Heberu 1 - Testamenta Áre 1983 (Toaripi PNG)

¹ Evera soasoa voa o hariaharia aeata leita mai hariaharia ita Ualare sa ereitave papa‐ita la ovoro omoiape peroveta karu ve ape voa.

² A—, mea aite soa ve sare sare voa are areve Atute sa ereitaro ovoro mei la mea. Are lea Atute voa mearovaeka la pisosi, aea etau foromai la arero aiorōpe areve hasu vei.

³ Are Ualare ve sosorusosoru la lei haeaita Vita, aea Ualare ve opape ve ove kofa lei, are areve siahu ve o sa etau etau foromai la lei pepeitore. Are karu ve kaiae la fareōvi lei ovava lei roroka lei, are kauri arori ve Rofo Rovaekapo Ualare ve mai toare voa patei avōpe.

Ualare ve Atute are rovaekapo

⁴ Ualare arero Atute rare aravōpe, aea arero lei aneru ve arori kofa voa leipe, ipi areve rare sa rovaekapo, aneru ve rare ve rovaea lōfeare kao.

⁵ Ipi Ualare areve aneru aea la mōfeare moi kasirau, Arave Atute a reha; iso sare ara aro ovi la me meha. Are mea o ta aneru aea vei moi kasirau, Ara areve Oa lei, are ta arave Atute leiti roi.

⁶ A—, Ualare are areve Atute toare la mearovaeka voa itapai vei leipe soa, are mō ōpe, Ualare ve aneru foromai areve omopa voa hiopaia.

⁷ Are o aneru vei mōfeare moipe, Are areve aneru la lei fareovaita mea feare leititore; aea areve sarufa karu ta sarita a‐uri feare.

⁸ A—, Atute vei are o mōfeare moipe, Ualare e, ave terona soa sarapai auke lei peava roi; ave basileia ve kaika karu la lei haura leita kaika reha.

⁹ A haura leita mai haikakare lei, mai maealolo la kaifa leititore. Lea vei Ualare, ave lea Ualare sa aro haikaea ovi, hailareva ve teoro sa veveti, ave maeapavora karu ve arori voa aro lei rovaea kofa lei la mea.

¹⁰ Areve o aeata meha, Papuvita e, omopa soa kofa voa a mearovaeka ve ipi oti la vipi, kauri ta ave mai lakoka sa pisosiape etau reha.

¹¹ Erero saroroapai roi, a—, a makuri lei vovo meava roi; ere foromai puta feare ōsi leiti roi.

¹² Mopaita puta feare a erero irurukeai roi, aea ere maea haria ata leiti roi. A—, a mai farakeka lei lōri peava roi, aea ave sisoro kaleiti auke lei peava roi.

¹³ Ualare areve aneru aea la o mōfeare moi kasirau: Arave mai toare voa avaia, tetetete ara ave ote karu la lei ave mora ve posa leiti ao.

¹⁴ Soka aneru foromai ere eite Ualare ve tivi leitita arahoha, fareōvi makuri leiti vei karu la toarai vei itapaitore.