵ Ere sa leitita lea maso tivi are usoso kauri voa leitita lea maso tivi ve ruruiaita ove ō sare ve ove ve etau feare. Usoso Mose are puta maso uvi la turai vei leipe lea mea, Ualare arero satiriōri mō ōpe, A kiva leitia, lea etau maeamaea usoso raepa voa aro muiaita lea ove feare erero lōfeare pisosia.

⁶ A—, faitora Keriso sa maso tivi lareva kofa lei laipea, lea evera maso tivi ve lareva lōfeare kasirau; usoso are sa Ualare aea areve karu ita lei ōpe lea totoeaita otoare ve lareva, evera safu otoare ve lareva la sapatai, ipi lea totoeaita otoare ve eite etau lareva kofa voa foreraita eavia.

⁷ Ipi lea omopa safu otoare kaiae auke leiti’ oria, a—, aite otoare la hai levi kaeai lare.

⁸ A—, Ualare areve karu la kaiae o a’ mō ōpe, Papuvita o mō auai, Sare sare forerai vei la roi, lea mea ara Israela ve toruipi aea Iuda ve toruipi ita otoare áre ari roi.

⁹ Ara ereve papa‐ita ita evera ōpe lea otoare feare kao, ara erero mai sa tatavi Egupto mea la kiripi maria voa lariovōpe lea sare voa; ipi ere arave otoare voa roroai auke leipe, lea vei ara erero haiarara leipe; Papuvita ve o reha.

¹⁰ Papuvita ve o aeata mōfeare: lea sare sare ve aite voa ara Israela ve toruipi ita mea otoare la ari roi; ara arave safu ereve iri voa vipi, ereve haiiri voa lea safu o la ukai roi; aea ara ereve Ualare lei, aea ere ta arave karu lei pepeava roi.

¹¹ Aea karu aea areve elore maeapavora karu, aea karu aeata areve elore marehari la mōfeare o ita ata levi satiriarai roi, Papuvita la ore leitia, ipi ere foromai sa araro ore leiti roi, soa ereve karu seika kofa voa soa patei ereve karu rovaea kofa voa.

¹² Ara ere sa leiape lea; kaiae voa erero maeaforoe lei, ereve iri kaiae vei hai ata levi kaeai roi.

¹³ Ualare o otoare are vei moipe lea vei, are lea omopa otoare la lei everove lei areve eite la lei kaleipe. Soka areve eite kaleipe lea everove etau utohoa veverapi kaleiti roi.