Heberu 4 - Testamenta Áre 1983 (Toaripi PNG)

¹ Soka areve haioraita oti voa oropai vei arita lea otoare Ualare sa ereitaro ta ō vovea. A—, ereitave tore meha, e karu hea lōvoa forerai auke leiti ave.

² Ipi Ovoro Lareva ereita voa itoro ape, ere voa ta lōfeare; a—, ere mapaiape lea ovoro sa erero lei lareva leiti kasirau, ipi lea o la mapaiape karu arero ovi sukaerereai auke leiape eavia.

³ Ipi ereita mapi sukaerereaita karu Ualare sa otoare ōpe haioraita oti voa la oropaipea. Usoso are sa moipe lea o feare, Lea vei ara kitou ita otoare kere ōpe, Ere arave haioraita oti voa levi oropai roi. Etau farakeka, areve tivi mearovaeka la pisosi roroka leipe lea soa voa evera kekese leipe.

⁴ Ipi Safu Buka voa seven sare vei o mō uka laisisea, Ualare seven sare voa are pisosiape lea tivi foromai voa haiorōpe.

⁵ Eite mea moipeta o voa ta o mō uka laisisea, Ere arave haioraita oti voa levi oropai roi.

⁶ Soka Ovoro Lareva la evera mapaiape lea karu, ere lea haioraita oti voa oropai kasirau, ipi ere mapi sukaerereai auke leiape eavia. Eite karu hea ia, ere lōvoa oropaita ore.

⁷ Lea vei Ualare are sare aea la lei kekese, iso sare meha. Soa savori ve aite voa Davida ta areve lea o la moipe usoso lea omopa Safu Buka ve o feare, Iso sare e Ualare ve ape o la mapai oria, e ōvafae kere levi leitia.

⁸ Ipi Iosua sa erero lei everori haiorait’ oria, a—, Ualare sare aea vei laua aite voa levi sukavai lare.

⁹ Soka Ualare ve karu vei haioraita soa ia seven sare voa.

¹⁰ Ipi Ualare ve haioraita soa voa oropaita lea karu areve tivi kiripi haioraitore, usoso Ualare sa areve tivi la kiripi haiorōpe lōfeare.

¹¹ Lea vei ereita lea haioraita oti voa oropai vei rofo ita seseōvaia, karu aea lea ōvafae kere mai sa lei oai ave.

¹² Ipi Ualare ve o are makuri aea tivi ta lei vovea; are mare kofa, tao itai itai marehaukaita soi ve mare la sapatai. Are soa ove itai aea arahoha itai tofei, hau aea uti ve oro la sukafaropaitore. Are karu ve haiiri aea haikaeaita mai ita la seseōvi ore lei vovea.

¹³ Makuri etau farakeka aea Ualare ve soso voa arorisaita ore kasirau; a—, etau foromai pisiri lei, are sa eavaita ore. Ereita lōfeare leitita Ualare la ereita sa leita lea mai la vavavai vei.

Iesu, ereitave maso harofave vita rovaea

¹⁴ Lea vei ereita haiiri rofo ita sukaererea taupai vei. Ipi ereita maso harofave vita rovaea ia, Ualare ve soso kofa voa patei peipeta lea vita, Iesu Ualare ve Atute.

¹⁵ Ereitave maso harofave vita rovaea are ereitave maeapatoita haiiri la haveva lei maeaforoe auke leitita vita kasirau. Etau foromai voa arero ta ereitaro feare seseōvi vuteaiape; a—, are kaiae leiti kasirau.

¹⁶ Lea vei ereita maeaforoe ve terona ve haekao voa maea karōva ita foreraia, aea ereita heafo leita lea soa kofa voa are maeaforoe lei, haiforoe leita meru ita sa ereitaro toarai roi.