Heberu 3 - Testamenta Áre 1983 (Toaripi PNG)

Iesu are maso harofave vita rovaea

¹ Lea vei, Ualare sa lei safu lei, kauri voa soa ovai vei isōpe paumarehari e, haiiri Iesu voa seseōvaia. Arero Ualare sa itapi are ereita sa sukaerereaita lea mai ve maso harofave vita leiti vei.

² Are lea tivi leiti vei arero haikaea ovōpe Ualare la kakeva leiape, usoso Mose sa Ualare ve toruipi voa kakeva lei meiape lōfeare.

³ Toruipi ve maeatita fari ia, a—, lea toruipi la lei turitovaita vita ve fari are arori kofa voa. Lōfeare Mose are fari rovaea ia, a—, Iesu ve lea fari are arori kofa voa.

⁴ Ipi toruipi‐ipi foromai karu sa lei turitovai vovea, a—, etau foromai la lei turitovaita Vita Ualare reha.

⁵ Soka Mose Ualare ve toruipi foromai voa sarufa tivi mai kakeva ita etakofa lei vovo meiape, aea lōfeare voa aite soa voa Ualare sa omoi etau ve okofa la pisiri everori muiaiape.

⁶ A—, Keriso are Atute maea lei, Ualare ve toruipi voa harofave vita mai la kakeva ita lei vovo meiape. Ereita haiiri rofo lei, ereita au taita etau vei hailareva ita sukaerereait’ oria, ereita areve toruipi lōfeare lei roroava roi.

Keriso voa ereita haiorai roi

⁷ Lea vei usoso Safu Arahoha sa moita o feare, Iso sare e Ualare ve ape o la mapai oria,

⁸ e ōvafae kere levi leitia, eve papa‐ita sa evera soa voa lōfeare lei arero sukavuteōpe lea mea, ere sa furuka merava voa areve mai la seseōvōpe lea sare voa.

⁹ Eve papa‐ita sa araro seseōva vovo roroaiape; eite ere sisoro forty voa arave leiape mai la ofae eavaiape.

¹⁰ Lea vei ara lea taotao karu vei kitou lei, aea ara mō ōpe, Ere ereve haiiri voa eae seseōvi, arave otiharo la haveva lei vovea.

¹¹ Lea vei ara kitou ita otoare kere ōpe, ara erero lei, haioraita lea oti voa ere levi oropai roi.

¹² Paumarehari e, kiva leitia, e voa karu aea kaiae lei sukaerereai auke lei, makuri lei peita Ualare la haiarara lei kiripai ave.

¹³ A—, sare sare foromai voa e elore elore kurea vovo roroava, ereita sa iso sare, o oita lea soasoa ve savori voa, kaiae sa ereitaro apeva vutea ereita kaeava ari ave.

¹⁴ Ipi ereita ve sukaerereai, soa oarehōva soa tetete aite kofa voa rofo kofa ita popōvait’ oria, ereita Iesu ita fareho leitita karu lei roroava roi.

¹⁵ Safu Buka ve o meha, Iso sare e Ualare ve ape o la mapai oria, e ōvafae kere levi leitia, eve papa‐ita sa evera soa lōfeare lei arero sukavuteōpe lea mea.

¹⁶ Ualare ve ape o la mapi, arero lei kitou leipe lea karu lavea lavea? Mose sa lariōvi Egupto kiripi maria voa forerōpe lea karu foromai, ei?

¹⁷ Ualare sisoro forty voa erero kitou leiape lea karu lavea lavea? Mai kaiae lei, furuka merava voa putei opaiape lea karu, ei?

¹⁸ Aeata Ualare kitou lei otoare kere lei mō ōpe, Ara erero lei haioraita lea oti voa ere levi oropai roi, lea karu lavea lavea? Arero sukavuteaiape lea karu, ei?

¹⁹ Soka ereita ore, ere lea otoare mea voa oropaita ore auke leipe, ipi ere sa sukaerereai auke leiape eavia.