Heberu 2 - Testamenta Áre 1983 (Toaripi PNG)

Ereitave toare Iesu

¹ Lea vei ereita mapaita lea ovoro la haisukafori kaeai vei, ereita lea ovoro la kiripi ereitaro fareōvi lei soeai ave.

² Aneru sa ereitave papa‐ita la moiape lea o okofa lei, aea lea o la kaeava ape lea karu foromai ereve kaiae ve tava kofa la maravaiape.

³ A—, ereita sa fareōvi makuri leita soa la haiarara leitit’ oria, ereita leafeare safaukai roi? Mea fareōvi makuri leita ovoro la Papuvita sa oarehōva itoro voa ōpe, aea arero mapōpe lea karu sa lea o ve okofa o la ereitaro lōri muiōpe.

⁴ Ualare ta peise ita, haihava leita etau ita, aea siahu ita leita mai la lei, aea Safu Arahoha ve meru hariaharia ta au miaraiape, areve haikaeaita haiiri lōfeare, lea o ve okofa la are lōri lei muiaiape.

⁵ Ereita forerai vei leipeta lea mearovaeka vei laua la la sukavaipea; Ualare lea mearovaeka la aneru ve ipi voa vipai kao.

⁶ A—, karu aea Safu Karoro aea voa o mōfeare ukōpe, Karu eite leafeare ipi a arero haikaeai vei? Aeata karu ve atute, ipi a arero kiva leiti vei?

⁷ A soa taheka voa arero lei are aneru ve ipi voa lei meiape; a arero sosorusosoru, rare rovaea ita la ovi arero kekeva feare lei topi, ave mai sa pisosiape etau foromai ve papuvita leiti vei vipōpe;

⁸ a etau foromai la areve mora ve ora voa vipōpe are sa ereve papuvita leiti vei. Etau foromai la lei karu ve mora ve ora voa pepeitore, lea o ve eite meha, Ualare sa kiripi eaeita etau farakeka aeata kasirau, etau foromai ve papuvita karu reha. Eite, faitora ereita etau foromai la karu ve ora voa vipaita la ofae eavaia kao.

⁹ A—, soa taheka voa aneru ve ipi voa lei meiape lea Vita, Iesu la ereita faitora ofae la eavaipea, are opai ve hehea la leipe lea vei, are sosorusosoru aea rare rovaea ita kekeva feare topi laipea. Ualare maeaforoe sa leipe lea vei, Iesu karu foromai vei opōpe.

¹⁰ Mai haura meha, etau foromai la are sa pisosi aea are vei erero lei roroaita lea Ualare sa are atutemori rauapo la sosorusosoru voa lariōvi lei forerai vei, erero fareōvi makuri leitita voa lariōvaita lea Vita la lei hehea rauapo leipe, arero lei kekese lōri leiti vei.

¹¹ Ipi erero kaiae voa lei ovava leitita lea Vita, aeata are sa kaiae voa lei ovava leitita lea karu foromai ita, ere Oa farakeka. Lea vei are erero rare maraiosu rare aravai vei maeamariti kasirau.

¹² Are Ualare la mō auai, Ara ave rare arave maraiosu voa itoro ari roi; kokoruka roroaita karu ve aru voa ara aro maeati roi.

¹³ O aeata meha, Ara Ualare la sukaerereai roi. Aeata meha, Ara meha, aea Ualare sa araro miaraita mea atutemori ta reha.

¹⁴ Soka atutemori ere sarōva ita ovo ita karu eavia, are ta lōfeare leipe, ipi areve lea opai voa, are sa opai ve papuvita la saroroapai vei, lea ve eite Diabolo;

¹⁵ aea ereve makuri ve sare sare foromai voa opai tore sa fasi roroaita lea karu foromai la are sa lei felaukea paparaeai vei.

¹⁶ Okofa are mai aneru la paea toarai vei sosoropai kasirau, a—, Abrahama ve meavumōla la toarai vei.

¹⁷ Lea vei etau foromai voa arero lei areve paumarehari ita maea usoso kofa lei meiape, are sa maeaforoe aea haura leita maso harofave vita leiti vei, Ualare ve maso tivi voa, karu ve kaiae la lei fari mutatapai vei.

¹⁸ Ipi are hehea lei arero kaiae leiti vei kureaiape lea vei, are kaiae leiti vei kurea vovo roroaita lea karu la toarai vei rofo ia.