Heberu 13 - Testamenta Áre 1983 (Toaripi PNG)

Kureaita ovoro

¹ Eve ekalesia paumarehari la haikakare lei vovo roroava.

² Oti haria karu la sasauka maeafukapai vei hai levi safaia; ipi karu hea lōfeare mai aneru la karu o a’ maeafukapaiape.

³ Dibura uvi voa fasi pepeita lea karu la haikaeaia, ero ta ere ita farehoria fasi pepeita fefeare. Karu sa hasiōvi hehea lei roroaita lea karu ta haikaeaia, e ta ere ita farehoria hehea maea voa lei pepeita fefeare.

⁴ Vita ita ua ita la laeaita mai e foromai voa maeati ita lei pepeava, aea ivutu kite la lei maealolo levi leitia. Ipi Ualare herei karu la, aea vita ita ua ita la torea leita lea karu la seseōvi tava miarai roi.

⁵ Moni la ovai vei haikakare levi lei roroava, a—, e maravi roroaita lea etau maeamaea ita vei haiiri usoso leitia. Ipi Ualare mō ōpe, Ara aro haiarara lei kiripi levi peava roi.

⁶ Lea vei ereita ape karōva ita o mō arita ore, Papuvita arave toari peita Ualare reha; ara tore levi leiti roi. Karu, ere araro lekōru sa leiti roi?

⁷ Ero lariōvaipe lea karu la haikaeaia, Ualare ve o ero itoro ape lea karu. Ere sa leiape mai ereve opai ita la ore lei, ereve sukaererea vo roroaiape lea mai la ruruia vovo roroava.

⁸ Iesu Keriso area sare voa, iso sare voa, aea sare foromai voa, soa sarapai auke ita, mai farakeka usoso lei vovo mea vovea.

⁹ Satiriaraita o merava hariaharia sa eve haiiri la kurea ovi levi roroava. Mai lareva meha, Ualare ve haiforoe leita meru sa ereitave haiiri la lei rofo leiti vei, larietau safu hariaharia voa kao, ipi lōfeare mai voa roroaita karu ere lareva leiti sore.

¹⁰ Puta maso uvi voa maso tivi leita lea karu, ere ereitave alitara voa omopa posaseaita lea etau la larita ore kao.

¹¹ Iuda maso harofave vita savaita animala ve ovo la ovi, safu rovaea oti voa oropi, kaiae ve tava maso etau vei Ualare voa omopa posaseaitore; a—, lea animala ve maea la karu sa pepeita oti ve koravasa voa a toea sa’ kaleititore.

¹² Iesu ta lōfeare, are karikara utape maria voa opōpe, ipi areve ovo sa karu la lei safu leiti vei.

¹³ Lei vei ereita ta arero ōpe lea o maealolo la ovi, arero tai karu sa pepeita otioti ve maria voa tera puavai vei.

¹⁴ Ipi ereita peita karikara mōvoa ovai sore, a—, ereita forerai vei leita lea karikara la tai eli vovea.

¹⁵ Lei vei ereita sare sare foromai Ualare la maeatita mai Iesu voa usoso maso etau feare omopa posasea, ereitave ape poe sa areve rare la marase a’ pepeava.

¹⁶ Leita mai lareva, aea e maravi roroaita etau la faea maeaforoe lei au miarai vei hai levi safaia; Ualare la lei hailareva lei, arero omopa posaseaita maso mai kofa reha.

¹⁷ Ero kiva leita harofave karu la mapi, aea ereve o la kakeva lei vovo roroava. Ere haiorai auke ita eve ove la kiva lei vovea, ipi ere aite soa ereve tivi ve fari Ualare la omoi roi. E sa erero mapi kakeva leitit’ oria, ere ta ereve tivi hailareva ita leiti roi; a—, lōfeare auke leitit’ oria, ere haieae ita leiti roi, aeata lōfeare mai sa ero levi toarai roi.

¹⁸ Ela vei Ualare la loki lei peava, ipi elave seseōvaita haiiri ovava aea ela leita mai foromai voa haura la haikaeai vovea; ela lea etau voa horahora kasirau.

¹⁹ Ara loki o ita taupi ero la moipea, e Ualare la veveu toa, araro lei ero tai lavelave ata forerai vei.

²⁰ Tairu ve Ualare, areve peita otoare ve ovo sa ereitave Papuvita Iesu Keriso, mamoe kiva Vita rovaeka la opai voa lei moravōpe, lea Ualare sa

²¹ etau lareva foromai la ero miaraia e are sa haikaeaita mai la leiti vei, aeata Iesu Keriso ve siahu voa arero lei hailareva leita lea etau e voa lei peava. Soa sarapai auke leita sosorusosoru are voa lei peava. Amene.

²² Ara ero loki la leipea e arave kureaita ovoro la mapi ovaia, ipi ara sa e vei lei ukaita karoro savori kao.

²³ E ore leitia ereitave marehari Timote dibura soa kalei foreraita meha. Soa haekao are koti forerai oria, ara ta are ita ero ofae eavai roi.

²⁴ Ero kiva lei roroaita harofave karu aea Ualare ve karu foromai ita la maeaforoe o omoia. Itali karu ta maeaforoe o ero tai la itapaipea.

²⁵ Ualare ve haiforoe leita meru e foromai voa lei peava. Amene.