Heberu 11 - Testamenta Áre 1983 (Toaripi PNG)

Sukaerereai

¹ Soka sukaerereai ve eite meha, ereita au tai vovo roroaita lea etau la etakofa sukaeaita feare, aea ereita ofae eavai auke leita lea etau vei horahora auke ita roroaitore.

² Ere sukaerereaiape lea vei lea evera karu Ualare voa fari lareva maravaiape.

³ Ereita sukaerereaita lea vei ereita ore mearovaeka Ualare ve o sa lei, karu sa eavai auke etau etau voa, ofae sa eavaita etau etau lōri forera laepepea.

⁴ Abela sa sukaerereōpe lea vei are maso etau lareva la ovi omopa posaseōpe, Kaino ve maso etau ve lareva la sapataipe; aea Ualare areve meru etau la haikaea ovi are arero haura vita o lōri ōpe. Are opōpe, a—, are sa sukaerereaiape lea vei ovoro are sa la moipea.

⁵ Enoka sa sukaerereaiape lea vei are opai ore auke lei arero kauri voa fareōvi pataipe; karu arero eavai kao ipi Ualare sa arero fareovōpe eavia. A—, Safu Buka ve o meha arero fareōvi pataipe lea soa ve omopa voa, are Ualare la lei hailareva leiape vita reha.

⁶ Eite Ualare la sukaerereai auke leitita, a—, karu arero lei hailareva leitita ore kasirau. Ipi Ualare tai haekao forerai haikaeaita lea karu ve otiharo farakeka meha are mōfeare la sukaerereai vei, Ualare are makuri aea are arero elita lea karu la tava lareva miaraitore.

⁷ Noa sa sukaerereaiape lea vei, are eavai auke etau vei Ualare sa arero everori kurea satiriarōpe lea mea, are mapi kakeva lei vavaea la pisosipe, areve uvi karu la fareōvi makuri leiti vei. Lōfeare vei mearovaeka la seseōvi kaiae o lōri ōpe, aea Noa are sukaerereaita haiiri sa lei foreraita lea haura leita mai la Ualare voa lōri ovōpe.

⁸ Abrahama sa sukaerereōpe lea vei, arero isa, are aite soa voa ovi pavai oti voa maea leiti vei moipe soa, are kakeva lei, oti la haveva ita maea lei au isaipe.

⁹ Are sukaerereaipe lea vei, are Ualare sa arero miarai vei otoare ōpe lea mea voa, oti haria karu lei meiape. Lōvoa are harotōvu safei lōri peiape, Isako aeata Iakobo ita ta lōfeare, Ualare sa lōfeare otoare farakeka ereukaro ta ape.

¹⁰ Eite Abrahama are ipi oti kere ita turi pavai karikara vei tai vovo meiape, areve ove ukaita vita aea turaita vita Ualare reha.

¹¹ Sara sa sukaerereōpe lea vei, are ére ovōpe; eite are korōvu, areve ére ovaita soa ta kaleipe. A—, areve sukaerereaita haiiri meha, atute miarai otoare ōpe lea Ualare are okofa.

¹² Soka lea heavita farakeka, Abrahama, are ta opōpe feare voa, meavumōla totavi rauapo leipe, usoso kauri ve koru sitavu sitavu fefeare, aeata usoso makaikara ve mai muti ore auke leitita miri‐folo ve rauapo fefeare.

¹³ Lea karu foromai sukaerereaita haiiri ita opaiape. Ere Ualare sa otoare ōpe lea etau ve eite la ovai kao, a—, ere lea etau la ára‐ita hailareva sa lei fofoisaiape. Ere eite mearovaeka voa toruipi haria karu aeata oti haria karu, ere lea la milafukai kasirau.

¹⁴ Ipi lōri o moita karu ere ereve haiiri pisiri muia, ere mea la ereve elore vei eli vovo roroaitore.

¹⁵ Ere kiripōpe lea mea la ata haikaeakaea ōvovo roroai oria, a—, ere ata lōvoa kerori kavai vei otiharo sukaeai lare.

¹⁶ A—, eite, ere mea lareva kofa la ovai haikaea vovo roroaiape, kauri ve mea reha. Lea vei, Ualare are ereve Ualare rare aravai vei maeamariti kasirau, ipi are karikara ere vei evera pisosi kekese lei eaea vovea.

¹⁷ Abrahama sa sukaerereōpe lea vei Ualare sa arero seseōvōpe soa voa are Isako la omopa posaseai vei mapi kakeva leipe. Ualare ve otoare la sukaeōpe lea vita, areve atute farakeka haria la ovi omopa posaseai vei haiiri kakeva leipe.

¹⁸ Eite lea atute vei mea o arero moipe, Isako voa ave meavumōla la lei totavai roi.

¹⁹ Ipi are hai mō kaeōpe, Ualare karu la opai voa ata moravaita ore, aeata Abrahama are Isako la opi ata itoita mai feare voa makuri lei ata ovōpe.

²⁰ Isako sa sukaerereōpe lea vei, are Iakobo auka Esau ita la forerai vei leita soa vei o sa lei lareva leipe.

²¹ Iakobo sa sukaerereōpe lea vei, are opai vei leipe soa voa Iosefa ve atute oraka la o sa lei lareva lei, areve mai kaika ve moi voa eropi pōvi, Ualare la maso toōpe.

²² Iosefa sa sukaerereōpe lea vei, areve makuri kaleiti vei leipe soa, are Israela ve susumori Egupto la kiripai o everori mei, aeata are o areve uti la leiti mai vei ta satiriōri moipe.

²³ Mose ve oa ita lou ita sa sukaerereōpe lea vei, arero miōpe lea mea, ereuka papare oroisoria soa voa arero milafuka peiape, ipi ereuka ofae eavōpe are atute maeahoa, aeata ipi ereuka lea king sa moipe o kere la tore auke leipe.

²⁴ Mose sa sukaerereōpe lea vei, are asi rovaea leipe lea soa, Faro ve mori ve atute rare aravai vei haiarara leipe.

²⁵ Are hai mōri kaeōpe, arero ta Ualare ve karu ita farehoria lei hehea leiti vei, a—, kaiae ve soa harua voa leita hailareva la leiti vei are haikaeai kasirau.

²⁶ Are haiiri mō seseōvōpe, arero o maealolo Ualare sa vevetipe lea vita vei a’ meita, lōfeare ve eite rovaea kofa, Egupto ve ovi roroaita etauroro foromai ve eite seika, ipi are forerai vei leipeta tava lareva la fofoisa haikaea meiape eavia.

²⁷ Are sa sukaerereōpe lea vei, are king ve kitou la tore auke lei, Egupto kiripōpe, ipi ofae sa eavai auke leita lea Ualare la are eavai kofa feare lei, lula auke haiiri kere ita leipe eavia.

²⁸ Are sa sukaerereōpe lea vei, are Foapaita Sosoka la lei, aea uvi ve utape utape voa ovo sa roroai o moipe, lōfeare vei paca paca arita aneru are Israela ve lea atute toare foromai la mai levi mopai vei.

²⁹ Israela karu sa sukaerereōpe lea vei, ere Makaikara Mohari la, mea arara voa ufa puavōpe; a—, Egupto karu lōri ufai vei seseōvōpe soa ere ma isoseōpe.

³⁰ Israela karu sa sukaerereōpe lea vei, ere Ieriko karikara sare seven voa mora sa eakoa eakoa a’ a’ roroka lei, lea karikara ve fave lōva hohōroōpe reha.

³¹ Lea saruka ua Rahaba sa sukaerereōpe lea vei, arero Ualare la sukavutea ovafae kere leipe lea karu ita farehoria saroroapai kasirau, ipi are sa lea otiloa karu oraka la maeafukapōpe eavia.

³² Ara o aeata lekōru la moi roi? Ipi ara fari Gideono vei, Baraka vei, Samisona vei, Iafete vei, Davida vei, aea Samuela vei, aeata peroveta karu vei moi oria, ara soa usoso levi leiti roi.

³³ Ere sukaereaiape lea vei, ere basileia hariaharia la ovi aieri aieri, karu la seseōvi tava haura miōri miōri, otoare etau la maravi maravi, liona ve ape sasauka,

³⁴ a ve siahu la futi, marehaukaita soi ve tao voa safauka makuri lei vovo roroaiape; rofo auke soasoa voa erero lei rofo lei, maola soasoa voa ere ivara lei, toru hariaharia ve maola karu la larivataiape.

³⁵ Uamori ereve opōpe karu makuri ita ata ovaiape, hea ve maea la karu sa hasiōvi, a—, erero paraea makuri leiti vei haiarara leiape, ere opi ata itoita soa voa lareva kofa la sukaeai vei.

³⁶ Karu hea la karu sa area sa vutea a’, tola sa soa rauapo teavi sasape; karu hea la auri horou sa fasi, dibura voa toa pepeiape.

³⁷ Erero fave sa toa toa a’, erero e sa suka sarapi, erero marehaukaita soi sa toa paea paea ape. Ere mamoe aea nani ita ve ruru mopi kerori kerori ōvovo roroaiape; ere merava lei, erero haisora leiti vei larivati, hehea ita lei vovo roroaiape.

³⁸ Mearovaeka ere vei lareva kasirau. Ere furuka merava voa, raepa aru aru voa, fave uta‐uta voa, aea toru uta‐uta voa arafuka lō te sukava lō iti sukava lei vovo roroaiape.

³⁹ Lea karu foromai ere sa sukaererea fari lōri maravaiape, a—, ere erero miarai vei moipe otoare etau la sukaeai kasirau;

⁴⁰ ipi Ualare ereita vei etau lareva kofa haiiri sa seseōvi, erero ereitaro auke ita kekese levi lei vovo roroava roi.