Heberu 6 - Testamenta Áre 1983 (Toaripi PNG)

¹ Lea vei ereita Keriso vei lea ovoro ve oarehōva satiriaraita etau la miavi, etau hea la ata topiari haiiri sora ita seseōvi ore leitia. Ereita Ovoro Lareva ve ipi etau la malasa; erero ata satiriōri satiriōri ore leiti vei, haikaeaita mai lōfeare kao. Lea ipi etau e ore, ere meha: opaita tivi voa foreraita lea mai la kiripi, haiiri kerori Ualare la sukaerereai vei,

² satiriaraita o bapatiso vei aeata o ipi mai mopaita mai vei, aea o ipi opi ata itoita lea mai vei, aeata ipi sisa soa ve seseōvi tava miaraita mai vei. Soka ereita lea omopa kofa satiriaraita etau voa haiiri sora sa ore leita etau la topiaraia.

³ Ualare sa ereitaro toarait’ oria, a—, ereita mai lōfeare leiti roi.

⁴ Ipi Ualare la sukaererea aea aite soa voa arero haiarara lei kiripaita lea karu, erero lei haiiri ata kerorita otiharo kasirau. Erero everori satiriōri lei ovava lei, kauri ve meru ta seseōvi aea Safu Arahoha voa ereve soa ta ovi,

⁵ aea Ualare ve Ovoro ve lareva ta seseōvi malasa lei, aea aite foreraita soa ve siahu ve itua ta ore.

⁶ A—, ere lea etau la kiripi, ere elore mai sa Ualare ve Atute la satauro voa ata vitei, arero karu ve soso voa lei opasea leiti vei.

⁷ Usoso mōfeare oti aea ve mea voa, lai sa haelarehaelare vevea, forōva arita karu vei laloita tolotolo lareva asait’ oria, Ualare sa arero lei lareva leititore.

⁸ A—, lea oti ve mea voa makaisa ita kiriraua ita sa asait’ oria, are eite kasirau; arero soa haekao Ualare sa hasiavaita o mei, arero a sa vifei sa’ lōri kaleiti roi.

⁹ A—, haikakare e, elave o lōfeare arita, a—, ela e vei haiiri horahora kao. E leita mai lareva ore, aea e lōfeare voa fareōvi makuri leita soa la ovai roi.

¹⁰ Ualare are eae leiti sore, e leiape lea etau aea areve rare la haikakare lei, e areve safu karu la toaraiape aeata toarai vovea, are lea la hai levi safai roi.

¹¹ Elave haikaeaita haiiri rovaea meha, e karu foromai lōfeare haihahari lei vovo roroava, tetete soa sarapaita soa voa, lea vei e au taita lea etau la e maravai roi.

¹² E maeapatoita levi leitia; a—, mōfeare mai la leita karu fefeare leitia, ere Ualare la lula auke haiiri ita sukaererea, aeata lōfeare vei ere Ualare sa otoare ōpe lea etau la maravi la roroa.

Ualare sa okofa ita ōpe otoare

¹³ Ipi Ualare are Abrahama ita otoare ōpe lea mea, are areve elore maea rovaeka vita la ovai auke leitita lea vei, are areve elore maea la ovi otoare la okofa leiti vei,

¹⁴ mō ōpe, Ara aro etakofa lei lareva leita siahu sa aro lei lareva leiti roi, aea aro lei totavi, ave meavumōla la lei rauapo kofa leiti roi.

¹⁵ Soka Abrahama sa lula auke haiiri rofo lei vovo meiape lea vei, are otoare etau lōri ovōpe.

¹⁶ Ipi karu ere ereve rovaeka vita ve rare la ovi otoare la lōri okofa leititore, aea aite voa o serea elore elore arit’ oria, lea okofa oita o sa horahora etau la lei kaleiti roi.

¹⁷ Lōfeare mai ita, Ualare areve toarōrisaita ore auke leita otoare, otoare etau la ovaita karu la muiai haikaeaiape lea meamea, are otoare la okofa oita o ita o kere ōpe.

¹⁸ Soka lea toarōrisaita ore auke leita etau oraka meha, Ualare ve o aea apeva arita ore auke Ualare ve otoare ita. Lea vei ereita makuri vei safauka arero tai oroaita karu, haiiri rofo ita la leipea ereitave omopa voa miavi eaeipeta lea haikaeaita makuri la mai sa totoreai vei.

¹⁹ Lea haikaea taipeta makuri are rofo aea kekeapi eaeita vavaea fave feare ereitave ove vei, kauri ve tavaea puta lōva iri voa alaea Ualare ve omopa voa i a’ la eaea.

²⁰ Lōvoa ereitave omopa voa pataita vita, Iesu sa ereita vei oropi laipea, ipi are peita maso harofave vita, Melekisedeka sa leipe lea mai ve ipaisa vita eavia.