Galatia 6 - Testamenta Áre 1983 (Toaripi PNG)

Kureaita ovoro

¹ Arave paumarehari e, karu farakeka aea kaiae la lei mai paeaita, e voa Arahoha ita karu sa haimafu ita arero lariōvi ata lei haura leitia. E farafarapo ta elore elore kiva leitia, ero ta vutea kaiae leiti ave.

² Eve karu aea heafo leitit’ oria, arero toaraia, aea Keriso sa haisa moita o la kakeva lōri leitia.

³ Eite auke karu aea are elore maea rare karu leiti haikaeait’ oria, are areve haria maea sa apeva vuteaita reha.

⁴ Karu farafarapo areve elore elore leita mai la seseōvi ore leitia, areve maeapavora karu sa leita mai ita levi seseōvaia. Lareva ita oria, are haria leita mai vei hiva arita ore.

⁵ Ipi karu ereve elore elore etau pasou la taiovai roi.

⁶ Ovoro Lareva la arero satiriōri ore leitita lea karu, areve maea etau lareva foromai areve satiriaraita papuvita ita la miōri farehoria ovai vei.

⁷ Apeva sa ero levi vuteaia; karu Ualare la ape kaitoea sa sukavuteaita ore kao. Karu sa vipaita lea mere lōfeare are ata sarapai roi.

⁸ Mere areve maeasarōva vei vipaita lea karu, areve sarōva voa saroroapaita fare la aite sarapai roi; a—, mere Arahoha vei vipaita lea karu, Arahoha voa peita makuri ve fare la aite sarapai roi.

⁹ Ereita mai haura la leiti vei haisora levi leitia, ipi ereita maea‐uti sisapai auke leitita, a—, ereita fare la pisahu kofa voa sarapai roi.

¹⁰ Soka ereita sa soa ovaita lōfeare, ereita mai lareva karu foromai vei leitia; etau rovaea ereita ereitave maeapavora, Keriso la sukaerereaita karu la mai lareva kofa ita toaraia.

Sisa Ovoro

¹¹ E ofae eavaita ore, ara karoro o metameta ita mea o la ero ukaita meha.

¹² Sarōva voa maeamarōva ita lei muia haikaeaita lea karu ere ero peritome leiti vei serea ita kureaitore. Ereve leita mai ve ipi farakeka meha, karu erero ivara eokere ita levi hasiavai roi Keriso ve satauro vei.

¹³ Eite peritome lei roroaita lea karu Safu O la kakeva kofa leiti sore. A—, ere ero peritome leiti vei haikaeaita ipi ere eve sarōva voa leita lea etau vei hiva ari vei.

¹⁴ A—, arao, ara etau farakeka haria vei hiva ari roi, Iesu ve satauro reha, a—, ipi areve satauro voa mea mearovaeka ve etau ara vei opi kaleitita feare, aea ara ta lōfeare mearovaeka vei.

¹⁵ Karu la peritome leitita varo kasirau varo lea oraka eite kasirau; karu la Ualare sa lei áre leitita, eite rovaea kofa reha.

¹⁶ Lōfeare mai la lei vovo roroaita karu foromai, Ualare ve Israela karu voa, tairu, maeaforoe ita lei peava.

¹⁷ Mea soa ve aite voa karu araro ata lei haisora levi leitia, ipi arave maea voa serare serare ia, ara Iesu ve sarufa karu lea sa muiai vei.

¹⁸ Paumarehari e, ereitave Papuvita Iesu Keriso ve haiforoe leita meru eve arahoha ita lei peava. Amene.