Galatia 4 - Testamenta Áre 1983 (Toaripi PNG)

Sarufa karu ta haria, atute kofa ta haria

¹ Ara moipeta o meha, areve oa ve hasu aite soa voa ovaita lea atute are etau foromai ve papuvita, a—, eite are siare lei meita lea soa, are usoso fasaita sarufa feare lei mea vovea.

² Are siare lei meita soa voa, are satiriaraita karu aea kiva karu ve siahu voa meava roi mememe areve oa sa moita lea soa foreraita lea mea.

³ Ereita ta lōfeare; ereita atutemori feare lei roroaiape soa voa, mearovaeka ve siahu etau hariaharia sa ereitaro fasi sarufa lei roroaiape.

⁴ A—, soa kofa sa forerōpe lea mea, Ualare areve elore Atute la itapōpe. Itapi arero ua aea sa mi a’ foreri, are Iuda ve Safu O la kakeva lei meiape,

⁵ Safu O ve siahu voa pepeita karu la fari paparaeai vei, ereita Ualare ve atutemori lōri leiti vei.

⁶ E sa areve atutemori leitita la muiai vei, Ualare areve Atute ve Arahoha ereitave haiiri voa itapi, aea are mō isa moi vovea, Aba e! Oa e!

⁷ Lōfeare a fasaita sarufa ata levi leiti roi, a—, atute kofa loita reha; aea a atute lei meita lea vei, Ualare sa ereve atutemori vei lei kekese leita lea hasu foromai voa soa aro miarai roi.

⁸ Evera soa, e Ualare la haveva leiape soa voa, e apeva ualare ve fasaita sarufa lei roroaipe;

⁹ a—, e faitora Ualare la ore loi, ō eite kofa meha, ero Ualare sa ore. Soka e lea rofo auke aea merava leita mearovaeka ve siahu etau hariaharia voa ata kerori, ereve fasaita sarufa leiti vei haikaeaipeta ipi levea?

¹⁰ E sare aea papare aea sosoka soasoa aea sisoro ita la safu suka kiva la leipea.

¹¹ Ara e vei haikavora ita la mea, ara e vei leiape lea tivi auraka auea leiape varo.

¹² Paumarehari e, ara ero loki serea ita mō la leipea, E ara feare leitia, ara ta e feare lei meita lōfeare. E araro mai kaiae leiti kao.

¹³ E ore ara Ovoro Lareva la ero omopa soa voa itoro ape, lea ve ipi ara sa eka leipe eavia.

¹⁴ Etau farakeka e araro haiarara lei sukavuteai kao arave eka sa ero lei heafo leipe lea vei. A—, e usoso ara Ualare ve aneru feare, ō usoso Keriso Iesu kofa feare araro maeafukapōpe.

¹⁵ E sa lea soa voa leiape hailareva leavoa? Ara ore kofa lea soa voa mai usoso leitit’ oria, e eve elore ofae la suka fari araro aiorai lare.

¹⁶ Ipi ara sa okofa ero moia lea vei, ara faitora eve ote karu feare ei?

¹⁷ Ara sa ero omoita lea karu ere ero haisa haria kaeai vovea, a—, eite ereve haiiri haura kasirau. Ereve haiiri ero sasauka e araro haiarara lei, e erero haria la haikaeai vei.

¹⁸ Haisa haria kaeaita haura reha lea haiiri lareva oria, ara e ita fareho peita lea soa voa haria kasirau, a—, soa foromai voa.

¹⁹ Arave haikakare atutemori e, ara ata usoso avasa pataita lou feare e vei hehea la leipea tetete e sa Keriso ve karu kofa leiti roi.

²⁰ Ara haikaeai rovaea faitora e ita fareho pei vei, ara arave kitou ita o la toarōrisa, ape o haria la moi vei; ipi ara haiiri heafo rovaea e vei la leipea.

Hagara auka Sara ia

²¹ E Mose ve Safu O ve siahu voa pei vei haikaeaipeta karu e, araro o aura moi, e Safu O sa moita lea o la mapi haiiri ovava ei?

²² Lea Safu Karoro voa o mō uka laisisea, Abrahama atute oraka la ovōpe, farakeka areve ua ve sarufa mori ve atute, farakeka aea areve ua kofa ve atute.

²³ Sarufa mori ve atute maeasarōva mai sa lei mi ōpe; a—, Abrahama ve ua kofa atute la mi ōpe ipi Ualare sa ōpe otoare eavia.

²⁴ Lea etau voa parabole ia. Lea uamori oraka ve eite usoso otoare oraka feare reha; otoare farakeka aea Sinai raepa voa forerōpe, atutemori la fasaita sarufa leiti vei mi ō vovea; Hagara are reha.

²⁵ Mea Hagara are Sinai raepa ve rare aea, Arabia mea voa, aea are faitora soa ve Ierusalema feare, ipi are aea areve atutemori ita fasaita sarufa lei laepepea.

²⁶ A—, arori voa eaeita Ierusalema pisiri lei eaea vovea, ereitave lou are reha.

²⁷ Ipi Safu Buka voa o mō uka sisea, Korōvu lei mere mi ari auke ua e, hailareva leitia! Avasa pataita hehea leiti auke ua e, hailareva ifo miaraia! Ipi vita sa kiripōpe ua ve atutemori rauapo lei, vita ita peita ua la sapatai roi.

²⁸ Paumarehari e, e Isako feare, otoare ve atutemori lei la roroa.

²⁹ A—, usoso lea evera soa voa leipe mai feare, maeasarōva sa lei mi ōpe lea atute, Ualare ve Arahoha sa lei mi ōpe lea atute la ivara eokere mai leipe, mea faitora soa voa ta lōfeare.

³⁰ Safu Buka voa o leafeare uka sisea? O meha, Lea sarufa ua areve atute ita la maria voa sukavuteaia; ipi fasaita sarufa ua ve atute are oa ve maea ve etau la pisiri lei meita lea ua ve atute ita levi ovai vei.

³¹ Lea vei, paumarehari e, ereita usoso fasaita sarufa ua ve atutemori feare kasirau, a—, pisiri lei meita lea ua ve atutemori.