Galatia 5 - Testamenta Áre 1983 (Toaripi PNG)

Fasaita sarufa ata levi leitia

¹ Keriso sa ereitaro felaukea paraea roroka, ereita pisiri lei roroai vei. Lea vei mora kere popōvaia, aea fasaita sarufa fefeare ata levi lei vovo roroava.

² Mapaia, ara Paulo, ero o mō la moi, karu sa ero peritome leiti vei e kakeva leitit’ oria, Keriso ero toarai vei levi leiti roi.

³ Ara okofa ita ero ata moi, karu aea peritome areve maea voa leiti vei kakeva leitit’ oria, arero Safu O foromai la leiti vei fasaita reha.

⁴ E voa Safu O la kakeva lei Ualare ita haura leiti vei lōfeare seseōvaita lea karu, e Keriso la sukavutea are ita roroai kasirau, aeata Ualare ve haiforoe leita meru miaraita soa la kiripi maria voa la roroa.

⁵ A—, Ualare ve Arahoha sa elaro toari, ela Keriso la sukaererea, Ualare sa elaro lei, are ita haura leita soa la tai vovea.

⁶ Karu la peritome leitita varo, peritome leiti auke leitita varo, lea oraka eite kasirau Keriso Iesu voa; a—, haikakare lei arero sukaerereaita lea mai farakeka sa haria eite kofa reha.

⁷ E omopa soa voa loreape lareva ita ape. E okofa la kakeva leiti vei ero sukelapaita karu leisa?

⁸ Lōfeare kureaita mai, ero isaita lea Ualare voa foreraia kasirau.

⁹ Fefesita etau sisikaheka sa faloa maea makora la lei fefesitore.

¹⁰ A—, ara ereita farehoria Papuvita voa roroaita lea vei, arave sukaerereaita haiiri e vei mōfeare, e haiiri haria levi leiti roi; a—, eve haiiri la lei lavukakaeaita lea karu areve kaiae tava ovai roi, are leisa varo.

¹¹ Arave paumarehari e, ara karu la haisa peritome leita mai vei itoro ōvovo meit’ oria, karu ivara eokere ita araro hasiavaia ipi levea? Lōfeare itoro arita, a—, arave o satauro vei heafo levi leiti lare.

¹² Arave haikaeaita haiiri meha, ero lei lavukakaeaita lea karu ereve elore maea kofa la ata sarapi maea mitutu leiti vei.

¹³ Arave paumarehari e, ero pisiri lei roroai vei isōpe. Etau farakeka, eve pisiri lei roroaita mai la toarōrisa sarōva sa haikaeaita mai la levi leiti vei; a—, haikakare lei elore elore toari roroava.

¹⁴ Ipi Safu Mai foromai ve eite la kokoruka moita o farakeka meha, A ave haekao peita karu la usoso ave elore maea feare maeaforoe lei haikakare lei meava.

¹⁵ A—, e elore elore putovi torerapait’ oria, e kiva leitia, e karu foromai la la’ haroavai ave.

¹⁶ Ara o mō aipea, Ualare ve Arahoha la ovi kerori voa roroava, aea lōfeare voa e maeasarōva sa haikaeaita mai la levi leiti roi.

¹⁷ Ipi sarōva sa haikaeaita mai Ualare ve Arahoha sa haikaeaita mai la sukavutea vovea, aea Arahoha sa haikaeaita mai sarōva sa haikaeaita mai la sukavutea vovea; ipi lea mai oraka ote leititore, e sa haikaeaita lea mai la elapi e leitita ore levi leiti vei.

¹⁸ A—, Ualare ve Arahoha sa ero lariōvaita, a—, Safu O e voa siahu auke loita reha.

¹⁹ Soka sarōva sa leita mai pisiri lei muiaita meha. Ere eite: herei mai, sirisiri mai, ua ita vita ita ve safu miroapaita mai,

²⁰ apeva ualare la maso toaita mai, maeasiri, sosori, hilisi, kitou, totōpo leita mai, faeafaea arita mai, maiapeape sosori oita mai,

²¹ hilia hilia, ma maealolo la la’ maeakakare leita mai, havohu maealolo, aeata lōfeare leita mai foromai ita. Ara ero evera kurea moiape, aea faitora ero o ata la moipea, Lōfeare mai la leitita lea karu Ualare ve basileia la levi ovai roi.

²² A—, Arahoha sa taita fare meha: haikakare, hailareva, tairu, morarita mai, maeaforoe, lareva, okofa mai,

²³ haimafu, haisukafori meita mai; lōfeare mai la leitita karu la safu sa o erere ari sore.

²⁴ Keriso Iesu ve karu firu ere ereve maeasarōva ve haihahari aea haikaeaita mai maealolo ita la satauro voa vitaita feare lei lōri paea kaleita reha.

²⁵ Ereitaro Arahoha sa lei makuri leitita lea vei, ereitaro Arahoha sa lariōvi roroava.

²⁶ Ereita maeamarōva levi leitia, elore elore lei kitou levi leitia, elore elore hilisi levi leitia.